1मिनु परमप्रभु यावेमी इस्राएली आन कली नाक्चा, दे रागी रागी ङा मुर इस्राएली आन ङोंइती रे मखेरशो बाक्माक्त। मेना इस्राएली आन नक पाला ङा मुरपुकीम कनान रागीम लडाइ पचा आ पर्बम मारेइ मतुइश्शो बाक्मा बाक्त। न्यायाधीस २:२२
2मोदेंशो मारेइ मतुइक्ब इस्राएली आन कली दोपा लडाइ पचा, दे शेंचा कली परमप्रभुमी अर्को जात ङा मुर आन कली वोइश्शो बाक्माक्त।
3मेको तेको तेको जात बाक्मा बाक्त देंशा हना, ५ जना हुकुम पाइब पलिस्ती, कनानी नेल्ले, सीदोन ङा मुर नेल्ले नु बाल-हेरमोन डांडा रे लाइश्शा, लेबानोन ङा पहाडम लेबो-हमाथ सम्म बाक्ब हिव्वीपुकी बाक्मा बाक्त। यहोसु १३:३
4मिनु परमप्रभु यावेमी इस्राएली आन किकी पिपीम मोसा कली गेशो शेंतीके मेकोपुकीमी पाइनीमी कों मपाइनीमी, दे नाक्चा कली मेको अर्को जात ङा मुर आन कली बाक्चा गेवा बाक्त।
5मोपा इस्राएलीपुकी कनानी, हित्ती, एमोरी, परिज्जी, हिव्वी नु यबुसी आन दातेमी बाक्शो बाक्मा बाक्त।
6मिनु मेकोपुकीमी मेको आन तमीपुकी ग्युंबे पा चाक्गमे बाक्त। मिनु आंम तमीपुकी यो मेको आन तौ आन कली ग्युंबे पा गेमे बाक्त। मिनु मेकोपुकीमी मेको आन देवी देवता आन कली यो मार मार चढ़ेशा ठेयब सेल्मे बाक्त। ब्यवस्था ७:३
7इस्राएलीपुकीमी परमप्रभु यावे आ ङोंइती मार मरिम्शो बाक्मे, मेको पामे बाक्त। मेकोपुकीमी परमप्रभु यावे, आन परमप्रभु कली प्रेंदमे बाक्त। मिनु बाल नु अशेराह देवी आस कली ठेयब सेल्मे बाक्त।
8मिनु परमप्रभु यावेमी इस्राएली आन कली तशा गाइक्ता बाक्त। मिनु मेसोपोटामीया ङा अराम-नहाराइम ङा पिप कुशन-रिशातैम आ गुइमी लेयङा बाक्त। मेकोम इस्राएली आन कली ८ बर्स सम्म सासन पवा बाक्त।
9मिनु इस्राएलीपुकीमी “वारच पाइय्यीकी” दे परमप्रभु यावे कली थोव़मेनु, इस्राएली आन कली प्रोंइचा, दे केनाज आ तौ ओथ्नीएल कली सोइक्ता बाक्त। मेको कालेब आ लोक्ब बाक्त। मिनु मेकोमी मेको आन कली प्रोना बाक्त। न्यायाधीस १:१३; यहोसु १५:१७-१८
10परमप्रभु यावे आ सोक्त मेको तार जाक्माक्त। मिनु मेकोमी इस्राएली आन कली निसाफ पवा बाक्त। मिनु मेकोमी लडाइ पचा गोवा बाक्त। मिनु परमप्रभु यावेमी मेसोपोटामीया ङा पिप कुशन-रिशातैम कली ओथ्नीएल आ गुइम गेवा बाक्त। मोपा ओथ्नीएलमी मेको पिप कली ग्रामाक्त। न्यायाधीस ६:३४
11केनाज आ तौ ओथ्नीएल मबेक्म सम्म मेको रागी ४० बर्स सम्म लडाइ रे नांइसे बाक्त।
12मिनु इस्राएलीपुकीमी लेंशा परमप्रभु यावे आ ङोंइती मार मरिम्शो बाक्मे, मेको पामे बाक्त। मिनु मेको आन मरिम्शो पशो आ पर्बम परमप्रभु यावेमी मोआब ङा पिप एग्लोन कली इस्राएली क्येङा बोल्यो सेला बाक्त।
13मिनु एग्लोनमी अम्मोनी नु अमालेक ङा मुर आन कली लडाइ पचा कली खुप्तीमी बाक्त। मिनु इस्राएली नु लडाइ पचा गोव़मे बाक्त। मिनु खजूर रवा बाक्शो सहर आंम के सेल्मे बाक्त। न्यायाधीस १:३६
14इस्राएलीपुकी १८ बर्स सम्म मोआब ङा पिप एग्लोन आ सासनमी बाक्मा बाक्त।
15मिनु इस्राएलीपुकीमी लेंशा “वारच पाइक्की” दे परमप्रभु यावे कली थोव़मेनु, परमप्रभु यावेमी इस्राएली आन कली श्येत रे प्रोंइचा कली बेन्यामीन आ थर ङा गेरा आ तौ एहूद कली सोइक्ता बाक्त। मेको पेरा गुइम गेय पाइब बाक्त। मिनु इस्राएलीपुकीमी मेको कली मोआब ङा पिप एग्लोन आ बाक्तीकेम तिरो थाप्थ सोइक्तमे बाक्त।
