1मिनु आ दीसा सुनी कना बोक्शा, मराक्ब ओख्ती लाइश्शा, पुक्खीमी जाक्दीम्मा बाक्त।
2मिनु पुक्खी सुशो फुल्लु रोक्शो तशा,
3ओव़शा कोव़ङमेनु, येसु आ रां मबाक्माक्त।
4मिनु मबाक्शो तशा “ओदेंशो मार दुम्मे?” दे छक लाक्मानु, झिल झिल पाइश्शो वा फेक्शो मुर निक्शी फो फु ग्रूशो तामे बाक्त।
5मेको आस कली तशा, हिंशा कोव़ने मचाप्थु, खुम्की पा बाम्मा बाक्त।
6मिनु मेको निक्शीमी “मारदे सेस मुर कली बेक्शो मुर वोइक्तीकेमी माल्नीनी? एकेर मबा, सेंसीचा पुंइसाक्व। गालील रागीम काथा बाक्नीनु, इन कली मार शेंदा, मेको ममिम्तीनी?
7‘रागीम जरमेशो पापी आन गुइमी जिम्मा गेने पुंइसीशा, शीम क्याइश्शा कांटी थोक्शा साइक्चा पुंइसीब। मिनु बेक्शो आ नित्थ नाक्ती बेक्शो रे सेंसीब’ दे शेशो प्रेंदीनी ङा?” देंसा बाक्त। लूका ९:२२
8मिनु येसु आ लोव़ ति फ्रुक्ग्मे बाक्त।
9मिनु मेकेर रे लशा, येसु आ शेंसीब ११ जना नु आ वारच नेल्ल आन कली तुइक्पदमे बाक्त।
10मेको मो दुम्शो ताइब मीश मुर सु सु बाक्मा बाक्त देंशा हना, माग्दाला ङा मरीयम, योअन्ना नु याकूब आ ममा मरीयम बाक्मा बाक्त। मेको आन वारच का निक्शी यो बाक्मा बाक्त। लूका ८:२-३
11येसु आ शेंसीबपुकीमी मीश मुर आन लोव़ नेंशा “एको मीश मुर आन लोव़ बाक्ब” दे थमा मसुदमे बाक्त।
12पत्रुस चहिं दोरशा, कोव़थ जाक्दीम्माक्त। जाक्दीश्शा बाप्शा कोव़ङानु, बुश वा ङा लाक्शा मारेइ मतवा बाक्त। मिनु छक लाक्शा आ खिं लेम्माक्त। यूहन्ना २०:६-१०
13मेको नाक्ती येसु आ वारच निक्शी यरूसलेम रे गाक्शा, एम्माउस माइश्शो गाउं ङा लां खोदसे बाक्त। एम्माउस गाउं यरूसलेम रे ६० स्तादीयोन ङोन बाक्माक्त। स्तादीयोन का १८५ मिटर खोदेंशो बाक्ब।
14मिनु गाक्ना गाक्न बाक्सानु, ओदेंशो मार दुम्मे, दे लोव़सी पमुसा बाक्त।
15मिनु गाक्स ङा गाक्स लोव़ पाम्सेनु, येसु पिशा, ग्रुम्शा, काथा गाक्मा बाक्त।
16काथा गाक्शा यो, येसु, दे मतुइक्तसे बाक्त। मारदे हना येसुमी आस कली मतुइक्पांइसे बाक्त।
17मिनु येसुमी “नाप्खे मार लोव़ पसी?” दे हिल्लो पवा बाक्त।
18मिनु ख्रा दिक्शा आस थुं खाइक्सा बाक्त। मिनु क्लेओपास माइश्शोमी “यरूसलेममी मार दुम्मे, दे गेमी ला मतुइक्तीनी?” देंमेनु,
19येसुमी “मार दुम” देंमाक्त। मिनु मेको निक्शीमी “मार दुम्त देंशा हना, नासरथ ङा येसुमी परमप्रभु यावे आ लोव़ पवानु, शुश चिन्ड कोंइताक्व। परमप्रभु यावे नु मुर नेल्ल आन ङोंइती मोदेंशो पाप्तु। मत्ती २१:११
