1O David pes zgeľa savore veľiťeľenca upral o ezeros the upral o šel slugaďa a vakerelas lenca, hoj les te den goďi.
2Phenďa savore Izraelitenge, save sas ode zgele: “Te san vaš kada a te hin oda le RAJESTAR, amare Devlestar, akor bičhavas le muršen ke amare phrala andre savore Izraeloskere phuva, the ko rašaja the Leviti andre lengere fori the gava, hoj te aven ke amende.
3A anaha ke amende e Zmluvakeri Archa amare Devleskeri, bo na džalas amenge pal late, sar kraľinelas o Saul.”
4Savore priačhile pre oda, so o David phenďa, bo oda sas dojekheske pre dzeka.
5Avke o David ke peste zvičinďa savore Izraeliten le Egiptske paňestar Šichor pro juhos dži paš o Lebo-Chamat pro severos, hoj te anen le Devleskeri Archa andral o Kirjat-Jearim.
6Paľis o David the savore Izraeliti gele andro Baala (oda hino Kirjat-Jearim) andre Judsko, hoj odarik te len e Archa le Devleskeri, savi pes vičinel pal o RAJ, savo bešel upral o cherubi.
7Preľigenas le Devleskeri Archa andral Abinadaboskero kher pro nevo verdan, so ľidžanas o Uzzah the o Achijo.
8O David the savore Izraeliti khelenas the giľavenas anglo Del caľa peskera zoraha a bašavenas pro citari, harfi, bubni, cimbali the trubi.
9Sar avle ko Kidonoskero humnos, o Uzzah nacirdľa o vast ke Archa, hoj la te zachudel a te na perel, bo le guruvenge podgele o pindre.
10Takoj o RAJ choľisaľiľa pro Uzzah a murdarďa les, bo nacirdľa o vast pre Archa. Ode pro than muľa anglo Del.
11O David rušelas, hoj o RAJ demaďa a murdarďa le Uzzah andre choľi, vašoda pes vičinel oda than dži adadžives Perec-Uzzah.
12Oda džives o David daranďiľa le Devlestar a phenďa: “Sar ľigenava ke mande le Devleskeri Archa?”
13Avke o David na diňa te ľidžal e Archa ke peste andro Jeruzalem, ale ľigenďa la andro kher ko Obed-Edom, savo sas andral o Gat.
14Le Devleskeri Archa ačhiľa trin čhon andro kher ko Obed-Edom a o RAJ požehňinelas caľa leskera famelija the savoro, so les sas.
