Soukapwüng 3

1

2

3

4

5

6

7

8

9

10

11

12

13

14

15

16

17

18

19

20

21

¹Iwe, ewe Samol mi Lapalap a likiti ekoch mwü lon ewe fanü pwe epwe sotuni chon Israel rer, chokewe resap mwo eti maun fän eu lon Kanaan.

²Popun chök an likitiir pwe epwe aiti ngeni ekewe pilon aramasen Israel wiwiin maun, fokun ngeni chokewe resap eti maun me lom.

³Ikkei ir chon ekewe mwü mi nonometiu: ekewe limman samolun Filistia me ekewe chon Kanaan meinisin, ekewe chon Siton me chon Hiw mi nom won ewe chuk Lepanon, seni ewe chuk Paal-hermon tori ewe al a ale ngeni Hamat.

⁴Chon ekei mwü ra chök nonometiu pwe chon Israel repwe sosot rer, pwe epwe pwä ika ra aleasochisi än ewe Samol mi Lapalap kewe allük Moses a ngeni ar kewe lewo.

⁵Iei mine ekewe aramasen Israel ra nonom lein ekewe chon Kanaan, chon Hit, chon Amor, chon Peris, chon Hiw me chon Jepus.

⁶Iwe, ekewe chon Israel ra angei nöür kewe föpwül pwe pwülüer, nge ra apwüpwülüa nöür föpwül ngeni nöün chon ekewe mwü alüal, ra pwal fel ngeni ar kewe kot.

⁷Iwe, ekewe chon Israel ra manlükala ewe Samol mi Lapalap ar we Kot. Ra föri mine a ngau me fän mesan o fel ngeni ekewe anü Paal me Astarot.

⁸Iei mine ewe Samol mi Lapalap a song ngeni ekewe chon Israel o asechirela ngeni Kusan-risataim ewe kingen Mesopotamia. Iwe, ekewe aramasen Israel ra angang ngeni Kusan-risataim lon ükükün walu ier.

⁹Nge lupwen ekewe aramasen Israel ra siö ngeni ewe Samol mi Lapalap, a filätä eman chon amanau fän iter, pwe epwe amanaueer. Iwe, iten ätei Otniel nöün Kenas we mwän, nge Kenas pwin Kalep kükün.

¹⁰Iwe, Ngünün ewe Samol mi Lapalap a feitiu won Otniel pwe a soukapwüngün Israel. A feila maun, nge ewe Samol mi Lapalap a atolonga Kusan-risataim ewe kingen Mesopotamia fän nemenian, pwe a akufu.

¹¹Iei mine a wor kinamwe lon ewe fanü lon ükükün faik ier. Mürin, Otniel nöün Kenas we mwän a mäla.

¹²Iwe, ekewe aramasen Israel ra pwal förisefäli mine a ngau me fän mesen ewe Samol mi Lapalap. Iei mine ewe Samol mi Lapalap a apöchöküla Eklon ewe kingen Moap, pwe a ü ngeni chon Israel.

¹³Eklon a amwichato ren ekewe chon Amon me chon Amalek. Ra feila maun ngeni chon Israel o akufuur. Ra liapeni ewe telinimw Jeriko, ia a wor irä palm ie.

¹⁴Iwe, ekewe aramasen Israel ra angang ngeni Eklon ewe kingen Moap lon ükükün engol me walu ier.

¹⁵Mürin, ekewe aramasen Israel ra siö ngeni ewe Samol mi Lapalap, nge i a filätä eman chon amanau fän iter itan Ehut nöün Kera we mwän, eman re Peniamin. Nge Ehut eman tamöng. Iwe, ekewe aramasen Israel ra tini ngeni Ehut ar takises ngeni Eklon ewe kingen Moap.

¹⁶Nge Ehut a föri fän itan efoch ketilas mi ken me rüepek ükükün langataman eu esop fiit o rietä won pelifichin wänükün me fän üfan.

¹⁷Mürin a uwala ngeni Eklon ewe kingen Moap ewe takises. Nge Eklon eman mwän mi fokun kitinup.

¹⁸Iwe, lupwen Ehut a wes me ngeni Eklon ewe takises, a tinala ekewe aramas mi wisen uwei ewe takises, pwe repwe liwinla.

¹⁹Püsi i a pwal etiir tori ekewe fau mi fal arun Kilkal. Mürin a kul o liwiniti Eklon. Iwe, a üreni Eklon, “Mi wor eu pworaus monomon ngonuk king.” Mürin, ewe king a üreni nöün kewe chon angang pwe repwe towu. Iwe, ir meinisin ra towu seni fän mesan.

²⁰Iwe, Ehut a kan ngeni ewe king, lupwen i chök a mot lon rumwan mi apatapat won ewe imw o üreni, “Mi wor eu pworaus fän itom seni Kot.” Iwe, ewe king a ütä seni lenian.

²¹Mürin Ehut a angetiu won pöüimöngün, a angei nöün ketilas seni won pelifichin wänükün o posu ngeni luken ewe king.

²²Iwe, pachen ewe ketilas a kokolong, pwe ewe kiris a pwölüela ewe ketilas, pun Ehut esap üttawu ewe ketilas me lon luken Eklon. Iwe, limengauan a towu.

²³Mürin, Ehut a towu seni ewe rumwen won, a apüngala ekewe asam o lokuniir.

²⁴Iwe, mürin än Ehut feila, ekewe chon angang ra feito. Nge lupwen ra küna pwe asamen ewe rumwen won ra lok, ra ekieki pwe a feila lon ewe lenien ngasala lon rumwan mi apatapat.

²⁵Iwe, ra witiwit fansoun langatam tori resap chüen silei met repwe ekieki. Nge lupwen ewe king esap fokun suki ekewe asam, ra angei ki o sukiir. Iwe, ra küna pwe ar samol a kon lon ewe rum, nge a mäla.

²⁶Lupwen ekewe chon angang ra witiwit, Ehut a süla, a pwerela pekilan ekewe fau mi fal o süla tori Seira.

²⁷Nge lupwen a tori won chukuchukutän ewe fanü Efraim, a ettiki ewe rappwa pwe ekewe re Israel repwe mwicheto ren, pwe repwe maun. Mürin, ra etatiu Ehut seni won ewe fanü mi chukuchukutä, nge i a akom mwer.

²⁸Iwe, a üreniir, “Oupwe tapweto müri, pun ewe Samol mi Lapalapa atolonga ekewe chon Moap mi oputakemi fän nemeniemi.” Iei mine ra tapwetiu mürin o liapeni ekewe petepeeten ewe chanpupu Jortan, ia ekewe chon Moap ra pwepwer ie. Iwe, resap mwüt ngeni eman aramas pwe epwe pwerela pekila.

²⁹Lon ewe fansoun ra niela ina epwe ükükün engol ngeröü sounfiun Moap, ir meinisin mwän mi pöchökül o inisöch. Esap wor eman a tongeni süla.

³⁰Iwe, lon ena rän Moap a tolong fän nemenien Israel, nge a wor kinamwe lon ewe fanü Israel lon ükükün walik ier.

³¹Mürin Ehut, Samkar nöün Anat we mwän a filitä. Iwe, i a amanaua chon Israel ren an niela ükükün wonopükü chon Filistia ren efoch wichiwichin kow.