1Wal YAWEI det trubala God bin gibit wed langa det speshalwan mesinja blanga im neim Jowal. Det mesinja dedi bin neim Pethyuwel.
2Wal Jowal bin dalim ol detlot pipul deya langa Juda det wed weya God bin gibit im, en dijan na det wed weya Jowal bin dalim olabat. Jowal bin tok, “Ol yumob pipul iya langa dis kantri brom bigwan raidap langa lilwan, yumob irrim mi na, dumaji diskain ting nomo bin hepin langa yumob bifo. En diskain ting nomo bin hepin langa yumob grengrenfatha olabat du.
3Yumob garra dalimbat yumob biginini olabat blanga dis ting, en dei garra dalim olabat biginini olabat du, en detlot biginini blanga olabat garra kipgon dalimbat olabat biginini olabat du.
4“Wal bigismob grashopa bin kaman langa wi kantri, en deibin binijimap ola gadin blanga wi. En afta bigmob bigwan grashopa bin kaman langa wi kantri, en deibin dagadagat ola enijing weya detlot feswan grashopa bin libum. En afta bigmob lilwan grashopa bin kaman langa wi kantri, en deibin dagadagat ola enijing weya detlot bigwan grashopa bin libum. En afta najalot grashopa bin kaman langa wi kantri, en deibin binijimap ola enijing weya detlot lilwan grashopa bin libum.
5“Wal ol yumob drangginbala garra gidap na en kraikrai. Ol yumob pipul hu laigim det wain, yumob garra sori miselp, dumaji detlot grashopa bin binijimap ol detlot greiptri daga weya yumob oldei meigimbat det wain.
6“Detlot grashopa bin kaman langa wi kantri jis laiga bigmob solja. Detmatj bin kaman nobodi kaan kaundimbat olabat. En deibin brabli strongbala du. Detlot tuth blanga olabat bin brabli shapwan jis laiga laiyan tuth,
7en deibin binijimap ola greiptri daga en ola olibtri daga. Deibin skinimap ol detlot tri en ola bushis du, en deibin libum detlot tri nomo garram enijing.
8“Wal ol yumob pipul garra kraikrai jis laik det gel hubin lujim im pramis hasbin bifo dubala bin merrit.
9Yumob garra kraikrai, dumaji ola sid daga en ola wain bin binij na, en yumob nomo garram enijing blanga gibit ofring langa det Serramoni Pleis blanga YAWEI. En blanga tharran na ol detlot serramonimen olabat garra kraikrai du.
10“Wal ola gadin blanga wi nomo garram enijing na, en ola graun bin draiyap jis laiga deset kantri. Ola sid daga bin binij, en ola greiptri daga bin binij, en ola olibtri daga bin binij du.
11“Wal ol yumob fama hu oldei lukaftumbat ola gadin, yumob garra kraikrai brabliwei, dumaji ola sid daga en ola najalot daga bin ol binij na.
12Ola greiptri en ola figtri bin draiyap, en ola najalot tri weya dei oldei abum daga bin draiyap du. “Wal ol yumob pipul bin gudbinji bifo. Bat najing na.
13“Wal ol yumob serramonimen hu oldei wek langa det seikridwan teibul deya langa det Serramoni Pleis, yumob garra werrimon rabishwan klos blanga sori miselp, en yumob garra go langa det Serramoni Pleis en kraikrai deya olnait, dumaji nomo eni sid daga en wain blanga gibit ofring langa YAWEI.
14“Yumob serramonimen garra jingat langa ola pipul en dalim olabat nomo blanga dagat eni daga, en yumob garra majurrumap olabat garram olabat lida deya langa det Serramoni Pleis blanga YAWEI det trubala God blanga wi,
15en yumob garra jingat langa im, dumaji det dei blanga YAWEI im gulijap na. En det dei garra brabli nogud blanga detlot pipul hu nomo bulurrum God, dumaji langa det dei na God det brabli haibala bos garra binijimap ebrijing.
16“Wal wibin luk garram wi ron ai ola gadin blanga wi bin binij. Wal wanim garra hepin wen wi go langa det Serramoni Pleis blanga YAWEI det trubala God blanga wi? Wi garra gudbinji deya?
17Najing. Wi kaan gudbinji, dumaji ola sid bin dai deya gin insaid langa det graun, en wi nomo garram eni daga blanga gajimbat na. En ola haus weya wibin oldei pudum ola daga bin buldan.
18En ola buligi olabat jinginatbat ebriweya, dumaji dei nomo garram eni daga. En ola ship olabat lukabat blanga daga du.” Lagijat na Jowal bin tok.
19Afta na Jowal bin jingat langa YAWEI, “YAWEI, mi jingat langa yu na, dumaji ola pedik en ola tri bin draiyap jis laiga faiya bin barnimap olabat.
20En ola enimul jingat langa yu du, dumaji ola krik jidan draiwan na.” Lagijat na Jowal bin tok.
