Duku 12:18-49

¹⁸Kɛ nɑ́kɛ́ omɑ́ɑ̀ kɛ dɔ̀: N yɑ̀mu n yóó yĩ́mɛ̀, m bo puɔ m buɔ sɑ́m̀pɔ́yɛ̀, kɛ́mɑɑ́ yɛdiɛyɛ̀ kɛ́ɑ̃nnɛ́ n diitì nɛ̀ n kpɛrɛ dɛmɔu.

¹⁹Dɛ mɔ̀nnì kɛ nɑ́kɛ́ n wɛ̃nnì kɛ dɔ̀: A mɔkɛmu tikpɑ̀tì pɛ́u, ńhompu kɛ yo nkɛ yɔ̃ nkɛ yɑ̃nku.

²⁰Kɛ̀ Kuyie nnɛ́ ò nɑ̀kɛ́ kɛ dɔ̀: Kuyɛìnkù fɔ̃́! Kɛ nyènkɛ̀ mɔ́mmɔnkɛ m bo túótɛ́ ɑ wɛ̃nnì kɛ̀ we nnɛ́ tiekɛ dɛ kó tikpɑ̀tì?

²¹Wèè wɑɑ̀ ntikpɑ̀tì o mɔ́mmuɔ nho kpɛ́í nkɛ nɛ́ í tú okpɑ̀ɑ̀tì Kuyie mborɛ̀ o kpɛrɛ mɛ dò.

²²Kɛ̀ Yesu nɑ́kɛ́ o tɑncɔ́ùmbɛ̀ kɛ dɔ̀: Dɛɛ̀ kpɛ́í nte kɛ̀ n di nɑ́ɑ́ nkɛ tú: Di bɑ́ nyĩɛ̃̀kù di bo dimu yoo di bo dɑ́ɑ́tí mù kpɛ́í.

²³Kɛ yɛ̃́ mufòmmu pɛ̃ɛ̃tɛ́mɛ̀ tidiitì kɛ̀ tikɔ̃̀ntì pɛ̃ɛ̃tɛ́ tiyɑ̀ɑ̀tì.

²⁴Wéntɛ́nɛ̀ tinɔ̀tì, tì í buɔtì, tì í kɔ̃ũ, tì í mɔkɛ yɛbuɔ, kɛ̀ Kuyie ntì piú. Díndi nɑ́kɛ di í pɛ̃ɛ̃tɛ́ sinɔɔɑ̀?

²⁵Di we mbo nɑ nɛ̀ o yɛǹtotí miɛkɛ kɛ́yíɛ́ o fòmmu kɛ̀ mùu okɛ̀?

²⁶Kɛ̀ di í yóó nɑ kɛ́dɔɔ̀ dɛ̀mɑrɛ̀ sɑ́m̀pɔ́rɛ̀, bɑ nkpɛ́í nnɛ́ te kɛ̀ di yĩɛ̃̀kù dɛtɛrɛ̀ kpɛ́í?

²⁷Wéntɛ́nɛ̀ mutepóó ndòmmɛ̀ dikpɑ́ɑ̀ miɛkɛ, mù í pĩ́ mmutɔ̃mmú, mù mɛ nyí duɔ̀kù tiyɑ̀ɑ̀tì. N nɛ́ di nɑ́ɑ́mmu kɛ̀ n tu bɑ́ Sɑdomɔɔ nɛ̀ o kpɑ̀tì diɛtì miɛkɛ, ò í dɑ̀ɑ́tí tiyɑ̀ɑ̀tì tìì wenni kɛ mù tùɔ̀kɛ.

²⁸Díndi bɛ̀ɛ̀ í tɑ̃́ kɛ̀ dɛ̀ dɛu, kɛ̀ Kuyie nsɑ̃̀rì tifɑ̃ɑ̃̀tì tìì bo yíe, kɛ nɑɑ yóó cɔ́útɛ́, dɛ̀ bo yĩ́mɛ kɛ̀ kù bɑ́ɑ́ di dɑ́tínnɛ́ tiyɑ̀ɑ̀tì?

²⁹Di bɑ́ nhɑrì kɛ wɑnti di bo nyo mmù nɛ̀ di bo nyɔ̃ mmù.

³⁰Bɛ̀ɛ̀ í tũ nKuyie mbɛɛ̀ mɔ̀kɛ dɛ kó iyɛǹtotí sɑ̃́ɑ̃̀, díndi biɛ, di mɔkɛmu di Cicɛ kòò yɛ̃́ dɛ̀ di békú dɛ̀.

³¹Petìnkɛ wɑmmúnɛ̀ Kuyie nkpɑ̀ɑ̀tìyuu kɛ̀ kù nɛ́ di duɔ́ ndɛsɔnnɛ kɛ́nɔ́ɔ́.

³²M pecɛ̃nku, di bɑ́ nyĩɛ̃̀kù kɛ tú di í sũ, kɛ yɛ̃́ di cicɛ weè dɔ́mɛ̀ kɛ di duɔ́ nho kpɑ̀ɑ̀tìyuu.

³³Fítɛ́nɛ̀ di kpɛrɛ kɛ́pɑ̃mmú bɛcĩ̀rìbɛ̀ idíítí. Yɑ́nnɛ̀ sidítídɔú sìì í yóó cɑkɛ, kɛ́ɑ̃nnɛ́ tikpɑ̀tì tìì í yóó cɑkɛ kɛ́ tì sɔ̀nnɛ kɛĩ́nkɛ̀ Kuyie mborɛ̀. Bɛyóóbɛ̀ í yóó tɔ́ɔ́nko dɛ̀, ditúù í yóó cɑ́ɑ́kɛ́ dɛ̀.

³⁴Kɛ yɛ̃́ ɑ kpɑ̀tì borɛ̀ ɑ yɛ̀mmɛ̀ dɛ mbomɛ̀.

