1. Samueloskero 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Sar o Filišťinci zaile le Devleskeri Archa, preľigende la andral o Eben-Ezer andro foros Ašdod.

²Paľis la ľigende andro chramos ke lengero del Dagon a thode la paš leste.

³Sar o Ašdoďana sig tosara ušťile pro dujto džives, arakhle le Dagon čhides tele pre phuv angle Devleskeri Archa. Avke ile le Dagon a thode les pale pre peskero than.

⁴Sar pre aver džives sig tosara ušťile, o Dagon sas pale čhido tele angle RAJESKERI Archa. Leskero šero the soduj vasta sas phagerde pre phuv paš o vudar a ačhiľa leske ča o ťelos.

⁵Vašoda dži adadžives le Dagonoskere rašaja a savore, ko ode phiren andre leskero chramos, na uštaren pre oda than.

⁶O RAJ igen marelas le Ašdoďanen a dukhavelas len the lengere gava le vredenca (vredenca).

⁷Sar o manuša andral o Ašdod dikhle, so pes ačhel, phende: “Le Izraeloskeri Devleskeri Archa ade našťi ačhel, bo peskere vasteha amen igen marel the amare devles le Dagon.”

⁸Zvičinde ke peste savore Filišťinike vodcen a phučle lendar: “So keraha le Izraelitengera Devleskera Archaha?” On odphende: “Ľidžan la andro foros Gat!” Avke la preľigende.

⁹Ale sar la preľigende, o RAJ peskera zoraha mukľa pre oda foros ajsi bari balamuta (zmetkos), hoj na džanenas, so te kerel. Marelas len le vredenca, či sas terno vaj phuro.

¹⁰Avke bičhade le Devleskeri Archa andro Ekron. Sar ode avle o manuša andral o Ekron, zvičinde: “Ande ke amende le Izraelitengeri Devleskeri Archa, hoj te murdarel amen the amare manušen.”

¹¹Avke dine te vičinel savore Filišťinike vodcen a phende: “Bičhaven pale kadi Izraelitengeri Devleskeri Archa pre lakero than, hoj te na murdarel amen the amare manušen.” Bo šunenas zorales pre peste le Devleskero vast a calo foros sas andro meribnaskeri dar.

¹²Ola, save na mule, sas dukhade le vredenca. O vičiňiben ole foroskero sas šundo dži andro ňebos.