SOWƐƐRI 1

1

2

3

4

¹Di m̀pɑ́tíri ti nɑ́ɑ́ nti Yiɛ̀ nKuyie mbɛ́innɛ̀ tìnti Petuyɛɛdi birɛ Sowɛɛri.

²Díndi bɛkótíbɛ̀ kéntɛ́nɛ̀! Díndi Sudɑɑ tenkɛ̀ kɔbɛ keènɛ̀! Di yɑ̀ diɛ m̀botí diyiè mɑrì, bɑ́ nɛ̀ di yɛmbɛ̀ do bomɑ̀ɑ̀?

³Nɑ́kɛ́nɛ̀ ti di bí, kɛ̀ ì múnkɛɛ tì nɑ́kɛ́ i kó ibí, kɛ̀ ìi tì cɛ̃́ĩ nyi kó ibí,

⁴kɛ tú, yɛbiɛ̀ cɑ̀ɑ́kɛ́ kɛ sùɔ́ ndɛ̀ fɛcofɛ dɛ ncɑ̀ɑ́kɛ́, fɛcofɛ cɑ̀ɑ́kɛ́ kɛ sùɔ́ ndɛ̀ sibɛi dɛ ncɑ̀ɑ́kɛ́, sibɛi cɑ̀ɑ́kɛ́ kɛ sùɔ́ ndɛ̀ yɛcɑ́dúɔ̀ ndɛ ndèè.

⁵Díndi tinɑɑ̀yɑ̃̀kɛ́muɔ́ntì entɛnɛ̀ kɛ́kɔmmú! Díndi tinɑɑ̀yɑ̃̀ɑ̃̀tì tiitɛ́nɛ̀ yɛdɑbùò, di pɑ̀ɑ̀mu mɛnɑɑ̀.

⁶Fɛcofɛ fɛɛ̀ ti do bɛhɑ̃ɑ̃pɔ̀nkperíbɛ̀ tɛ̃mɛ̀ kɛ sũ mɛdiɛ̀, kɛ̀ fɛ nìì ndònnɛ̀ dicìrícìrìdɑɑ̀ kpɛyɛ dòmmɛ̀, kɛ̀ fɛ̀ ninkpetɛ dònnɛ̀ dicìrícìrìniiri kpɛyɛ.

⁷Fɛɛ̀ yùo nfínyĩ̀ kó tifɑ̃ɑ̃̀tì, kɛ kùɔ fìkíè tie pɑ́íí, kɛ òrí dɛ wɛ́ɛ́tì kɛ̀ ibɑkɛ pɛikoo kɛ cómmú.

⁸Díndi n nìtìbɛ̀ kɔmmúnɛ̀ osɑpɑ̀ɑ̀ ndɑcɛ̃nnì ò yóó yenkɛ dì ɔ̃ɔ̃ kú kòo nkuɔ̀ mmɛ̀ɛ̀ botí, kɛ dɑ́ɑ́tí kufɔ̀ɔ̀tɔ̃̀nkù, kɛ bo bɛnkɛ o yɛǹcɑɑ̀rìmɛ̀.

⁹Ti Yiɛ̀ nKuyie ncĩ́ɛ̃̀tɛ̀ pɑ̀ɑ̀mu mɛnɑɑ̀ nnɛ̀ tidiitì dɛ kó yɛpɑ̃rɛ̀, dɛɛ̀ te kɛ̀ ikuɔ́ nìùbɛ̀ bɛ̀ɛ̀ tu ti Yiɛ̀ nKuyie ntɔ̃mbɛ̀ kɛ̀ bɛ̀ kuɔ̀.

¹⁰Dɛ̀mɑrɛ̀ tɛ̃́nkɛ í kpɑɑ́ dɛpɑɑ mmiɛkɛ, kɛ̀ kɛtenkɛ̀ kuɔ̀, tidiitì í kpɑɑ́ kɛ̀ mɛnɑɑ̀ ndèè, mɛkɔpɑ̀mmɛ̀ tɛ̃́nkɛ í bo.

