BƐBAATÍBƐ̀ 9

1

2

3

4

5

6

7

8

9

10

11

12

13

14

15

16

17

18

19

20

21

¹Kɛ̀ Yedubɑɑdi birɛ Abimɛdɛkii kɔtɛ Sisɛmmu o mɑnnìkù kɛ́nɑ́kɛ́ o yɔ̃ tɑ̃bɛ̀ kó kunɑɑ̀mùnkù kumɔu kɛ dɔ̀:

²Bekɛ́nɛ̀ Sisɛmmu ɛì kó bɛkótíbɛ̀ kɛ dɔ̀: Bɛ̀ dɔ́ Yedubɑɑdi bí sipísìyiekɛ̀ bo mbɛ̀ bɑkɛ́mɑ̀ɑ̀, kɛ̀ bɛ̀ dɔ́ onìtì òmɑ́ɑ̀ bo mbɛ̀ bɑkɛ́mɛ̀? Bɛ̀ nɛ́ bɑ́ɑ́ yɛ̃̀ n tumɛ̀ bɛ cĩ́ɛ̃̀tɛ̀ kou nwe!

³Kɛ̀ bɛ̀ɛ kɔtɛ kɛ́ tì nɑ̀kɛ́ Sisɛmmu ɛì kó bɛkótíbɛ̀ kɛ̀ bɛ̀ɛ tɑ̃ɑ̃tɛ́ Abimɛdɛki ò tu mɛ̀ɛ̀ kpɛ́í mbɛ kou.

⁴Kɛ̀ bɛ̀ɛ dɛitɛ Bɑɑdi-Bediti kó idíítí miɛkɛ mɛdítíbii nsipísìyiekɛ̀ kóò duɔ́, nkòo túótɛ́ dɛ kó idíítí kɛ́yietí bɛnititetìbɛ̀ nɛ̀ bɛcièmbɛ̀ kɛ̀ bɛ̀ɛ ò nɛinɛ̀.

⁵Kɛ̀ bɛ̀ɛ kɔtɛ Ofidɑɑ o cicɛ Yedubɑɑdi cĩ́ɛ̃̀tɛ̀, kɛ́kuɔ o bí sipísìyiekɛ̀ dimɔ̀nnì dìmɑ́ɑ̀ miɛkɛ, kòo sɑ́m̀pɔ́ù Yotɑmmu weè mɑ́ɑ̀ nɑ kɛ́sɔri kɛ́yentɛ́.

⁶Sisɛmmu ɛì kó bɛkótíbɛ̀ nɛ̀ dihɛì kɔbɛ nɛ̀ Bɛti-Midoo kɔbɛ kɛ̀ bɛ̀ɛ tíí nkɛ́kɔtɛ Sisɛmmu kó mutie borɛ̀ ditɑ̃rì còḿmú dɛ̀, bɛ̀ dɛ mpĩ nhAbimɛdɛki tikpɑ̀tì.

⁷Yotɑmmu tì kèè dìì mɔ̀nnì kɛ́dekɛ Kɑrisimmu tɑ̃rì, kɛ́pĩɛ̃kɛ́ nɛ̀ o wɛ̃rímú mumɔu kɛ dɔ̀: Sisɛmmu ɛì kɔbɛ, n kéntɛ́nɛ̀ kɛ̀ Kuyie ndí kéntɛ́!

⁸Dɛtie ndɛɛ̀ do yɛ̃ ndɛ̀ dɔ́ okpɑ̀ɑ̀tì, kɛ́nɑ́kɛ́ odìfíè kɛ dɔ̀: Á nti bɑkɛ́.

⁹Kɛ̀ odìfíè dɛ̀ tɛ̃̀ńnɛ́ kɛ dɔ̀: M bo yóu m bo mpɛímɛ̀ yɛbɛ kɛ̀ bɛ̀ diinɛ̀ mɛkùɔ̀ yɛbɔkɛ̀ nɛ̀ bɛnìtìbɛ̀ dɛ̀ dɔ́mɛ̀, kɛ́kɔtɛ kɛ́ntú m bɑkɛ́ dɛtiennɑɑ̀?

¹⁰Kɛ̀ dɛtie nnɑ́kɛ́ fìkíè kɛ dɔ̀: Fɔ̃́ nní nti bɑkɛ́!

¹¹Kɛ̀ fìkíè dɛ̀ tɛ̃̀ńnɛ́ kɛ dɔ̀: M bo yóu m bo mpɛímɛ̀ yɛbɛ yɛ̀ɛ̀ wɛ̀ɛ̀ti kɛ́kɔtɛ kɛ́ntú m bɑkɛ́ dɛtiennɑɑ̀?