16मिनु एहूदमी आंम कली कुबीत का लाइश्शो निक्शी गे हेश्शो क्योरतीक पाइश्शो तरवार का सेल्शा, आ वा आगामी ग्युरा गे ख्रुइश्शा पिप्शा कुरा बाक्त। कुबीत का ०,५ मिटर कि ठेयब हात का खोदेंशो बाक्ब।
17मिनु नोले मेकोमी तिरो कुरब लाइश्शा, मोआब ङा पिप एग्लोन आ बाक्तीके लमाक्त। एग्लोन साप्पा दोम्शो मुर का बाक्माक्त।
18मिनु मेकोमी तिरो नेल्ल पोक्शा, कुरब मुर नु गाक्माक्त।
19एहूद चहिं गिल्गाल आ नेक्था बाक्शो फुल्लु के मूर्ति आन बाक्तीक रे लेश्शा, पिप कली “पिप, गो इन कली ख्रुइश्शा लोव़ का पचा माल्नुङ” देंमाक्त। मिनु पिप एग्लोनम “सिक्सी पने” दे आ नेक्था बाक्ब नेल्ल आन कली लाङगा सोइक्तीमी बाक्त।
20मिनु मेको पिप आ दरवार ङा तला तारी सितल कोठामी बाक्शो बाक्माक्त। मिनु एहूद मेको आ ङोंइती जाक्शा “परमप्रभु रे पा गो इन कली लोव़ का देंचा माल्नुङ” देंमाक्त।
21मिनु एग्लोन आ नित्तीके रे बोक्शा राम्माक्त। मिनु एहूदमी आ पेरा गुइमी आ ग्युरा गे बाक्शो तरवार ग्रुंइशा, मेको पिप आ कोव़जमी तूदा बाक्त। २सामुएल २०:९-१०
22मेको तरवार आ ग्याइक्तीक सम्म ओव़माक्त। मिनु कोव़ज ङा बोंसोम मेको तरवार नेल्ल सुमा बाक्त। मिनु पिप आ कोव़ज रे ख्री ग्रूमाक्त। मिनु एहूदमी तरवार मग्रुंइथु, प्रोंइशा वोदा बाक्त।
23मिनु तला तारी ङा कोठा ङा लाप्चो चोक्शा, एग्लोन कली आगाम चोक्शा, सांचो पाइश्शा वोइश्शा, लाङगा ग्रूमाक्त।
24मिनु ग्रूने थुमा नोले, एग्लोन आ गेय पाइब जाक्मा बाक्त। मिनु लाप्चो चोक्शो तशा “पिप ङाइश्शा बाक्म कों” दे मिम्तमे बाक्त।
25मेकोपुकी शुश सम्म रिम्स ङा रिम्स बाक्शा, मुने यो पामे बाक्त। तन्न पिपमी तला तारी ङा कोठा ङा लाप्चो यो मरोक्गा बाक्त। मोपतीके मेकोपुकीमी सांचो चाक्शा, लाप्चो रोक्गमे बाक्त। मिनु आन पिप कली खपीम गोल्शा बेक्शो तामे बाक्त।
26मोपा मेकोपुकीमी शुश रिम्शा बाक्मानु, एहूद प्रोक्ने थुम्शो बाक्माक्त। मेको फुल्लु के मूर्ति आन बाक्तीक लाक्शा सेइरा माइक्तीकेमी जाक्दीम्माक्त।
27मिनु एफ्राइम ङा पहाड रागीम जाक्दीम नोले, मेकेर रे मेकोमी तुराही तबा बाक्त। मिनु इस्राएली मेको नु पहाड रे तोइश्शा, आ नोले खोदमे बाक्त।
28एहूदमी “आं नोले खोतीन। मारदे हना परमप्रभु यावेमी इन जोरी सत्रु मोआबी आन कली इन गुइमी गेशो बाक्ब” दे माइक्मी बाक्त। मोपतीके आ नोनोले तोइश्शा यिमा बाक्त। मिनु मोआबी मप्रोक्मल, दे मेको आ नेक्था ङा यर्दन खोला शोक्तीके आन के सेल्मे बाक्त। मिनु सुइ आन कली मेक रे शोक्चा मगेमे बाक्त।
29मेको नाक्ती १० हजार खोदेंशो मोआबी आन कली सदमे बाक्त। मेको नेल्ल बोल्यो लडाइ पाइब बाक्मा बाक्त। मेको का यो प्रोक्चा मतामे बाक्त।
30मोपा मेको नाक्ती रे इस्राएलीम मोआबी आन कली हुकुम पामे बाक्त। मिनु मेको रागी ८० बर्स सम्म लडाइ रे नांइसे बाक्त।
31एहूद आ नोले अनाथ आ तौ शाम्गार इस्राएली आन निसाफ पाइब दुम्माक्त। मेकोमी ब्यफ वाक्तीक हरीसमी ६ सहे पलिस्ती आन कली तुप्शा साइक्मी बाक्त। मेकोमी यो इस्राएली आन कली आन जोरी सत्रु रे प्रोंइमी बाक्त। न्यायाधीस ५:६