¹¹Dɛ̀ dimu bɛtenkútíbɛ̀, bɛ̀ɛ̀ fiiku fínyĩ̀ kó dɛtie kɛ̀ bɛ̀ kuɔ̀ ntidiitì kpɛ́í, tidiitì bɛ̀ nɑ ndɛ̀itɛ tì í pɛitɛ́.

¹²Fínyĩ̀ kó dɛtie nyootɛ́mu, kɛ̀ fìkíè tie mmɔ̀tɛ́, kɛ̀ dɛtie ntɛrɛ̀ bɛ̀ tu dɛ̀ kèdènɑ̀díè, nɛ̀ dɛpuonnɛ nɛ̀ dɛ̀ɛ̀ pɛí yɛtebɛ bɛ̀ tu yɛ̀ pɔ́mmù kɛ̀ dɛ̀ kpeí, bɛnìtìbɛ̀ tɛ̃́nkɛ í mɔkɛ diwɛ̀ì.

¹³Díndi ikuɔ́ nìùbɛ̀, dɑ́ɑ́tínɛ̀ tifɔ̀ɔ̀tɔ̃̀ntì kɛ́kɔmmú yɛdɑbùò, ndíndi ti Yiɛ̀ nKuyie ntɔ̃mbɛ̀ bɛ̀ɛ̀ pĩ nyikuɔ́ tɔ̃mmú, tɑnnɛ̀ mɛyɛǹcɑɑ̀rìmɛ̀ miɛkɛ. Wentɛ́nɛ̀ inuɔ nkɛ yɛ̃́ bɛ̀ tɛ̃́nkɛ í tɔunímɛ̀ tidiitì nɛ̀ mɛnɑɑ̀ ndɛ kó yɛpɑ̃rɛ̀ ti Yiɛ̀ nKuyie ncĩ́ɛ̃̀tɛ̀ miɛkɛ.

¹⁴Ikúnɛ̀ mɛnùboúmmɛ̀, dɔúnnɛ̀ mɛtíímmɛ̀ kó diyiè, tíínnɛ̀ bɛhɛikɛ̀nkótíbɛ̀ nɛ̀ dihɛì yɛmbɛ̀ bɛmɔu ti Yiɛ̀ nKuyie ncĩ́ɛ̃̀tɛ̀ kɛ́ kù kuɔ́nnɛ̀.

¹⁵Diyiè yɛiri diì tùɔ̀kɛní, ti Yiɛ̀ nKuyie mbeéntì kó diyiè ndi, Kuyie Mpɑkɛdɑɑ kó tiyɛ̃ĩti yiè ndi.

¹⁶Ti tɛ̃́nkɛ í kpɑɑ́ yɑu tidiitì nɛ̀ ti nuɔ. Diwɛ̀ì tɛ̃́nkɛ í kpɑɑ́ bo Kuyie ncĩ́ɛ̃̀tɛ̀ miɛkɛ.

¹⁷Tidibotì kpeímu ipɛ̃ mmiɛkɛ, bɑ́ tidiitì í kpɑɑ́ bɛ̀ tì sɔ̀rì dɛ̀, kɛ̀ yɛbuɔ puɔ̀ ntidiitì í kpɑɑ́ mɛ̀ɛ̀ kpɛ́í nyɛ miɛkɛ.

¹⁸Keènɛ̀ iwũɔ̃ kuɔ̀mmɛ̀ kɛ̀ tinɑ̀ɑ̀tì ɑ̃́ɑ̃ntɛ bɑ́ tì í piɛti timútì kɛ̀ tipìètì mɔ̀ńtɛ́ mudiì kɛ kɔ̃.

¹⁹Ti Yiɛ̀ nKuyie, n kuɔ̀nnɛ̀ fɔ̃́ nwe, muhɑ̃ɑ̃́ mmuù cɔ̀útɛ́ timútì dinɑɑcɛ̃nhòò kɛ tɑunnɛ̀ titieti.

²⁰Tikpɑsĩ̀ntì bùɔ́ fɔ̃́ nwe, ikó nyiì kũ̀ṹ kɛ̀ muhɑ̃ɑ̃́ ncɔ̀útɛ́ timútì dinɑɑcɛ̃nni.