¹²Kɛ̀ dɛ̀ɛ sɔɔtɛ́ kɛ́nɑ́kɛ́ fínyĩ̀ kɛ dɔ̀: Fɔ̃́ ntũ nní nti bɑkɛ́.

¹³Kɛ̀ fínyĩ̀ĩ dɛ̀ tɛ̃̀ńnɛ́ kɛ dɔ̀: M bo yóu m bo mpɛímɛ̀ yɛbɛ mɛnɑɑ̀ kpɛyɛ yɛbɔkɛ̀ nɛ̀ bɛnìtìbɛ̀ dɛ̀ dɔ́mɛ̀, kɛ́kɔtɛ kɛ́ntú m bɑkɛ́ dɛtiennɑɑ̀?

¹⁴Kɛ̀ dɛtie nyóu kɛ́wɛ̃nnɛ́ kɛ́nɑ́kɛ́ tipotì kɛ dɔ̀: Fɔ̃́ nni nti bɑkɛ́!

¹⁵Kɛ̀ tipotìi dɛ̀ tɛ̃̀ńnɛ́ kɛ dɔ̀: Kɛ̀ di mɛ̀nkɛ dɔ́mu m bo ntúmɛ̀ di kóo kpɑ̀ɑ̀tì kɔtɛnɛ̀ní kɛ́ndíɛ́kɛ́ n kó mɛdɛ́ɛ̀. Kɛ̀ di mɛ nyetɛ muhɑ̃ɑ̃́ mbo yɛ̀nní m miɛkɛ kɛ́ di cɔ́u nkɛ́tɑunnɛ̀ dɛtie ndiɛrɛ̀ ditɑ̃rì Dimɑɑ kpɛrɛ.

¹⁶Kɛ̀ Yotɑmmu nsɔkɛ́ o nɑ́ɑǹtì kɛ́bɛ́i nkɛ dɔ̀: Díndi tɑ́? Di yɛ̀mmɛ̀ í di bekùnɛ̀ di pĩ̀ḿmɛ̀ Abimɛdɛki tikpɑ̀tɑ̀ɑ̀? Di dɔ̀ɔ̀ dɛ̀ Yedubɑɑdi cĩ́ɛ̃̀tɛ̀ dɛ̀ wennimɑɑ̀? Ò di dɔ̀ɔ̀ mɛ̀ɛ̀ sɑ̀ɑ̀ ndi mɛ nhò yietɑ́ɑ̀?

¹⁷N cicɛ do cĩ̀nnɛ o buu ndi kɛ́kpɑ ndi kpɛ́í nkɛ di dɛɛtɛ́ nɛ̀ Mɑndiyɑ̃ɑ̃bɛ.

¹⁸Kɛ̀ di nɛ́ ìtɛ́ yíe nkɛ dokùnɛ̀ o cĩ́ɛ̃̀tɛ̀ kɛ kùɔ o bí sipísìyiekɛ̀ dimɔ̀nnì dìmɑ́ɑ̀ kɛ pĩ nho pocɛ̃mbirɛ Abimɛdɛki tikpɑ̀tì ò tu mɛ̀ɛ̀ kpɛ́í ndi kou.

¹⁹Kɛ̀ di yɛ̀mmɛ̀ í di bekùnnɛ̀ di dɔ̀ɔ̀ dɛ̀ Yedubɑɑdi nɛ̀ o cĩ́ɛ̃̀tɛ̀ dɛ kpɛ́í ndí yɑ̀ Abimɛdɛki kó mɛsɑ̀ɑ̀ nkòo yɑ̀ di kɔ̃mɛ.

²⁰Kɛ̀ mɛɛ̀ dɔkɛ Abimɛdɛkii tuɔ nSisɛmmu ɛì kɔbɛ nɛ̀ Bɛti-Midoo kɔbɛ muhɑ̃ɑ̃́ nkɛ̀ bɛ̀ múnkɛɛ ò tùɔ mmuhɑ̃ɑ̃́.

²¹Dɛ kó difɔ̃nkúò kɛ̀ Yotɑmmuu cokɛ́ kɛ́kɔtɛ kɛ́nsɔri Bedɑɑ, ò do dé o tebitɛ Abimɛdɛki nwe.

²²Mɛm̀mɛ kɛ̀ Abimɛdɛki mbɑkɛ́ Isidɑyɛɛribɛ kɛ dɔ̀ yɛbie nyɛ̀tɑ̃ɑ̃ti.

