1Sa Limana Zihova si hake mae koa rau, meke turaṉa vura nau sa Maqomaqo te Zihova meke la veko au Sa pa kokorapana sa lolomo toqere; meke na siṉi ia na susuri tie sa vasina asa.
2Turaṉa ene sage gore nau Sa koari na susuri, meke dogoria rau sapu soku hola sari na susuri koasa lolomo, meke na popa hola sari susuri arini.
3Meke nanasa au Sa si arau, “Tuna na tie, vea boka toa sari susuri hire?” “Zihova Baṉara, Agoi eke mo tumae nia sapu asa,” olaṉa gua si rau.
4Meke zama mae si Asa koa rau, “Mu korokorotae la koari na susuri hire, mamu zama la guahe koa rini, ‘Susuri popa mia, mi avosia sa zinama te Zihova!
5Hiera gua si zama nia e Zihova sa Baṉara koari na susuri hire: Na siniṉo si kote va nuquru atu nia Rau koa gamu, meke kote toa pule si gamu.
6Kote va soto ni gamu masa na ruruata Arau meke va poko ni gamu kapu; kote va nuquru atu nia Rau sa siniṉo koa gamu meke kote toa pule si gamu. Pude mi tumae nia sapu Arau tugo se Zihova.’ ”
7Ke korokorotae si arau gua sapu ta garunu nia rau. Meke totoso korokorotae arau si avosia rau sa vevehe, na qaletoro, na rizu sari na susuri meke vari hodae, susuri la pa susuri.
8Doṉo la si arau meke vura la mo koari na susuri sari na masa na ruruata meke ta pokoe kapu, ba lopu koa i na siniṉo sari tini.
9Meke zama mae si Asa koa rau, “Korokorotae la koasa siniṉo; tuna na tie, korokorotae, mamu zama la guahe koasa, ‘Hiera gua si zama nia e Zihova sa Baṉara: Agoi na siniṉo, mu mae gua koari ka made givusu, mamu siṉo la i sari tie matedi hire pude madi toa.’ ”
10Ke korokorotae si arau gua sapu garunu nau Sa, meke nuquri mo na siniṉo sari kasa; toa gedi meke turu sage pa nene dia, na qeto minate lavata.
11Meke zama mae si Asa koa rau: “Tuna na tie, sari susuri hire si arini mo sa doduruna sa butubutu Izireli. Zama si arini, ‘Sari susuri mami si popa meke gua sapu rovea gami si lopu ta evaṉa, ke ta kumata palae mo si gami,’ gua.
12Gua ke mamu korokorotae, mamu zama la guahe koa rini: Hiera gua si zama nia e Zihova sa Baṉara: ‘Kei Qua tinoni, kote tukeli Rau sari lovu mia meke va vura gamu; meke kote turaṉa pule lani gamu Rau pa popoa Izireli.
13Meke pana tukeli Rau sari lovu mia meke va vura gamu Rau koa rini si kote tumae nia gamu, na Qua tinoni, sapu Arau tugo se Zihova.
14Kote vekoa Rau sa Maqomaqoqu pa korapa mia meke kote toa pule si gamu, meke kote va koa gamu Rau pa mia popoa soti. Mamu tumae nia sapu Arau Zihova si ele zama, meke ele taveti Rau si hire, zama vura gua si Arau Zihova.’ ”
15Kamo pule mae koa rau sa zinama te Zihova:
16“Tuna na tie, vagia keke kolu huda, mamu kuberia koasa sapu guahe, ‘Nana e Ziuda meke sari pa Izireli sapu somana koasa.’ Mamu vagi pulea si keke kolu huda, mamu kuberia koasa sapu guahe, ‘Kolu te Iparemi, nana e Zosepa meke sa doduruna sa butubutu Izireli sapu somana koa sa,’ gua.
17Vari hoda ni pude keke mo sa kolu meke pude keke si arini pa limamu agoi.
18Pana nanasa guahe sari turaṉamu koa goi, ‘Tozini gami, na sa laena sapu tavetia goi sana?’ gua,
19si mu tozini, ‘Hiera gua si zama nia e Zihova sa Baṉara: Kote vagia Rau sa kolu pa limana e Zosepa, sa kolu sapu pa limana e Iparemi, meke sari puku butubutu sapu somana koa sa, meke soto la nia koasa kolu te Ziuda, pude keke mo sa kolu huda meke pude ta evaṉae na keke mo si arini pa Limaqu Rau.’
20Taṉini pa limamu, pa kenu dia rini, sari kolu sapu ele kubekubere ni agoi,
21mamu zama la guahe koa rini, ‘Hiera gua si zama nia e Zihova sa Baṉara: Kote vagi vurani Rau sari tie Izireli koari na butubutu vasina pu la koa rini. Arau kote varigara puleni pa doduru vasidi pu koa i rini, meke turaṉa pule lani pa dia popoa soti.
22Kote va keke butubutu pulei arau si arini pa popoa Izireli meke koari na toqere pa Izireli. Kote keke baṉara mo si tadi kasa doduru meke lopu kote karua butubutu pule si arini babe ta paqaha la pa karua butubutu baṉara.
23Lopu kote va boni puleni si arini koari dia beku na kineha variva malederedi babe koari na dia vina karikari, ura Arau kote harupi koari doduru dia sinea variva hoqadi meke na kote va via i Arau. Kote Qua tinoni si arini meke Arau si kote na dia Tamasa.
24Kote baṉara ni sa Qua nabulu Devita si arini meke doduru ari kasa si kote keke mo sa dia sepati. Kote luli rini sari Qua tinarae meke kote kopu totoko ni rini sari Qua vina turu.
25Kote koa si arini koasa pepeso sapu poni nia Rau koasa Qua nabulu Zekopi, koasa popoa vasina pu koa sari tamamia. Arini meke sari tudia, meke sari koburu pu podoi ri tudia si kote koa hola ninae rane vasina, meke keke pa tutina sa Qua nabulu Devita si kote baṉara ni ninae rane ka rane.
26Kote tavetia Rau koa rini si keke vinariva egoi pa binule; na vinariva egoi sapu kote koa hola ninae rane si hie. Kote va sokirae i Arau si arini meke va soku ia sa dia butubutu, meke koa rini kote vekoa Rau sa Qua vasina hopena sapu koa hola ninae rane ka rane.
27Sa Qua vasina kokoana si kote koa koa rini; Arau si kote dia Tamasa meke arini si kote na Qua tinoni.
28Meke kote tumae nia ri na butubutu sapu Arau Zihova va madi ia sa popoa Izireli, pana koa hola koa rini sa Qua vasina hopena ninae rane ka rane.’ ”
