Lɩɩʋ 5

1

2

3

4

5

6

7

8

9

10

11

12

13

¹Pǝlɛ pǝ wɑɑlɩ kɛ́ Moisi nɑ Alɔŋ pɑ polɑ Icipiti wulɑʋ tɛ́ nɑ pɑ́ heeli-ɩ sɩ: Ɩsɛɣɛlɩ nyǝ́mɑ tɑ, tɑ́ Ɩsɔ Tɑcɑɑ sɩ tǝ́ heeli-ŋ sɩ ń yele-tʋ nɑ tǝ́ polo pooluŋ nɑ tǝ́ lɑpɩ-ɩ tǝmlɛ pǝyɑɣɑ nɑkǝlɩ.

²Tǝnɑɣɑlɛ Icipiti wulɑʋ nɔɣɔ tǝkpɑʋ sɩ: Aweɣe Ɩsɔ Tɑcɑɑ ye? Mɑ tɑ nyɩ pʋntʋ. Ɩlɛ mɑ fɛɩ sɩ mɑ nɩɩkɩ ɩ tɔm nɑ mɑ́ yele Ɩsɛɣɛlɩ nyǝ́mɑ sɩ pɑ́ polo tiili.

³Mpʋɣʋlɛ Moisi nɑ Alɔŋ pɑ cɔwɑ sɩ: Hepǝlɑ nyǝ́mɑ tɑ́, tɑ́ Ɩsɔ Tɑcɑɑ lɩɩnɑ tɑ́ tɔɔ nɑ ɩ́ heeli-tʋɣʋ mpʋ. Pǝ tɔɔ tɔ yele-tʋ nɑ tǝ́ tɔ́ kʋyɛɛŋ tooso nɑ tǝ́ polo pooluŋ nɑ tǝ́ lɑ́ kɔtɑsɩ. Ye pǝ tɑɣɑ mpʋ ɩ kɑ́ kʋ-tʋ nɑ kʋtɔŋ yɑɑ yoou.

⁴Ḿpʋ́ɣʋ́ wulɑʋ holinɑ Moisi nɑ Alɔŋ sɩ: Mɛ, pepe tɔɔ kɛ́ ɩ́ tʋsǝɣɩ Ɩsɛɣɛlɩ nyǝ́mɑ sɩ pɑ́ yele pɑ tǝmɑ ye? Mɩɩ mǝlɩ mǝ nyǝnɑ tɑɑ.

⁵Nɔɔnɔɔ tɑɑ yǝlɑɑ pɑnɛ pɑ hukɑɑ kɛ́ ɩsɩɩ pɑ tǝmɑ kɑ polo ɩsɛntɑɑ, ɩlɛnɑ ɩ́ cɑɑkɩ sɩ ɩ́ mǝŋnɑ-yɛɣɛ wɑɑlɩ yɛɛ?

⁶Kʋyɑkʋ ŋkʋɣʋ Icipiti wulɑʋ heelɑ Icipiti nyǝ́mɑ mpɑ pɑ kɛ́ wɑhɑlɑ tǝmɑ feŋlɑɑ sɔsɑɑ tɔ, nɑ mpɑ pɑ kɛ́ feŋlɑɑ sǝkpemɑ kɛ Ɩsɛɣɛlɩ nyǝ́mɑ tɑɑ tɔ

⁷sɩ: Ɩ́ tɑɑ tɑsɑ-wɛɣɛ pilikinɑɑ kɑsɑɑlokɑ cɛlʋɣʋ kɛ fɑɑlɑɑ. Pɑ mɑɣɑmɑɣɑ pɑɑ pukinɑ nɑ pɑ́ kʋŋ.

⁸Pǝ́cɔ́ pǝ fɛɩ sɩ pɑ pikilinɑɑ ɩ́ sɛkɩ ɩsɩɩ pɑ tɩɩ ŋmɑɑkɩ tɔ. Felentunɑɑ kɛ-wɛɣɛ. Pǝ tɔɔ kɛ́ pɑ kɔmɑ mɑ kiŋ sɩ mɑ́ hɑ-wɛɣɛ mpɑɑʋ nɑ pɑ́ polo pɑ́ lɑ́ pɑ Ɩsɔ kɛ́ kɔtɑsɩ.

⁹Ɩ́ tʋ-wɛɣɛ tǝmɑ toŋ nyǝnɑ. Ɩlɛ pɑ kɑɑ hiki tɑpɑsopǝle sɩ pɑ́ pɑɑsǝɣǝnɑ pɑ pɔpɔtʋ tɔmnɑɑ mpɛ.

¹⁰Ḿpʋ́ɣʋ́ feŋlɑɑ sɔsɑɑ nɑ sǝkpemɑ pɑ lɩɩ Icipiti wulɑʋ tɛ́ nɑ pɑ́ polo pɑ heeli Ɩsɛɣɛlɩ nyǝ́mɑ sɩ: Wulɑʋ sɩ, tǝ́ tɑɑ tɑsɑ-mɛɣɛ kɑsɑɑlokɑ cɛlʋɣʋ.

¹¹Sɩ mǝ mɑɣɑmɑɣɑ ɩ́ kɑ́ yɛlǝnɑ nɑ ɩ́ kʋ́. Pǝyele mǝ pilikinɑɑ kɑɑ sɛkɩ ɩsɩɩ ɩ́ tɩɩ ŋmɑɑkɩ tɔ.