²³Dɛ kó difɔ̃nkúò kɛ̀ Kuyie nduɔnní mɛyɛ̀mmɛ̀ mɛ̀ɛ̀ bo nte kɛ̀ Sisɛmmu ɛì kó bɛkótíbɛ̀ nɛ̀ Abimɛdɛki kɛ̀ bɛ̀ɛ sĩntɛ, mɛm̀mɛ kɛ̀ bɛ̀ɛ yetɛ Abimɛdɛki kpɛti.

²⁴Yedubɑɑdi bí sipísìyiekɛ̀ Abimɛdɛki do kùɔ ì kó kusĩ̀nkù kuù ò tùɔ̀kɛní wenwe nɛ̀ Sisɛmmu ɛì kɔbɛ. Kɛ yɛ̃́ bɛɛ̀ do ò teennɛ̀mɛ̀ kòo bɛ̀ kùɔ.

²⁵Mɛm̀mɛ kɛ̀ Sisɛmmu ɛì kɔbɛɛ sɔri kɛ́hoo mbɛnìtìbɛ̀ ditɑ̃rì ĩ́nkɛ̀ kɛ̀ bɛ̀ ndimmù bɛ̀ɛ̀ pɛ̃nkù dɛborɛ̀ kɛ fekù bɛ kpɛrɛ kɛ̀ Abimɛdɛkii tì kèè.

²⁶Diyiè mɑrì kɛ̀ Ebɛɛdi birɛ Kɑɑdi tuɔkɛní Sisɛmmu kɛ nɛínɛ̀ o tebìí. Kɛ̀ Sisɛmmu ɛì kɔbɛ bɛmɔu ò duɔ́ mbɛ yɛ̀mmɛ̀,

²⁷kɛ́nkũɔ̃tì bɛ pɑɑ, kɛ́tɔ̃ũ fínyĩ̀ kó yɛbɛ, bɛ̀ dɔ̀ɔ̀rinɛ̀ yɛ̀ mɛnɑɑ̀, kɛ yɛ̀ nìú kɛ́dɔɔ̀ dibɑnni, kɛ́kɔtɛ bɛ kó dibɔɔ̀ tou kɛ́nyo nkɛ yɔ̃̀ nkɛ sɑ̃́ɑ̃́ nhAbimɛdɛki.

²⁸Dɛ mɔ̀nnì kɛ̀ Ebɛɛdi birɛ Kɑɑdi bɛ̀ bekɛ kɛ dɔ̀: Abimɛdɛki tu we kɛ̀ weè bo mbɑkɛ́ Sisɛmmu kɛ̀ ti ò bùɔ́? Yedubɑɑdi birɛ nɛ̀ o ɑ̃ɑ̃pɔ̀nkótì Sebuudi bɛɛ̀ dò nkɛ́mbúɔ́, Amɔɔ ɛì kɔbɛ bɛɛ̀ te Sisɛmmu, ti bo nhò bùɔ́ bɑ nkpɛ́í?

²⁹Kɛ̀ Ebɛɛri birɛ Kɑɑrii sɔɔtɛ́ kɛ dɔ̀: Kɛ̀ Sisɛmmu ɛì kɔbɛ do bo yie nkɛ́ n tũnnɛ n nɑ mbɔ nhAbimɛdɛki, n nɑ nhò nɑ̀kɛ́ kɛ dɔ̀: Fɔ̃́ nnɛ̀ ɑ ɑ̃ɑ̃pɔ̀mbɛ̀ bɑ́ɑ́tínɛ̀ kɛ̀ ti kpɑ!

³⁰Sebuudi weè do tú dɛ kó dihɛì kóo kùmɑ̀ndɑ́ɑ̀, kɛ́keè Ebɛɛdi birɛ Kɑɑdi nɑ̀ɑ́ ntì kɛ̀ dɛ̀ɛ ò yonkɛ.

³¹Kòò tɔ̃ mbɛnìtìbɛ̀ disɔ̀rì kɛ̀ bɛ̀ɛ nɑ́kɛ́ Abimɛdɛki Ebɛɛdi birɛ Kɑɑdi tùɔ̀kɛnímɛ̀ kɛ sukii bɛnìtìbɛ̀ kɛ̀ bɛ̀ bo ò bɔ.

³²Kòo yíɛ́ kòo nùù dɔ̀ nɛ̀ dɛ kpɛ́í nwèe ítɛ́ kɛyènkɛ̀ nɛ̀ o kó bɛnìtìbɛ̀ kɛ́kɔtɛ dikpɑ́ɑ̀ kɛ́nhokɛ.

