1मिनु बोरब ओख्ती मसुप्शो शोब्ले जतीक पास्सा चाड जाक्चशो बाक्माक्त।
2मिनु ठेयब चढ़ेब नु सास्त्रीपुकीमी “येसु कली दोपा ग्याइश्शा साइक्चा?” दे लोव़ पमुशा, साइक्चा माल्मे बाक्त। तन्न शुश मुरुमी येसु आ लोव़ नेंशो तशा, हिंमा बाक्त। लूका २०:१९
3मिनु सैतान इस्कारीयोत ङा यहूदा आ थुंम ओव़माक्त। मेको शेंसीब आन दाते ङा का बाक्माक्त। यूहन्ना १३:२,२७
4मिनु मेको ठेयब चढ़ेब नु ठेयब मुर आन कली ग्रुम्थ लशा “येसु ग्याइक्पाइक्चा कली वारच पाइनन्नी” दे माइक्मी बाक्त।
5मिनु मेकोपुकीमी ग्येरशा “दुम्ब, ग्याइक्चा वारच पाप्तीवी हना, क्येट गेनीकी” देंमा बाक्त।
6में ङा मेरे यहूदामी “सुइमी मतुइक्थु, दोपा ग्याइक्पदु?” दे मिम्शा बाक्माक्त।
7मिनु बोरब ओख्ती मसुप्शो शोब्ले जची चाड जाक्माक्त। मेको नाक्ती पाठा का क्योरचा माल्बाक्माक्त। प्रस्थान १२:१८-२०
8मिनु येसुमी पत्रुस नु यूहन्ना आस कली “पास्सा चाड ङा भोज साथ लसे” दे माइक्सी बाक्त।
9मिनु मेको निक्शीमी “ते लशा साचा?” दे हिल्लो पाम्से बाक्त।
10मिनु येसुमी “नेनीसे, मुल सहर लसे। सहरम जाक्दीस्सीनु, गाग्री कुरशा ब्वाक्कु दिथ पिशो मुर का ग्रुम्नीसी।
11मेको आ नोले खोइश्शा, तेको खिं ओव़बा, मेको खिं ओव़ङीसे। मिनु खिं ङा मुर कली ‘शेंबमी सोइश्शो नस्कु। शेंबमी, आ शेंसीबपुकी नु काथा बाक्शा, पास्सा ते मानेचा? दे हिल्लो पथ सोइक्ताक्स्की’ दे मतीसे।
12मो माइक्सीनु, मेकोमी इस कली तला तारी ठेयब कोठा का कोंइब। मेको कोठामी गुन्द्री पीरा ब्रशा वोइश्शो थित्नीसी। मिनु मेकेरन साचा” दे सोइक्तीम्सी बाक्त।
13मिनु लसानु, येसुमी दोदेंशो देंमे, मोदेंशो थित्से बाक्त। मिनु पास्सा चाड ङा भोज सादसे बाक्त। लूका १९:३२
14मिनु भोज जचा कली येसु नु आ शेंसीबपुकी जथ निस्समा बाक्त।
15मिनु जचामेनु, येसुमी “गो श्येत गेचा पुंइसीचा क्येङा ङोंइती गेपुकी नु काथा बाक्शा, एको पास्सा मानेशा जत दाक्ती।
16मारदे हना परमप्रभु यावे आ राज्य पशो मतांइसे सम्म लेंशा गेपुकी नु काथा बाक्शा, पास्सा मानेचा मताइनुङ” देंमाक्त। लूका १३:२९
17मिनु कचौरा शेशा “गे रिम्शो पाइब बाक्नीनी” दे प्रार्थना पशा “ताक्शा, का का पा तूङीन।
18मुल ङा मेरे एको अङगुर रस मतूनुङ। परमप्रभु यावेमी राज्य पशो तांइसे नोले ला तूनुङ, दे इन कली देंनुङ” देंमाक्त।
19मिनु शोब्ले शेशा “गे रिम्शो पाइब बाक्नीनी” दे प्रार्थना पा, जिक्शा योक्शा “एको आं रां बाक्ब। इन कली गेतन्नी। आं कली मिम्शा जने” दे शोब्ले जपाइक्मी बाक्त। १कोरिन्थी ११:२३-२५
