LUKA 12:18-49

¹⁸Ma eto, Ini hari baina kara toma: egu roge hari baina roho, badadia haida baina hagini; bena egu uma anidia bona egu ḡau iboudiai unuseni ai baina habou;

¹⁹bena laumagu baina hamaoroa, bainato “Laumagu e, emu kohu na diaḡau, laḡani momo davadia; ba laḡa ani, bavaniani, ba inuinu, ba moale”.

²⁰A Dirava ese e hereva henia, eto, Kava taumu, hari hanuaboi laumamu na emu amo baina abia oho; bena hari o haboumu kohudia na daika ese baine abi?

²¹Ena kohu e haboumu to asi ena taḡa Dirava enai tauna na unu mo heto.

²²Ia ese ena hahediba ma e hamaorodia, eto, Badina bunai na hamaoromuimu, lalomui na basie hekwarahi emui mauri dainai, dahaka bavani; eiava taumui daidiai, dahaka ba hahedokilai.

²³Mauri ese aniani e hereaiamu; bona tau-anina ese danu dabua e hereaiamu.

²⁴Galo ba haerodia: asie hadohadomu, asie taboromu, asi edia taḡa, asi edia roge; a Dirava ese e ubudiamu. Umui ese manu asio hereadiamu a?

²⁵Umui daika ena lalo-hekwarahi amo tauna anina sisina taina mo baine halataia diba?

²⁶Benaini, ina ḡau pipikina ikarana asi dibamui, haida ma o lalo hadailaimu anina be dahaka?

²⁷Herahera ba haero, ede e vara tomamu: asie ḡaukaramu, asie hatuhatumu; a lau na hamaoromuimu, Solomon mai hairaina idoinai ena namo idia ta ida asie heḡereḡere.

²⁸Benaini, tano avadia, harihari mimia, kerukeru lahi ai bae taho kau, to Dirava ese unu e hadabualai tomamu; be, ia ese umui danu basine hadabualaimui a? Abidadama maraḡi-maraḡi taumui!

²⁹Taunabunai, aniani ḡaudia basio tahu, bona lalomui basie daradara.

³⁰Badina be unu ḡau be tanobada besedia iboudiai ese e tahumu; bona Tamamui na mai dibana o dabumu ḡaudia bunu.

³¹A iena basileia ba tahua; bena unu ḡau iboudiai danu ma baine henimui.

³²Seri maraḡi e, basio gari; badina be Tamamui na basileia ihenimui moalena e moalemu.

³³Emui kohu ba ha hoi, ba hariharilai; basine moukamouka vainana bavabia. Guba kohuna, basine ore ḡauna, bavabia; unuseni ai henao tauna se raka vareaimu, bona pitopito danu se ani oremu.

³⁴Badina be emui kohu e miamu gabuna ai lalomui danu unuseni ai.

³⁵Emui rami ba hekasilai; emui kede ba sinai.

³⁶Biagudia e nariamu memerodia heḡereḡeredia ba noho: ia na headava ariana amo baine lou mai, baine pidipidi, bena iduara bae kehoa haraḡa-haraḡa.

³⁷Biagudia bainema negana ai gimadia ai baine davaridia memerodia na bae namo; na hamaoromui momokanimu, ia ese ena rami baine hekasilaia, aniani gabuna ai baine hahelaidia, bena isiaidia baine lao heni.

³⁸Malokihi ai eiava daba kahana ai bainema, unu baine davaridia toma memerodia na bae namo.

³⁹Ina na ba diba: ruma biaguna na henao tauna ena mai negana bema diba guna, ia na bema gima, bena eua ruma basinema darea.

⁴⁰Umui danu ba noho heḡaeḡae, badina be asi dibamui horana ai Taunimanima Natuna do bainema.

⁴¹Petro ese e nanadaia, eto, Lohiabada e, hari hereva heḡereḡerena be ai mo o henimaimu, eiava taunimanima iboudiai danu?

⁴²Lohiabada eto, Kohu ireḡuna tauna mai ena kamonai bona mai ena kara maoromaoro, biaguna ese e abia hidi, ena ruma baine reḡua, bona aniani negadia ai memero adia baine henidia, tauna be daika?

⁴³Biaguna bainema negana ai baine davaria unu e kara tomamu tauna na namo;

⁴⁴na hamaoromui momokanimu, ena kohu idoinai ireḡuna tauna ai baine halaoa.

⁴⁵A una kohu ireḡuna tauna lalona bema hadaia, bema toma “Biagugu vada e halahemu”, bena hesiai taudia bona hahinedia bema dadabadia, bema ani havara, bema inu havara, bona bema kekero:

⁴⁶una tau ese se laloa dinana ai bona se heḡaeḡae horana ai biaguna na baine gini dae, bena baine dapaia parara, gwau-edeede taudia ida ahuna baine henia.

⁴⁷Hesiai tauna ta biaguna ena ura dibana, to se heḡaeḡae bena ena ura se karaia, una tau na bae kwadia momo.

⁴⁸A asi dibana tauna, ena be ena kara davana korikori be hedadaba, to basie kwadia momo. Ḡau hoho e henia tauna enai ḡau hoho bae tahu; bona kohu momo ireḡudia ai e halaoa tauna enai kohu momo bae gwaurai.

⁴⁹Lau na lahi tanobada ai baina tahoa kau totona nama; ua uramu bema hururu.