Luku 12:18-49

¹⁸Nagra nezama erinte nona tagna vazina erira huna kitena, anampi maka nezane, mago'a zani'a erintegahue huno antahine.

¹⁹Anantera nagrani'agura anage hugahue, nagra rama'a kafufima nazama hania zantamina eritru huankina mni fru hu'nena tine nezane nenena musenkase hugahue hu'ne.

²⁰Hianagi ana ne'ku Anumzamo'a anage hu'ne, kagra neginagi vahe maninane! Meni kenageke frigahananki, maka'za eri atru hu'nanazana iza erigahie hu'ne?

²¹E'inahu'za zamagra'aguke nentahiza mopafi fenozmima eritru hanaza vahe'mokizmia fore huzamigahie. Hianagi Anumzamofontera e'inahu vahe'mokizmia fenozazmi omnene vahe mani'naze hugahie.

²²E'i ana agafare Jisasi'a amanage huno amagema nentaza disaipol nagara zamasmi'ne. Tamagra tmavufagura antahintahi hakare osiho. Nane'za neneta manigahune, nankukena antanita tavufa refitegahune.

²³Na'ankure tasimuma erita manizamo'a nezana ageteregeno, tavufamo'a kukenama hu'zana agaterene.

²⁴Namamofo keho, Zamagra hoza kriza nezana nogafize. Nezama erinte'za nesaza nona omne'neanagi, Anumzamo nezana nezamie. Kagra namamofona agaterenka raza vahera mani'nane.

²⁵Mago'mo tamagripintira antahintahi hakarema haniazamo'a, asimu'a osi'a erizaza hugahio?

²⁶Tamagrama ama osizama osanutma, na'a higeta mago'a zankura antahintahi hakare nehaze?

²⁷Inozamo'ma hageno amosrema neheaza keho. Zamagra mragu'za atiza kukena hatiza nontanize. Hianagi Nagra neramasamue, kini ne' Solomonima avasese ane kukena hu'neanagi, ama inazamofo mosaremo agetereno knarezantfa hu'ne.

²⁸Hianagi Anumzamo'a meni mesigeno okima eriza tevefima kresnaza inozana e'inahukna huno kukena hunezmanteanki, Osi tamentintine vahera! Anumzamo'a agetereno vahe'mota kukena huormantegosio?

²⁹Naneza neneta, nati negahune hanaza zamo'a antahintahi hakare oramino.

³⁰Na'ankure zamentinti osu vahe'mo'za anazankura tusi'za hu'za nehakaze. Hianagi tmagri, Neramafa'a atupama hanaza'zana ko antahino keno hu'ne.

³¹Hu'neanagi kotazana, Anumzamofo kumaku haketenkeno, ana miko atupama hanaza zana tamigahie.

³²Onensa sipisipi afu kevumota korora osiho. Na'ankure tamagri Nafatmimo'a, mona kuma'a muse huno tamiku hu'ne.

³³Afufeno tamia zgore atretma, zgo erita amunte omne vahe nezminkeno monafi fenozantamimo'a meno, anazamo'a monafina havizana osuno, kumzafa noseno, havi kfamo'za eri haviza osu kumapi antegahaze.

³⁴Na'ankure feno zanka'ama menenirega, anantegage kagu'a antegahane.

³⁵Kukena tamia huta, tro huta mani'neta, tavi tamia rekru hutma maniho.

³⁶Kva'zmimo arave hu nezantegati esigu kva huza manine'za, kafante eme vagre vagre nehigeza, ame hu'za anagi nentazakna huta kva huta maniho.

³⁷Kazokzo eriza vahe'mo'za, kva zmimoma esigu kva hu'za mni'nesaza vahe'mo'za muse hugahaze. Tmage hu'na neramasamue, Agra'a ana kva nemo amu'nofi nehuno, kukena'a eri atupa huteno, eri'za vahe'a hanige'za zmaza tununte mni kaginesageno, kavera agra eme zamigahie.

³⁸Kenege esio, kotu avame esio, zamunte'za kva hu'za maninesageno, eme zmagesia kazokzo eriza vahe'mo'za, muse hugahaze.

³⁹Hu'neanagi ama'nakea antahiho, mago nomofo nefama e'i knazupa kumzafa vahe'mo'za noni'a tagna vazigahaze huno antahinesuno'a, kvagrino mani'neno zmatresige'za noma'a tagna vaziza uofregahaze.

⁴⁰Tamagranena tamavu anteta kva huta maniho. Vahe'mofo Mofavremo'a, omegahie huta hanaza knafi, egahianki kva hutma maniho.

⁴¹Pita'a anage huno antahige'ne, Ramoka ama fronka kea tagrikuke nehampi, maka vaheku'ene nehane?

⁴²Anante Ramo huno, knare antahizanteti eri'zama'a erifatgo nehania ne'mofo kva'amo'a, huntenkeno mago'a eri'za vahe'a kva krinezmanteno, nezama nesaza zana kna fatgore refko huzamisia vahera iza'e?

⁴³Ana kazokzo eriza ne'mo'ma eri'zama enerino mani'nenigeno, kva'amo'ma eme kenimo'a, asomu erigahie.

⁴⁴Tamage hu'na neramasmue. Ana nera kva'amo'a huhamprintenkeno, maka zama'a kegva hugahie.

⁴⁵Hianagi ana kazokzo eri'za ne'mo agu'afi huno, kvanimo'a zaza kna maniteno egahie nehuno, agafa huno eri'zama eneriza kazokzo eri'za vene'nene, a'enene nezmaheno, nezana neneno, aka ti neno neginagi nehuno,

⁴⁶kva'amo egahie huno antahiominesia knarema esuno'a, eme aheno rutaneteno, zamentinti osu vahe'mo'za manisaza kumapi antegahie.

⁴⁷Hanki ina kazokzo eriza ne'mo'ma, kva'amofo avesizama keno antahino hu'neno, ana avesimofonte kva osuno, amagema ontesimofona rama'a zampi azeri haviza hugahie.

⁴⁸Hianagi iza'o antahino keno osu'neno, knaza erigaza hu'nesimo'a, osia knokeve erigahie. Maka vahe'ma rama'ama zminemofompintira, mago'ane rama'a ante agofetu hu'za amisazegu hugahie. Hagi izano antahimino rama'a ami'nenimofompintira, mago'ane rama'a erinaku agesa antahigahie.

⁴⁹Nagra ama mopa teve taginteku e'noe. Nagri'ma navesiana tevea rukru hanie!