20मिनु जशा, कचौरा शेशा “एको तूनीनु, आं हुश चढ़ेशो मिम्तीने। आं हुशेमी परमप्रभु यावे आ गेशो नक कबल खाप्ता। आं हुश जारशोमी शुश मुर आन पाप क्याम्सीब।
21नेनीने, आं कली ग्याइक्ब आन कली वारच पाइब का गोपुकी नु काथा बाक्शो बाक्ब। यूहन्ना १३:२१-२२
22रागीम जरमेशो कली साइ मोदेंशो दुम्चा माल्ब देंशो लोव़ नेल्ल थमा दुम्चा माल्त हना यो, ग्याइक्ब आन कली वारच पाइब कली शुश मरिम्शो दुम्ब” देंमाक्त।
23मिनु शेंसीबपुकीमी येसु आ लोव़ नेंशा “मोदेंशो पाइब सु बाक्म माइ?” दे लोव़सी पमुचा गोव़मे बाक्त।
24मिनु लोव़सी पस ङा पस बाक्मानु “गो इं दातेम नेल्ल क्येङा ठेयब सु बाक्या माइ?” दे जिचा पोक्ग्मे बाक्त। मत्ती २०:२५-२८; मर्कूस १०:४२-४५; लूका ९:४६
25मिनु येसुमी “अर्को रागी ङा पिपपुकीमी इन कली हुकुम पाइनीम। मिनु मुरपुकीमी मेको आन कली मान पा ठेयब सेल्नीम।
26गेपुकी चहिं मेको आन पशो खोदेंशो पा ठेयब दुम्चा ममालीने। नेल्ल क्येङा ठेयबमी आइक्च सुंइसीशा, नेल्ल आन कली वारच पवल।
27मान पा खमे योक्गमेनु, जाइब मुर आन कली मान पा ठेयब सेल्नीम। ख्रेप्ब मुर चहिं आइक्च दुम्ब। गो इन कली ख्रेप्ब मुर खोदेंशो दुम्शा गेय पाता। यूहन्ना १३:४-१४
28आं कली थुं थाम्मेनु, वारच पाइब गे ननी। यूहन्ना ६:६७-६८
29आं आफोमी आ राज्यमी हुकुम पाइब सेल्ती। मिनु गो इन कली काथा वोइश्शा, हुकुम पाइब सेल्नन्नी।
30आं राज्यमी गो नु काथा बाक्शा, जचा तूचा ताइनीनी। मिनु इं इस्राएल ङा १२ थर आन कली निसाफ पाइनीनी” दे माइक्मी बाक्त। मत्ती १९:२८
31मिनु प्रभुमी सिमोन पत्रुस कली “ए सिमोन, नेनो। सैतानमी गे इ कली चेरब खोदेंशो पा क्राप्चा गेयीनी, दे पुंइशो बाक्ब। २कोरिन्थी २:११
32गो चहिं इ पर्बम परमप्रभु यावे कली ‘पत्रुस कली थमा सुइक्चा प्रोंइपाइक्चा मगेने’ दे पुंइता। गे नोले थमा पा इ थुं परमप्रभु यावे गे लेश्शा थमा सुइक्नेवे। मिनु थमा सुइक्ब आन कली ‘थमा सुइक्चा मप्रोनीन’ दे आन थुं बारपतो” दे अर्ती गेवा बाक्त। यूहन्ना १७:११,१५
33मिनु पत्रुसमी “प्रभु, इन कली जेल्खानम चोक्तेक्म हना, गो यो चोक्सीनुङ। इन कली साइक्तेक्म हना, इन कली मप्रोंइथु, गो यो साइक्चा पुंइसीनुङ” देंमाक्त।
34मिनु येसुमी “पत्रुस, दीसा सुनी भाले ग्रीचा क्येङा ङोंइती खेयप सां ‘गो मेको कली मतुइक्नुङ, सु बाक्मे?’ देंनेवे” देंमाक्त।