20तन्न इं ठेयब चढ़ेब नु ठेयब मुरपुकीमी दोस गेशा ‘साइक्चा पुंइसीब’ दे शीम क्येप्शा कांटी थोक्शा क्याइश्शा साइक्पाइक्तेक्म।
21मेको ‘परमप्रभु यावे आ सोइश्शो इं इस्राएली कली प्रोंइब बाक्ब’ दे थमा सुइश्शा, आस पा बाक्तस्कु। आ बेक्शो नाक्त सां दुम्त। प्रेरित १:१६
22मुल सुनी गोपुकी नु बाक्शो मीश मुरपुकीमी आंस वारच नु गो नेल्ल आंइ थुं क्याल्तीकी।
23मारदे हना सुनी कना येसु आ रां वोइक्तीक पुक्खीम लमानु, येसु आ रां मथिक्क। तन्न परमप्रभु यावे आ स्वर्ग ङा गेय पाइब निक्शी ग्रूशा ‘येसु ब्रोंइत, देंताक्स’ दे लेश्शा पिशा लोव़ पाम्तेक्म।
24मिनु आंस वारच का निक्शी यो लशा, कोव़शा लेश्शा जाक्शा ‘मीश मुर आन लोव़ थमा बाक्त’ देंतेक्मे। तन्न मुल सम्म सुइमी येसु कली मतामे” देंसा बाक्त।
25मिनु येसुमी “गे मरुप्ब नसी। साइ नेसी परमप्रभु यावे आ लोव़ पाइब आन देंशो लोव़ रुप्शा थमा सुइक्ने मचाप्नीसी? लूका ९:२२
26ख्रीस्त श्येत जशा, सक्ति पाइश्शो दुम्शा, राज्य पचा ताइब देंशो लोव़ मुल यो मरुप्नीसी?” देंमाक्त।
27साइ नेसी मोसा नु परमप्रभु यावे आ लोव़ पाइबपुकीमी ख्रीस्त आ पर्बम मार मार ब्रेक्शो बाक्मा, मेको नेल्ल शेंदीम्सी बाक्त। ब्यवस्था १८:१५; भजन संग्रह २२:-; यसैया ५२:१३-५३
28मिनु आस गाउं जाक्दीश्शा, येसुमी “लो, बाक्कीसे, गो लाइनुङ” देंमाक्त। उत्पत्ती १९:१५,२४,२५
29मेको निक्शीमी “मुल नां रिक्शा ते लाइनीनी? मुलाक्दो काथा बाक्य” देंसा बाक्त। मिनु येसुमी “मो हना दुम्ब, नां यो रिक्त” देंमाक्त। न्यायाधीस १९:९
30मिनु खमे क्येशा, शोब्ले चोने थुम्शा जचामेनु, येसुमी शोब्ले शेशा, परमप्रभु यावे कली “गे रिम्शो पाइब बाक्नीनी” देंशा, जिक्शा योक्गा बाक्त। लूका ९:१६; लूका २२:१९
31मिनु मो पा तुइक्पांइसेनु “येसु कका बाक्माक्त” दे तुइक्तसे बाक्त। तुइक्तसे चोटी येसु यो जाम्माक्त।
32मिनु मेको निक्शीमी “मेकोमी लांम गो निक्शी नु लोव़ पवानु, परमप्रभु यावे आ लोव़ शेंदानु, इस थुं रांमी नांम तशो खोदेंशो मदुम्सा ङा?” देंमुसा बाक्त। उत्पत्ती १९:२६
33मिनु मेको रीब पा लेश्शा, यरूसलेम लसा बाक्त। यरूसलेमम जाक्दीश्शा, येसु आ शेंसीब ११ जना नु मेको नु काथा बाक्बपुकी खुम्सीशा बाक्शो ग्रुम्से बाक्त। लूका ९:२४
34मेकोपुकीमी यो “प्रभु, थमा पा बेक्शो रे सेंसाक्व। मिनु सिमोन पत्रुस कली तपांइसाक्व” देंमा बाक्त। १कोरिन्थी १५:४-५
