BƐBAATÍBƐ̀ 3

1

2

3

4

5

6

7

8

9

10

11

12

13

14

15

16

17

18

19

20

21

¹Ntɛ ti Yiɛ̀ nKuyie ndo yóu kɛ̀ ìì botí ḿbo Isidɑyɛɛribɛ cuokɛ̀, kɛ̀ kù bo bɛ̀ yɑ̀ɑ́kɛ́, bɛmbɛ kutɔ̃nkù pɑ̀nkù kɔbɛ bɛ̀ɛ̀ do í kɔkɛ́ mudoò bɛ̀ tɑ dìì mɔ̀nnì Kɑnnɑhɑ̃ɑ̃ kɛ́dokɛ́ mù.

²Kù do dɔ́ kutɔ̃nkù pɑ̀nkù kɔbɛ bɛ̀ɛ̀ mu nyí kɔ̀tɛ dikpɑ̀nnì bɛ̀ɛ dì bɛbíímu.

³Fidisitɛ̃ɛ̃bɛ kó yɛkpɑ̀ɑ̀tìyɔ yɛnùmmù kɔbɛ mbɛ kù do yóumɛ̀ bɛɛ̀ tu Kɑnnɑhɑ̃ɑ̃ kɔbɛ bɛmɔu nɛ̀ Sidoniibɛ nɛ̀ Efiibɛ bɛ̀ɛ̀ bo Dimɑɑ kó yɛtɑ̃rɛ̀ ĩ́nkɛ̀ kɛ́túótɛ́ Bɑɑdi-Ɛdimɔɔ tɑ̃rì kɛ́tuɔkɛnɛ̀ Deboo-Amɑti.

⁴Kù do dɔ́ kɛ́ bɛ̀ yɑ̀ɑ́kɛ́mu, kɛ́yɑ̀ kɛ nsɑ̀ kɛ̀ bɛ̀ bo yie nkù do duɔ́ nkɛ̀ Mɔyiisii duɔ́ nyìì kuɔ́ bɛ yɛmbɛ̀.

⁵Mɛm̀mɛ kɛ̀ Isidɑyɛɛribɛ mbonɛ̀ Kɑnnɑhɑ̃ɑ̃ kɔbɛ nɛ̀ Etiibɛ nɛ̀ Amɔriibɛ nɛ̀ Pedisiibɛ nɛ̀ Ifiibɛ nɛ̀ Sebusiibɛ.

⁶Kɛ̀ Isidɑyɛɛribɛɛ túókɛ́ bɛ kó bɛsɑpɑ̀mbɛ̀ kɛ́puokɛ, kɛ́ bɛ̀ duɔ́ mbɛ kó bɛsɑpɑ̀mbɛ̀ kɛ̀ bɛ̀ɛ puokɛ, kɛ̀ bɛ̀ɛ fíé iwũɔ̃ bɛ bɔkɛ̀.

⁷Kɛ̀ Isidɑyɛɛribɛɛ dɔɔ̀ ti Yiɛ̀ nKuyie nyí dɔ́ dɛ̀ kɛ́ kù yóu, kɛ́nfeu iwũɔ̃ yɛbɔkɛ̀ kɛ bɑ́ɑ́ nsibɔɔtenkɑɑnìi bɛ̀ tu sì Bɑɑdi nɛ̀ Asedɑɑ.

⁸Kɛ̀ ti Yiɛ̀ nKuyie mmiɛkɛɛ bɛ̀ pɛikɛ kɛ̀ kùu bɛ̀ yóu, kɛ̀ Mɛsopotɑmii kóo kpɑ̀ɑ̀tì Kusɑ̃ɑ̃-Disɑtɑimmuu bɛ̀ nɑ kɛ́ mbɛ̀ bɑkɛ́ yɛbie nyɛ̀ni.

⁹Kɛ̀ bɛ̀ɛ kuɔ́nnɛ̀ ti Yiɛ̀ nKuyie kɛ̀ kùu bɛ̀ duɔ́nní Kɑdɛbu nɑntɛ̀ Kenɑsi birɛ Otinniyɛɛdi kòò bo bɛ̀ dɛɛtɛ́.

¹⁰Kɛ̀ Kuyie nYɑɑ́ nní nhò bonɛ̀, kòo mbɑkɛ́ Isidɑyɛɛribɛ, kɛ́kɔtɛ kɛ́dokɛ́nɛ̀ Kusɑ̃ɑ̃-Disɑtɑimmu, kɛ̀ ti Yiɛ̀ nKuyie nduɔ́ nkòo ò nɑ.

