1Pal varesavo časos o David ňerinďa (zviťazinďa) upral o Filišťinci a iľa lendar o foros Gat le pašutne gavenca.
2O David ňerinďa the upral o Moabčana. On pes leske poddine a počinenas leske o daňe.
3Paľis ňerinďa the upral o Hadad-Ezer, o kraľis andre phuv Coba, paš o Chamat akor, sar peske džalas te zalel o phuva paš o paňi Eufrat.
4O David zaiľa lestar ezeros (1 000) verdana, efta ezera (7 000) muršen pro graja the 20 000 slugaďen. Mukľa peske lendar ča šel (100) grajen le verdanenca a olenge, save ačhile, diňa te phagel o pindre.
5Sar avle o Aramejčana andral o Damaskus te pomožinel le Hadad-Ezeroske, o David murdarďa lendar 22 000 muršen.
6Paľis o David diňa te rozačhavel slugaďen andro Damaskus. Avke o Aramejčana pes poddine le Davidoske a počinkerenas leske o daňe. O RAJ pomožinelas le Davidoske te ňerinel všadzik, kaj džalas.
7O David iľa o somnakune šťiti, so hordinenas le Hadad-Ezeroskere veľiťeľa, a odľigenďa len andro Jeruzalem.
8Andral le Hadad-Ezeroskere fori Tibchat the Kun o David skidňa igen but brondzos. Paľis o Šalamun diňa lestar te kerel e igen bari nadrža, o slupi the o sersamos prekal o Chramos.
9Sar o kraľis Tou andral o Chamat šunďa, hoj o David ňerinďa upral caľi armada le Hadad-Ezeroskeri andral e Coba,
10bičhaďa peskere čhas le Hadoram ko kraľis David, hoj leske te phenel: “Smirom tuke! Av bachtalo, bo ňerinďal upral o Hadad-Ezer.” A bičhaďa leske somnakune, rupune the brondzune veci. O kraľis Tou ada kerďa, bo the ov sas andro mariben le Hadad-Ezeroha.
11Ole veci o kraľis David sentňarďa le RAJESKE jekhetane le rupoha the le somnakaha, so iľa avre narodendar: le Edomčanendar, Moabčanendar, Ammončanendar, Filišťinendar the Amalekendar.
12O Abišaj, čhavo la Cerujakero, ňerinďa andre Lonďi Dolina upral o 18 000 Edomčana.
13Rozačhaďa peskere slugaďen andro tabora pal calo Edom a savore Edomčana pes le Davidoske poddine. O RAJ pomožinelas le Davidoske te ňerinel všadzik, kaj džalas.
14O David kraľinelas upral calo Izrael a sas pačivalo the čačipnaskero ke dojekh manuš.
15O Joab, la Cerujakero čhavo, sas veľiťeľis upral e armada; o Jošafat, le Achiludoskero čhavo, sas nekbareder pisaris;
16o Cadok, le Achituboskero čhavo, the o Abimelech, le Ebjataroskero čhavo, sas rašaja; o Šavša sas pisaris;
17o Benajah, le Jehojadoskero čhavo, sas veľiťeľis le Kereťanenge the le Pileťanenge, save stražinelas le kraľis. Le Davidoskere čhave sas nekbareder uradňika le kraľiske.