35मिनु मेको निक्शीमी लां गाक्सानु, मार मार दुम्मे, आस खिं जाक्दीश्शा मार दुम्मे, मेको नेल्ल तुइक्पदसे बाक्त। मिनु “शोब्ले योक्शा जचशोनु कका येसु बाक्माक्त, दे तुइक्तस्कु” देंसा बाक्त।
36मिनु मोपा लोव़सी पामेनु, येसुमी आंम कली तपांइसे बाक्त। मर्कूस १६:१४-१९; यूहन्ना २०:१९-२३; प्रेरित १:१-१४; १कोरिन्थी १५:५
37मिनु “वोल कोर में” दे थाम्पा हिंमा बाक्त। मत्ती १४:२६
38मिनु येसुमी “मारदे आं कली तशा ‘वोल कोर में?’ दे हिंनी? वोल मनङा। वोल के श्ये रुश मबाक्ब।
39आं कली थिशा कोव़यीनी।
40आं गुइ खोइलीमी कांटी थोक्शो गार कोव़ङीने” देंमेनु, कोव़ङमे बाक्त। यूहन्ना २०:२०
41मिनु छक लाक्शा “येसु बाक्म कों, मबाक्म” दे दल्गीर पामे बाक्त। हिंमा यो बाक्त। ग्येरसमा यो बाक्त। मिनु येसुमी मेको आन कली दल्गीर पशो तशा “एक मारेइ जचा थोव़की बाक्म कों” दे पुना बाक्त।
42मिनु वाल्शो ङांइ का गेमे बाक्त। यूहन्ना २१:५,१०; प्रेरित १०:४१
43मिनु मेको ङांइ ताक्शा, नेल्ल आन तचा ङा पा ब्ववा बाक्त।
44मिनु येसुमी आ शेंसीब आन कली “गो गे नु बाक्ची ना आ देंशो मोसा आ अरेशो लोव़, परमप्रभु यावे आ लोव़ पाइब आन ब्रेक्शो नु भजन संग्रह आं पर्बम ब्रेक्शो लोव़ नेल्ल गाप्चा माल्ब, दे इन कली लोव़ पाता” देंमाक्त। लूका १८:३१-३३; लूका २४:२६-२७; लूका १८:३१
45मिनु नोले येसुमी परमप्रभु यावे आ ब्रेक्पाइश्शो लोव़ रुप्चा कली रुप्तीक थुं गेमी बाक्त। लूका ९:४५; यूहन्ना १२:१६
46मिनु मार ब्रेक्पाइक्मी बाक्त देंशा हना “ख्रीस्त श्येत जशा, साइक्चा पुंइसीशा आ नित्थ नाक्ती बेक्शो रे सेंसीचा माल्ब। होसे ६:२
47मिनु यरूसलेम रे पा रागी नेल्ल ङा मुर आन कली ‘गे इन थुं परमप्रभु यावे गे लेत्चा माल्नीनी। मिनु येसु ख्रीस्त आ नेंमी पाप क्याम्चा तांइसीब’ दे नेंपाइक्चा माल्ब” देंमाक्त। प्रेरित २:३८ प्रेरित १७:३०
48मिनु मेकोमी “गे मेको नेल्ल तशा, सांकछी दुम्तीनी।
49नेनीने, गो आं आफोम ‘सक्ति गेनुङ’ देंशो सक्ति इन कली सोइक्नुङ। तन्न इर ङा सक्ति मतनी सम्म यरूसलेममी रिम्शा बाक्कीन” दे माइक्मी बाक्त। यूहन्ना १५:२६; यूहन्ना १६:७; प्रेरित २:१-४
50मिनु नोले मेको आन कली यरूसलेम रे लाइश्शा, बेथानी गाउं चाक्दीश्शा, आ गुइ पोक्शा मेको आन कली आसीक गेमी बाक्त।
51आसीक गेना गेन बाक्मेनु, सरीङ गे लाइक्चा पुंइसे बाक्त।
52मिनु शेंसीबपुकीमी आन पोक्च थेक्शा, येसु कली ठेयब सेल्शा, थाम्पा ग्येरसीशा यरूसलेम लेम्मा बाक्त।
53मिनु परमप्रभु यावे आ खिंम बाक्ना बाक्न परमप्रभु यावे कली मान पा ठेयब सेल्मे बाक्त।