¹¹Kɛ̀ bɛ ɛì ḿbo mɛom̀pùmɛ̀ miɛkɛ kɛ dɔ̀ nyɛbie nsipísìnɑ̀ɑ̀. Kɛ̀ Kenɑsi birɛ Otinniyɛɛdii kú.

¹²Kɛ̀ Isidɑyɛɛribɛɛ wɛ̃tɛ kɛ́dɔɔ̀ ti Yiɛ̀ nKuyie nyí dɔ́ dɛ̀ kɛ̀ kùu duɔ́ nkɛ̀ Mɔɑbu kóo kpɑ̀ɑ̀tì Ekunɔɔ bo bɛ̀ dokɛ́nɛ̀.

¹³Kòo wɛ̃nnɛ́nɛ̀ Amɔniibɛ kou nɛ̀ Amɑdesii kou kɛ̀ bɛ̀ɛ do Isidɑyɛɛribɛ mudoò kɛ́ bɛ̀ nɑ, kɛ́fietɛ Sedikoo.

¹⁴Kòo mbɛ̀ bɑkɛ́ kɛ dɔ̀ yɛbie ntɛpíítɛ̀ nɛ̀ yɛ̀ni.

¹⁵Dɛ kó difɔ̃nkúò kɛ̀ bɛ̀ɛ kuɔ́nnɛ̀ ti Yiɛ̀ nKuyie nkɛ̀ kùu bɛ̀ duɔ́nní Kedɑ birɛ Eudi kòò bo bɛ̀ dɛɛtɛ́. Bɛnsɑmɛɛ botí kou do nwe kòò tu dicɑ̃̀nkurì. Kɛ̀ Isidɑyɛɛribɛɛ ò duɔ́ ndɑ̀mpóò díítí kòò bo kɔtɛ kɛ ì duɔ́ mMɔɑbu kóo kpɑ̀ɑ̀tì Ekunɔɔ.

¹⁶Kɛ̀ Eudii duɔ́ nkɛ̀ bɛ̀ɛ ò mɑ́ disiè mɛnɑtimɛ̀ mɛ̀dɛ́mɛ̀ kpɛri, kɛ̀ di okùmɛ̀ mmɑ̀nnɛ̀ mɛ́tìrì kó dikéè, kòo dì yì o kpèntɛ́nkpenkù youku, kɛ dɑ́ɑ́tí o yɑ̀ɑ̀tì.

¹⁷Mɛm̀mɛ ò kɔ̀tɛmɛ̀ kɛ́duɔ́ nyidíítí okpɑ̀ɑ̀tì Ekunɔɔ. Ekunɔɔ do tú oniticɛ̃́ɛ̃́wè nwe.

¹⁸Wè ò duɔ́ ndìì mɔ̀nnì dɑ̀mpóò díítí kɛ́deè, kɛ́wɛ̃tɛ kɛ́cíe mbɛ̀ɛ̀ do tɔní dɛ kó idíítí.

¹⁹Bɛ̀ tùɔ̀kɛ dìì mɔ̀nnì Kidikɑɑdi, sitenkɑɑnìi yɛtɑ̃́rɛ̀ kpɛsi borɛ̀, kòo bɛ̀ yóu dɛborɛ̀ kɛ́wɛ̃tɛní okpɑ̀ɑ̀tì borɛ̀ kóò nɑ̀kɛ́ kɛ dɔ̀: Okpɑ̀ɑ̀tì m mɔkɛ tìmɑtì nti tidɛ́ kpɛti kɛ bo dɑ nɑ́kɛ́. Kòo kpɑ̀ɑ̀tì duɔ́ nkòo tɔ̃mbɛ̀ɛ yɛ̀ kɛ̀ bɛ̀ nkpɑɑ́ bɛdɛ́

²⁰kɛ kɑri muyɑɑ́ nkó kudieku kùù do tú omɑ́ɑ̀ kɔku. Kɛ̀ Eudi bɛ́innɛ̀ okpɑ̀ɑ̀tì kɛ dɔ̀: N tɔní tìì nɑ́ɑǹtì ti Yiɛ̀ nKuyie nkuù tì nni nduɔnní ɑ kpɛ́í. Kòo kpɑ̀ɑ̀tìi ítɛ́ní o kɑ̀rì.