³⁵Yinɛ̀ di nɑɑ̀kũ̀ɔ̃ kɛ̀ di fitíyì ncɔ́u,

³⁶kɛ́ndònnɛ̀ bɛtɔ̃mbɛ̀ bɛ̀ɛ̀ bɑ̀ɑ wèè bɛ̀ bɑkɛ́, ò bo nkũntinímɛ̀ mupotúòmù kɛ́bentɛ dicɑ̀ù kɛ̀ bɛ̀ɛ o kpetɛ́.

³⁷Dɛ̀ nnɑɑti bɛtɔ̃mbɛ̀ bɛ̀ɛ̀ kóò kótì bo nwɛ̃tiní kɛ sɔ̃́ mbɛ̀ wùó. N di nɑ́ɑ́ mmɔ́mmuɔ nwe ò bo ɑ̃nnɛ́ o tɔ̃nyɑ̀ɑ̀tì, kɛ́ bɛ̀ kɑ̀nnɛ kɛ́ bɛ̀ duɔ́ mmudiì.

³⁸Kòò wɛ̃tiní kɛyènkɛ̀ cuokɛ̀ yoo dikodɑkɔńnì, kɛ sɔ̃́ mbɛ̀ wùó ndɛ̀ mbɛ̀ nɑɑti.

³⁹Bɑntɛ́nɛ̀ kɛ dò nkɛ̀ tɛcĩ́ɛ̃̀tɛ̀ yiɛ̀ nyɛ̃́ oyúókù kɔ̀riní dìì mɔ̀nnì, ò bo nwúó, ò bɑ́ɑ́ yie nkòo tɑ o cĩ́ɛ̃̀tɛ̀.

⁴⁰Díndi múnkɛ nwɑ̃kɛ́nɛ̀ kɛ yɛ̃́ Onìtìbirɛ wɛ̃tinímɛ̀ di í dɑkɛ dìì mɔ̀nnì ndi.

⁴¹Kɛ̀ Piɛrii bekɛ Yesu kɛ dɔ̀: N Yiɛ̀ nhɑ nɑ́ɑ́ ndɛ kó dinɑ́ɑǹhɑ̃ntírì tíì kpɛ́ínɑ́ɑ̀ yɑ́ɑ timɔu?

⁴²Kɛ̀ ti Yiɛ̀ nhò tɛ̃̀ńnɛ́ kɛ dɔ̀: Dí ndònnɛ̀ otɔ̃ntì wèè dɔ̀ɔ̀ri dɛ̀ɛ̀ wenni kɛ ciì bɛ̀ bɑ̀nnɛ wè bɛtɔ̃mbɛ̀ kòò bo mbɛ̀ duɔ̀ mmudiì ò dò nkɛ́ mmù mbɛ̀ duɔ̀ ndìì mɔ̀nnì.

⁴³Dɛ̀ bo nɑrikɛ dɛ kóò tɔ̃ntì tɛcĩ́ɛ̃̀tɛ̀ yiɛ̀ mbo nwɛ̃tiní dìì mɔ̀nnì kɛ sɔ̃́ nho pĩ ndɛ kó mutɔ̃mmú.

⁴⁴N di nɑ́ɑ́ mɔ́mmuɔ nwe tɛcĩ́ɛ̃̀tɛ̀ yiɛ̀ mbo bɑnnɛ dɛ kóo tɔ̃ntì o kpɑ̀tì timɔu.

⁴⁵Kɛ̀ dɛ kóo tɔ̃ntì yɛ̀mmɛ̀ mɛ ndò ntɛcĩ́ɛ̃̀tɛ̀ yiɛ̀ nyí wɛ̃tiní mɛcɑ̃ɑ̃, kɛ puotì bɛtɔ̃mbɛ̀ bɛnitidɑɑbɛ̀ nɛ̀ bɛnitipòbɛ̀, kɛ nɛinɛ̀ tinɑɑ̀yɑ̃̀ɑ̃̀tì kɛ̀ bɛ̀ yo nkɛ yɔ̃̀ mmɛnɑɑ̀.

⁴⁶Tɛcĩ́ɛ̃̀tɛ̀ yiɛ̀ mbo wɛ̃tɛní dɛ kóo tɔ̃ntì í ò bɑ̀ɑ dìì yiè, ò í dɑkɛ dìì mɔ̀nnì, kóò puotí mɛdiɛ̀, nkóò dɔ̀ɔ̀ bɛ̀ dɔ̀ɔ̀rimɛ̀ bɛnitiyɛibɛ.

⁴⁷Otɔ̃ntì wèè yɛ̃́ wèè ò bɑkɛ́ ò dɔ́ dɛ̀, kɛ í dɛ̀ dɔ̀ɔ̀ri, ò bo cɔutɛ́ tiyɛ̃ĩti mɛdiɛ̀.

⁴⁸Wèè tɔ̃ntì mɛ nyí yɛ̃́ kɛ dò nhò dɔ̀ɔ̀ri dɛ̀ tu mɛyɛi, mbɛ̀ bo ò puotí kɛ̀ dɛ̀ nkɛ̃ńnì, bɛ̀ duɔ́ nwè pɛ́u bɛ̀ bo ò bekɛ pɛ́u, bɛ̀ bɑ̀nnɛ wè kɛ̀ dɛ̀ sũ bɛ̀ bo ò bekɛ kɛ̀ dɛ̀ɛ pɛ̃ɛ̃tɛ́.

⁴⁹N kɔ̀tɛní kɛ bo wetɛ muhɑ̃ɑ̃́ mmu kutenkù miɛkɛ kɛ̀ dɛ̀ nh ɔɔtí mù bo cɔ́útɛ́mɛ̀.