35मिनु शेंसीब नेल्ल आन कली “गोमी इन कली क्येट, झोला, जुत्ता, मारेइ मकुरथु, परमप्रभु यावे आ राज्य ङा लोव़ शेंथ सोइक्तन्नीनु, जचा फेक्चा मतनी ङा?” देंमेनु “मार माल्का, मेको नेल्ल थित्तक, ताइतक” देंमा बाक्त। लूका ९:३; लूका १०:४
36मिनु येसुमी “मुल क्येट बाक्त हना, क्येट कुरीन। झोला बाक्त हना, झोला कुरीन। तरवार मबाक्त हना, फेक्शो वा लेयशा यो ग्याप्शा कुरचा माल्ब।
37आं पर्बम ब्रेक्पाइश्शो लोव़ नेल्ल थमा दुम्चाप्तु। मार ब्रेक्शो बाक्ब देंशा हना ‘मरिम्शो पाइब सुइश्शा, दोस गेनीम’ दे ब्रेक्शो बाक्ब। आं पर्बम ब्रेक्शो लोव़ नेल्ल थमा दुम्चा माल्ब” देंमाक्त। यसैया ५३:१२
38मिनु शेंसीबपुकीमी “प्रभु, गोपुकी नु तरवार निक्शी बाक्त” देंमानु “मोशो बाक्त हना दुम्त, लो गाक्य” देंमाक्त।
39मिनु मेकेर रे गाक्शा, ङोंइती ङा खोदेंशो पा जैतून डांडा जाक्दीम्माक्त। आ शेंसीबपुकीमी आ नोले खोदमे बाक्त।
40मिनु मेकेर जाक्दीम्मानु, येसुमी आ शेंसीब आन कली “थुं थाम्चा पुंइसीनीनु, पाप मपय, दे प्रार्थना पने” दे माइक्मी बाक्त।
41मिनु आन बाक्तीक आ ता एरे लशा, पोक्च थेक्शा
42“आं आफ, इन दाक्शो बाक्त हना, एको कचौरा आं कली मतूपाइक्थु लतीने। तन्न आं पुंइशो मदुम्ल, इन दाक्शो दुम्ल” दे पुना बाक्त। मत्ती ६:१०
43मिनु परमप्रभु यावे आ स्वर्ग ङा गेय पाइब का ग्रूशा, येसु कली बोल गेवा बाक्त।
44मिनु लेंशा आ थुं खाइश्शा पुना बाक्त। आ थुं खाइश्शा पुनानु, आ पस्ना हुश खोदेंशो दुम्शा खपीम दोक्माक्त।
45मिनु लेश्शा शेंसीब आन बाक्तीकेम जाक्मेनु, मेको आन कली यो आन थुं खाइश्शा इप्शा बाक्शो थिम्मी बाक्त।
46मिनु “मारदे इम्नी? बोक्कीन, थुं थाम्चा पुंइसीनीनु, पाप मपय, दे प्रार्थना पने” दे पोक्मी बाक्त।
47मिनु शुश मुर फो फु ग्रूमा बाक्त। मेको आन कली येसु आ शेंसीब यहूदामी लां कोंइशा चाक्शो बाक्माक्त। मिनु जाक्शा, यहूदामी येसु कली पुक्पु पचा कली आ ङोंइती जाक्माक्त।
48तन्न येसुमी “यहूदा, गे रागीम जरमेशो कली वारच दुम्खु पा पुक्पु पा ग्याइक्पाइक्नेवे?” देंमाक्त।
49मिनु शेंसीबपुकीमी “ग्याइक्थ जाक्मा बाक्त” दे तुइश्शा “प्रभु, एको आन कली तरवारम क्योरशा खेदा पचा?” देंमानु
50कामी तरवार ग्रि शोइश्शा, ठेयब चढ़ेब आ गेय पाइब आ ग्युरा नोफा ख्रोदा बाक्त।
51येसुमी मेको ख्रोइश्शो तशा “दुम्त मपने” दे नोफा सेस सेला बाक्त।
52मिनु येसुमी मेकेर जाक्शो ठेयब चढ़ेब, परमप्रभु यावे आ खिं ङा ठेयब मुर नु जोक्ब तुइक्ब खाल्पा आन कली “तरवार कोक्के कुरशा, खुइ पाइब कली ग्याइक्थ जाक्शो खोदेंशो पा आं कली ग्याइक्थ जाक्नी?