³³Kɛ̀ bɛ̀ɛ pikɛ yɛ̀ dikṹnweńnì sɛ̀ì kɛ́do dihɛì, kɛ̀ bɛ̀ yɛ̀nní kɛ bo ò dokɛ́nɛ̀ wèe bɛ̀ dɔ̀ɔ̀ ò dɔ́mɛ̀.

³⁴Mɛm̀mɛ Abimɛdɛki nɛ̀ o kɔbɛ kɛ̀ bɛ̀ɛ ítɛ́ kɛyènkɛ̀ kɛ́totɛ́ yɛtĩ̀rɛ̀ yɛ̀nɑ̀ɑ̀, kɛ́kɔtɛ kɛ́nhokɛ kɛ tɔ́kɛ́nɛ̀ Sisɛmmu.

³⁵Ebɛɛdi birɛ Kɑɑdi yɛ̀nní dìì mɔ̀nnì nɛ̀ o kɔbɛ, kɛ cómmɔ́ɔ dihɛì kó dibòrì, Abimɛdɛki nɛ̀ o kɔbɛ kɛ̀ bɛ̀ɛ ootɛní.

³⁶Kɑɑdi yɑ̀ dìì mɔ̀nnì ditĩ̀nnì kɛ́nɑ́kɛ́ Sebuudi kɛ dɔ̀: Dihɑ̃ɑ̃pɔ̀ntĩ̀nnì mɑrì diì cutiní ditɑ̃rì kɛ̀ Sebuudii ò tɛ̃̀ńnɛ́ kɛ dɔ̀: Ditɑ̃rì fènkù nku ɑ wúómmɛ̀ kɛ tú bɛnìtìbɛ̀.

³⁷Kɛ̀ Kɑɑdi nyetíróo kɛ tú, bɛnìtìbɛ̀ mbɛ kɛ̀ bɛ̀ cutiní ditɑ̃rì kɛ̀ bɛtɔbɛ̀ kèríní Mubɔɔtie mbíɛ́kɛ̀.

³⁸Kɛ̀ Sebuudii ò tɛ̃̀ńnɛ́ kɛ dɔ̀: Fɔ̃́ɔ̃̀ bɑɑ do nɑ́ɑ́ nkɛ tú Abimɛdɛki tu we kɛ̀ weè bo nti bɑkɑ́ɑ̀? A do sènkɛ̀rì wè weè tùɔ̀kɛní nɛ̀ o nìtìbɛ̀. Kɔtɛ kóò dokɛ́nɛ̀.

³⁹Mɛm̀mɛ kɛ̀ Kɑɑdi bɑ́ɑ́tí kɛ́niitɛ́ Sisɛmmu ɛì kɔbɛ kɛ̀ bɛ̀ bo dokɛ́nɛ̀ Abimɛdɛki.

⁴⁰Kɛ̀ Abimɛdɛki mbɛ bɛ̀tì kɛ̀ bɛ̀ɛ cokɛ́ kòo mbɛ̀ kɔ̀ùtì kɛ bií kɑ̃́ɑ̃́ ndihɛì kó dibòrì.

⁴¹Mɛm̀mɛ kòo mbo Adumɑ kɛ̀ Sebuudi bɛ̀ti Kɑɑdi nɛ̀ o kɔbɛ bɑ́ bɛ̀ í nnɑ kɛ́mbo Sisɛmmu.

⁴²Kɛ̀ dɛ̀ɛ wentɛ́ kɛ̀ Sisɛmmu ɛì kɔbɛɛ yɛ̀ kɛ bo dokɛ́nɛ̀ Abimɛdɛki.

⁴³Kòo tì kèè kɛ́túótɛ́ o nìtìbɛ̀ kɛ́ bɛ̀ totɛ́ yɛtĩ̀rɛ̀ yɛ̀tɑ̃ɑ̃ti kɛ̀ bɛ̀ɛ kɔtɛ kɛ́nhokɛ, kɛ̀ bɛ̀ nyɛtìní dihɛì kɛ̀ bɛ̀ɛ bɛ̀ potɛ́.

⁴⁴Abimɛdɛki nɛ̀ o kɔbɛ kɛ̀ bɛ̀ɛ cɑ̃rikɛ kɛ́bɑɑ dihɛì kó dibòrì kɛ̀ yɛtĩ̀rɛ̀ tɛyɛ̀ yɛ̀dɛ́ɛ̀ yɛ̀ɛ̀ kpɑɑ́, kɛ̀ yɛnyɛ mɛ ntó puotì dikpɑ́ɑ̀ kɔbɛ kɛ kɔù.

