1Pre aver berš jarone, andro časos, sar o kraľa džanas andro mariben, o Joab džalas la armadaha pro Ammončana a zňičinďa lengeri phuv, ale o David ačhiľa andro Jeruzalem. Paľis o Joab džalas pro foros Rabba a zňičinďa les.
2Avke o David iľa e koruna pal o šero lengere devleske, so pes vičinelas Milkom. Odi koruna sas phari buter sar tranda (30) kili a sas andre the dragano bar, so thode andre koruna le Davidoskeri. Andral oda foros o David zaiľa igen but veci.
3Le manušen, save ode bešenas, odarik odľigenďa a thoďa len andre buči, hoj te keren le pilenca, krompačenca the le toverenca. Avke kerďa the savore Ammonike forenca. Paľis o David savore manušenca geľa pale andro Jeruzalem.
4Paloda sas pale o mariben le Filišťinenca andro Gezer. Akor o Sibbechaj andral e Chuša murdarďa le Saf, savo sas andral e fajta Rafah. Avke thode tele le Filišťinen.
5Paľis andre aver mariben le Filišťinenca o Elchanan, le Jairoskero čhavo, murdarďa le Lachmi, le Golijašiskere phrales andral o Gat. O kašt le Golijašiskera kopijatar sas ajso thulo sar o kašt le strojoskero, pre savo pes kerel o pochtana.
6Andre aver mariben, so sas paš o Gat, sas igen učo murš, saves sas bišuštar (24) angušta. Sas les pro vasta the pro pindre po šov angušta. The ov sas andral e fajta Rafah.
7Ale sar asalas avri le Izraeliten, murdarďa les o Jonatan, le Šimeoskero čhavo, savo sas phral le Davidoske.
8O David the leskere murša murdarde kale trine muršen andral e fajta Rafah andral o foros Gat.