53नाक्त किंत किंत परमप्रभु यावे आ खिंमी गेपुकी नु काथा बाक्ङानु, मग्याइक्तीनी। मुल चहिं छिङछिङ ङा सक्ति नु इन पालो जाक्त” दे माइक्मी बाक्त। यूहन्ना ७:३०; यूहन्ना ८:२०
54मिनु येसु कली ग्याइश्शा लाइश्शा, नेल्ल क्येङा ठेयब चढ़ेब आ खिंमी ओंइदमे बाक्त। पत्रुस यो ङोन रे कोव़ना कोव़न लमाक्त।
55मेको खिं ङा लाङगाम मुर खुम्सीशा, मी थेरशा बाक्मा बाक्त। पत्रुस जाक्दीश्शा, मेकोपुकी नु मी थेरशा बाक्माक्त।
56मिनु मेकेर गेय पाइब मीश मुर कामी पत्रुस कली मी थेरशो तशा, मिक्च मयाक्थु कोव़शा “एको मुर मेरे नु काथा गाक्ब का बाक्त, है” देंमेनु
57“मार लोव़ पवी? गो येसु कली मतुइक्नुङ, सु बाक्मे?” देंमाक्त।
58मिनु याम का नोले मेकेर बाक्ब कामी “मेरे नु काथा गाक्ब का गे नवे” देंमेनु “हत्तै गो मनङ” देंमाक्त।
59मिनु घन्टा का नोले अर्कोमी यो “मेरे नु काथा गाक्ब का एकोन बाक्ब। मारदे हना एको यो गालील ङा बाक्ब” देंमाक्त।
60मिनु पत्रुसमी “गो इ देंशो मरुबु” देंमाक्त। मो देंमेनुन, भाले ग्रीमाक्त।
61मिनु प्रभुमी पत्रुस गे हिरशा, मिक्च मयाक्थु कोव़ङा बाक्त। मिनु पत्रुसमी “सुनी कना भाले ग्रीचा ङोंइती खेयप सां ‘मेको कली मतुइक्नुङ, सु बाक्मे’ देंनेवे” देंशो प्रभु आ लोव़ ति फ्रुक्गा बाक्त।
62मिनु ग्रूशा शुश ङाक्माक्त। भजन संग्रह ५१:१९
63चढ़ेब आ खिंमी चहिं मार पामे बाक्त देंशा हना, येसु कली आ मिक्चीम वाम फ्रेंशा तुप्शा
64“इ कली सुमी तुप्मे? लो देन” दे तुप्स ङा तुप्स पामे बाक्त।
65तुप्स ङा तुप्स पा, तोक्शा लोव़ पा शुश श्येत गेमे बाक्त।
66मिनु सुनी जोक्ब तुइक्ब खाल्पापुकीमी ठेयब चढ़ेब नु सास्त्री आन कली खुप्शा कछडी बाक्मा बाक्त। मिनु येसु कली मेकेर चाक्शा राप्पदमे बाक्त।
67मिनु “गे ख्रीस्त नवे हना, ख्रीस्त नङ देनो” देंमा बाक्त। यूहन्ना ३:१२
68मिनु येसुमी “गो ख्रीस्त नङ देंती हना, गे थमा मसुइक्नीनी। इन कली लोव़ का हिल्लो पाता हना, आं लोव़ मलेत्नीनी।
69तन्न लोव़ का ‘मुल रागीम जरमेशो परमप्रभु यावे आ ग्युरा गे बाक्चा ताइब’ ” दे माइक्मी बाक्त। भजन संग्रह १००:१
70मिनु मेकोपुकीमी “मो हना गे परमप्रभु यावे आ तौ नवे?” देंमानु “परमप्रभु यावे आ तौ नवे, दे गेन देंतीनी” देंमाक्त।
71मिनु मेकोपुकीमी “मार सांकछी माल्दा ङा? आ देंशो नेंतय। आंम आ देंशोमी दोस ताइब दुम्त” देंमुमा बाक्त।