⁴⁵Kɛ̀ Abimɛdɛki ntṹṹ kɛ́nkuuri dihɛì kɛ́ di pɔ̀ntɛ pɑ́íí kɛ́kuɔ di nìtìbɛ̀, kɛ́deè kɛ́ dì yɑɑ́ mukɔ́kúɔ́.

⁴⁶Mikidɑdi Sisɛmmu ɛì kɔbɛ tì kèè dìì mɔ̀nnì kɛ́kɔtɛ kɛ́tɑ dibɔɔ̀ Ɛdi-Bediti tɑ̃dènkù.

⁴⁷Kɛ̀ bɛ̀ɛ nɑ́kɛ́ Abimɛdɛki Mikidɑdi-Sisɛmmu ɛì kɔbɛ tìímmɛ̀ dɛborɛ̀.

⁴⁸Kòo túótɛ́ o pĩɛ̃tɛ̀ kɛ́dekɛ Sɑdimɔɔ tɑ̃rì, kɛ́kɔ̃ṹ kudɔú kɛ́buutɛ́, kɛ́nɑ́kɛ́ o nìtìbɛ̀ kɛ dɔ̀: Dɔɔ̀nɛ̀ n dɔ̀ɔ̀mɛ̀.

⁴⁹Bɑ́ wè kòo kɔ̃ṹ kudɔú kɛ́buutɛ́ kóò tũnnɛ kɛ̀ bɛ̀ɛ kɔtɛ kɛ́ ì còú mbɛ̀ bo kùù tɑ̃dènkù kɛ́cɔ́u nkɛ̀ dɛ̀ɛ cɔ́útɛ́ bɛ̀ɛ̀ bo dɛ miɛkɛ. Bɛ̀ bo ntùɔ̀kɛ tɛkɔupíítɛ̀ (1000), bɛnitidɑɑbɛ̀ nɛ̀ bɛnitipòbɛ̀.

⁵⁰Dɛ kó difɔ̃nkúò kɛ̀ Abimɛdɛkii kɔtɛ kɛ́do Tebɛsi ɛì kɔbɛ kɛ́ bɛ̀ nɑ kɛ́ dì fìètɛ.

⁵¹Ditou kperì mɑrì diì do bo dɛ kó dihɛì cuokɛ̀, kɛ mummu kɛ̀ bɛ̀ɛ di kpetínnɛ́ kɛ́dekɛ kudɑ̀nkù, bɛnìtìbɛ̀ bɛmɔu, bɛhɛikɛ̀nkótíbɛ̀ nɛ̀ bɛnitidɑɑbɛ̀ nɛ̀ bɛnitipòbɛ̀.

⁵²Kɛ̀ Abimɛdɛkii kɔtoo kɛ bo bɛ̀ pi, kɛ́tɔ́ɔ́nko ditou kó dibòrì borɛ̀ kɛ bo dì cɔ́u.

⁵³Dɛndɛ onitipòkù mɔù bɔntɛ́nímɛ̀ dinɑ̀ɑ̀ kɛ́bɔ́tɛ́ o yuu kɛ́pɔntɛ.

⁵⁴Mɛm̀mɛ Abimɛdɛki pɛ́immɛ̀ odɑpɑ̀ɑ̀ nwèè tɔ o kpɑ̀rìnɛntì kɛ dɔ̀: Kpɑtɛ ɑ siè kɛ́ n kuɔ bɛ̀ yɑ̀ɑ̀ bo nnɑ́ɑ́ nkɛ tú onitipòkù weè n kùɔ. Kòo kóo tɔ̃ntìi ò kũ̀ṹ disiè kòo kú.

⁵⁵Isidɑyɛɛribɛ yɑ̀ dìì mɔ̀nnì Abimɛdɛki kumɛ̀ bɑ́ wè kòo kò nho cĩ́ɛ̃̀tɛ̀.

⁵⁶Mɛm̀mɛ Kuyie nyietímɛ̀ Abimɛdɛki mɛyɛi nhò dɔ̀ɔ̀mɛ̀ o cicɛ kɛ kùɔ o tebìí sipísìyiekɛ̀.

⁵⁷Sisɛmmu ɛì kɔbɛ kó kuyonku kpɛ́í ndo te kɛ̀ bɛ̀ɛ yɑ̀ mɛyɛi nYedubɑɑdi birɛ Yotɑmmu do yɛ̃ mmɛ̀ɛ̀ yóó bɛ̀ tùɔ̀kɛní, dɛmɔu kɛ̀ dɛ̀ɛ bɛ̀ tùɔ̀kɛní.