1 Cronica 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Mibpekidlalag si David te menge upisyal zin, he menge peremandar te linibu wey ǥinatus he menge sundaru zin.

²Ne migkeǥiyan din is tivuuk he keet-etawan te Israel, “Emun egkesuat kew wey iyan daan egkesuatan te Nengazen he Megbevayè tew, ibpetudtulan tew is langun he menge zuma tew seled te tivuuk he Israel, apil en is menge memumuhat wey is menge Levihanen he zuma zan dutun te menge inged dan wey menge penebtavà dan. Ibpehendini tew sikandan wey zan mekepekidsevaha kenitew.

³Timpu en heini he egkuwaan tew kes Kavan te Kebpekid-uyun te Megbevayè tew, su wazè tew heini seǥipaa hein iyan pa hadì si Saul.”

⁴Mibpemineg dutun is tivuuk he meǥinged su neehè dan he iyan haazà hustu he ebeelan dan.

⁵Umbe, miburunburun ni David is langun he menge Israilihanen, ebpuun diyà te Wahig he Shihor ziyà te Ehipto taman te Lebo Hamat, te kegkuwa te Kavan te Kebpekid-uyun te Megbevayà diyà te Kiriat Jearim.

⁶Midhendiyà si David wey is menge Israilihanen diyà te Baala ziyà te Juda (he iyan is Kiriat Jearim). Ne migkuwa zan dutun sikan is Kavan te Nengazen he Megbevayà. Ne zutun is Nengazen te teliwazà te menge kirubin he zutun te zivavew te Kavan.

⁷Migkuwa zan haazà is Kavan te Kebpekid-uyun te Megbevayà diyà te valey ni Abinadab ne in-untud dan te veǥu he kerumata. Si Uza wey si Ahio is migiya zutun te kerumata.

⁸Midsilibra si David wey is langun he menge Israilihanen diyà te etuvangan te Megbevayà te tivuuk dan he zesen. Nemenganta zan wey midtukar te menge alpa, lira, tamburin, simbal, wey trumpita.

⁹Hein nekeuma zan duen te gunasà ni Kidon, migewezan ni Uza haazà is Kavan, su nekezulas is menge vaka.

¹⁰Utew nepauk dutun is Nengazen ki Uza tenged dutun te migewezan din haazà is Kavan. Umbe minatey sikandin dutun te etuvangan te Megbevayà.

¹¹Nepauk si David su midsilutan te Nengazen si Uza tenged te kegkepauk din. Umbe taman guntaan ne iyan inngazan dutun he lugar is Perez Uza.

¹²Nahandek si David te Megbevayà te haazà he andew, ne nekekaǥi sikandin te, “Ebmenmenuwen en be he meuwit heini is Kavan te Kebpekid-uyun te Megbevayà diyà te inged ku?”

¹³Ne zutun neisip din he kenè din en ed-uwiten diyà te inged din haazà is Kavan. Diyè din itaǥak haazà te valey ni Obed Edom he tig-Gat.

¹⁴Diyà heini te valey ni Obed Edom itaǥù seled te tetelu he vulan, ne midtuvazan te Nengazen is pemilya zin wey is langun he azen din.