¹²Mpʋ pǝ yelinɑ nɑ Ɩsɛɣɛlɩ nyǝ́mɑ yɑ Icipiti tɛtʋ tɑɑ sɩ pɑ́ kʋŋ kɑsɑɑlokɑ.

¹³Nɑ feŋlɑɑ sɔsɑɑ nɑ́ɑ́ cɑɑlǝɣɩ-wɛ nɑ toŋ sɩ pǝ wɛɛ sɩ pɑ́ tɛŋ pɑɑ ɩfemle nte tǝ pilikinɑɑ kɛ teitei, ɩsɩɩ too pɑɑ cɛlɑɣɑ-wɛɣɛ kɑsɑɑlokɑ kɛ kʋcɛlʋ tɔ.

¹⁴Hɑlǝnɑ feŋlɑɑ sɔsɑɑ mpɛ pɑ́ mɑkɩ sǝkpemɑ mpɑ pɑɑ kpɑwɑ Ɩsɛɣɛlɩ nyǝ́mɑ tɑɑ tɔ. Sɩ pepe tɔɔ kɛ́ nɔɔnɔɔ sɑmɑɑ ɩɩ lɑkɩ pilikinɑɑ, nɑ pǝ́ tɑkɩ ɩsɩɩ too pɑɑ sɩɩʋ tɔ.

¹⁵Ḿpʋ́ɣʋ́ feŋlɑɑ sǝkpemɑ mpɛ pɑ polɑ Icipiti wulɑʋ kiŋ sɩ pɑ hʋ́lǝ́ɣɩ́-ɩ pɑ wɑhɑlɑ nɑ pɑ́ wiinɑ-ɩ sɩ: Hɑɩ, tɑ́ cɑɑ, pepe tɔɔ kɛ́ n nɑɑsǝɣɩ-tʋɣʋ mpʋ?

¹⁶Nyǝnɩ, ɑnɩ tɑ́ mɑɣɑmɑɣɑ tǝ kʋŋnɑ tɑ́ kɑsɑɑlokɑ. Pǝyele pɑ cɑɑlǝɣɩ-tʋ sɩ tɑ́ pilikinɑɑ ɩ́ tɑɑ sɛkɩ ɩsɩɩ tɩɩ ŋmɑɑkɑɣɑ tɔ. Pǝ́cɔ́ pɑ tɔŋnɑ-tʋɣʋ mɑpʋ ntɔ. Nyɑ́ yǝlɑɑ tɔm sǝpɑɣɑ.

¹⁷Tǝnɑɣɑlɛ Icipiti wulɑʋ nɔɣɔ tǝkpɑʋ sɩ: Ɩ́ kɛ́ felentunɑɑ kpitikpitinɑɑ kɛ́, pǝ mɑɣɑmɑɣɑ pǝ tɔɔ kɛ́ ɩ́ wɑɑkǝnɑ sɩ ɩ́ puki Ɩsɔ kɛ́ kɔtɑɣɑ lɑpʋ.

¹⁸Ɩ́ kʋlɩ nɑ ɩ́ tɛɛ mǝ tǝmɑ tɑɑ. Nɔɣɔlʋ kɑɑ cɛlɑ-mɛɣɛ kɑsɑɑlokɑ kɛ fɑɑlɑɑ. Pǝyele ɩ́ kɑ́ ŋmɑ́ pilikinɑɑ kɛ teitei kɛ́ ɩsɩɩ ɩ́ tɩɩ ŋmɑɑkɩ tɔ.

¹⁹Ḿpʋ́ɣʋ́ feŋlɑɑ mpɛ pɑ lɑŋɑ́ wɑkǝlɑɑ. Mpi tɔ, pɑ heelɑ-wɛ sɩ pɑɑ ŋmɑɑkɩ pilikinɑɑ kɛ pɑɑ ɩfemle nteɣe tǝcʋŋŋ ɩsɩɩ pɑɑ sɩɩwɑ tɔ.

²⁰Mpɛ pɑ lɩɩkɑɣɑ ɩlɛ pɑ mɑɣɑnɑ Moisi nɑ Alɔŋ pɑ tɑŋɑ-wɛɣɛlɛ.

²¹Ɩlɛnɑ pɑ́ tʋʋ pɛlɛ sɩ: Ɩsɔ kɑ́ kpɑtɩ mǝ yule tɔɔ kɛ́ kpɑɑkpɑɑlɛ. Mpi tɔ, mǝ lɑpǝnɑ nɑ Icipiti wulɑʋ nɑ ɩ wɑɑlɩ nyǝ́mɑ pɑ luɣu lɩɩ-tʋ. Mǝ tekinɑ tɑ́ luɣu sɩ pɑ́ lɛntɩ.

²²Ḿpʋ́ɣʋ́ Moisi tɑsɑ Tɑcɑɑ kɛ sǝlǝmʋɣʋ tɔtɔ sɩ: Hɑɩ, Tɑcɑɑ, pepe tɔɔ kɛ́ n lɑkɩ nyɑ́ yǝlɑɑ tɑɣɑ ɩsɑɣɑtʋ? Nɑ pepe tɔɔ kɛ́ n tɩɩ tilɑ-m pɑ wɑɑlɩ?

²³Hɑtoo kʋyɑŋku mɑ heelɑ Icipiti wulɑʋ kɛ nyɑ́ tɔm tɔ, ɩ sɔɔsɑ Ɩsɛɣɛlɩ nyǝ́mɑ kɛ wɑhɑlɑ kɛ́. Pǝyele nyɑ́ sumɑ, nn lʋkɩ sɩ ń wɑɑsɩ-wɛ.