²¹Kɛ̀ Eudii pĩ́ ndisiè nɛ̀ tɛcɑ̃̀nkutɛ̀ kɛ́kpɑtɛ kɛ́kṹṹ o pɔuniɛ.

²²Kɛ̀ dìi tɑroo dimɔu nɛ̀ di bɔo kɛ̀ mɛkùɔ̀ ndì dɑ̀tínnɛ́, kɛ̀ Euu yóu kɛ̀ dì nkpɑɑ́ okpɑ̀ɑ̀tì pɔutì miɛkɛ.

²³Ò yĩ mɛmmɛ kɛ́deè kɛ́yɛ̀ difɔ̃nkúò kɛ́kpetínnɛ́ kɛ́pɑ́ɑ́ nkɛ́dɛitɛ tɛkpetíntɛ̀ kɛ́ítɛ́.

²⁴Kòo kpɑ̀ɑ̀tì tɔ̃mbɛ̀ɛ tuɔkɛní kɛ́yɑ̀ dibòrì kpetímɛ̀ kɛ pɑ́kɛ́, kɛ̀ bɛ yɛ̀mmɛ̀ ndo nhokpɑ̀ɑ̀tì bo nyɛ̃́nkúmu dɛ miɛkɛ.

²⁵Kɛ̀ bɛ̀ ncómmú kɛ́bɑɑ okpɑ̀ɑ̀tì bo kpetɛ́mɛ̀ bɑ́ ò í kpetírí, kɛ̀ dɛ̀ɛ bɛ̀ di, kɛ̀ bɛ̀ɛ túótɛ́ tɛkpetíntɛ̀ kɛ́kpetɛ́ kɛ́nsɔ̃́ nhò ku kɛ duɔ́ kɛ cɑ̃ɑ̃nko.

²⁶Bɛ̀ do cómmú dìì mɔ̀nnì kɛ bɑɑ okpɑ̀ɑ̀tì bo kpetɛ́mɛ̀, kɛ̀ Eudi cokùmu kɛ pɛ̃ɛ̃tɛ́ yɛtɑ̃́rɛ̀ kó sitenkɑɑnìi kɛ tɑ Seidɑɑ tempɛ̃.

²⁷Ò tùɔ̀koo dìì mɔ̀nnì dɛborɛ̀ kɛ́heé ditɑ̃tɛheù Efɑdɑimmu tempɛ̃ nyɛtɑ̃rɛ̀ ĩ́nkɛ̀ kɛ̀ Isidɑyɛɛribɛɛ tíí nkòo bɛ̀ nɑ̀kɛ́ kɛ dɔ̀: Ti Yiɛ̀ nKuyie ndi duɔ́mmu di dootitɔbɛ̀ Mɔɑbiibɛ, n tũnnɛnɛ̀! Ò yĩ mɛmmɛ kɛ́niitɛ́ kɛ̀ bɛ̀ɛ ò tũ̀nnɛ kɛ̀ bɛ̀ɛ do Mɔɑbiibɛ kukó nSuditɛ̃ɛ̃ tɛpurɛ, kɛ́ bɛ̀ pĩ mbɛmɔu bɑ́ òmɔù í sèńtɛ́.

²⁹Dɛ yiè kɛ̀ bɛ̀ɛ kuɔ Mɔɑbiibɛ yɛdɑkperɛ̀ nɛ̀ yɛkɔ̃m̀bɔ̀ yɛmbɛ̀ tɛkɔupípíítɛ̀ (10000) bɛ kóò mɔù í kpɑɑ́ bɑ́ òmɑ́ɑ̀ wèè fòù.

³⁰Dɛ mɔ̀nnì kɛ̀ Mɔɑbiibɛɛ bɔ́útɛ́ Isidɑyɛɛribɛ kɛ̀ dihɛì ḿbo mɛom̀pùmɛ̀ miɛkɛ kɛ dɔ̀ nyɛbie nsipísìni.

³¹Dɛ kó difɔ̃nkúò kɛ̀ Anɑti birɛ Sɑ̃nkɑɑ cɔutɛ́ Eudi, kɛ́kuɔ Fidisitɛ̃ɛ̃bɛ sikɔusìkuɔ̀ (600) nɛ̀ tɛkɑ̃̀ũ̀tɛ̀ bɛ̀ ɔ̃ɔ̃ kṹṹ tɛ̀ inɑ̀ɑ̀kɛ ìì dùɔ̀ kɛ múnkɛ dɛɛtɛ́ Isidɑyɛɛribɛ.