Isikel 37

2

17

33

34

36

37

¹Iawe God mukawa ne osonawo ieno, me aleupa ne wadanene alene doba nua bedewe neai bobopa nopesane winedia bedewe itunen.

²Me ne dewaneno neai sa bedeuwointa antene ewamodine, neai sa ipa uaraia ita tonapuida.

³Me ne waitaranene wanase, “E apanaida, e inseiana neai ema tonapu osowe inantopue apana segantopua rua, ba?” Ne me sipoasane wanase, “Warere Iawe God, sa e eba ateiten.”

⁴Me ne dianene wanase, “Ne gagalona wae neai ema diamoe wae waase, ‘E neai tonapu, Iawe God aiawa wadia etana.

⁵Warere Iawe God e dialedie wadiase: Ne wapo etane, ne e osowe nonau enalepo inaitana.

⁶Ne e otalepe endoendolepo badoitano ita nipala dewamope ita etela teamopa. Ne e nonau enalepo ita inaitana ita ema bedewe e ateitana ne ipa Iawe God.’”

⁷Me gagalo sa wane dianena rua neai sa mampo gagalontedine etedino neai inainantoio etamona ita ewamodino neai sa muba endoendontoiena.

⁸Ne enane ewamodino muba endoendontone badontono osouwo nipawa teamon ita etepu wisene nipau rupumon. Tane nonau bedeuwo dia.

⁹Iawe God ne dianene wanase, “E apanaida, ne aiana mampe nonau diee waase, ‘Warere Iawe God wadi wadiase: Nonau inta daitada bedewe wine ete ema bolala wineia bedewoitawo osowe inantopu.’”

¹⁰Iawe God ne dianena rua wano nonau wisene bolala bedeuwo odeno mo uduudu inantone enanawimoiena. Mo inantone enanawimoiena ewaewau sorodia uaraia ruau.

¹¹Iawe God ne mainawo wane wanase, “E apanaida, ne wapo eta, Israel apanawa mo ipa neai ema rua. Mo waiase, ‘No tonantene diaidanten mai mida inanepia rua.’

¹²Sa baiwa ne gagalona e dieena rua diamoe waase, ‘Warere Iawe God e dialedie wadiase: Ne apanana, ne e inalepe emalawoala apanawa bedeuwo wainilana otaubalepo leuitane winlena tawola Israel bedewe. Sa ipa ewaewa e bo domba bedewe wineipono wadaubalepona rua, ne e otaubalepe dewalepo osowe inaitana.

¹³E ne apanana, ne e wadaubalepo nolenuna walamawe e ateitana ne ipa Iawe God.

¹⁴Ne aleuna e bedelawo itupo osowe inaitano ita otalepo leuitane bolalawo wilena. Ne epe dewasapo e ateitana ne ipa Iawe God. Ulaipa, ne ipa Iawe God dima wadina ando ideita dewasapa!’”