Yoɛli 1

1

2

3

4

¹Gɑri wee yi Yinni Gusunɔ u Yoɛli, Pɛtuɛlin bii sɔ̃ɔwɑ u Yudɑbɑ sɔ̃.

²U nɛɛ, bɛɛ Yudɑbɑn guro gurobu, i swɑɑ dɑkio i nɔ. Bɛɛ Yudɑbɑ kpuro kpuro i swɑɑ tem kpĩiyɔ i gɑri yi nɔ. Gɑ̃ɑ ninin bweseru nu koore bɛɛn wɑɑti sɔɔ, ǹ kun mɛ bɛɛn sikɑdobɑn wɑɑti sɔɔ?

³I bɛɛn bibu yen gɑri sɔ̃ɔwɔ. Kpɑ bii be, bu mɑɑ ben bibu sɔ̃, kpɑ be, bɑ̀ n seewɑ bu mɑɑ begibu sɔ̃.

⁴Wee dĩɑ ni kɔkɔnu nu di n tiɑrɑ, twee yi nɑ yi di. Ye twee yi nɑ yi di n tiɑrɑ mɑ swĩini yi nɑ yi di. Ye swĩini yi di n tiɑrɑ, mɑ gbɑɑnu nɑ nu ye di.

⁵Bɛɛ be tɑm mu goomɔ, i dom yɑndo kpɑ i swĩ. Bɛɛ tɑm nɔrobu, i weeweenu koowo. Domi tɑm mu koo kpe resɛm biɑrun sɔ̃.

⁶Domi twee wuurɑ nɑ nge tɑbu kowobu tɑ bɛsɛn tem wukiri. Yi dɑbi, yi mɑɑ dɑm mɔ. Yin donnu dɑm mɔwɑ nge gbee sinɑnsuginu.

⁷Yi bɛsɛn resɛm gbɑɑnu kɑm koosiɑmɔ. Yi bɛsɛn figie dɑ̃nu dimɔ. Yi yen kokosu wĩɑmɔ. Mɑ yi yen kɑ̃ɑsi derimɔ kokosu sɑri.

⁸I wuri koowo nge kurɔ kpɑo wi gɔminirɑ deemɑ.

⁹Bɑ ku rɑ mɑɑ kɑ kɛ̃nu de Yinni Gusunɔn sɑ̃ɑ yerɔ ni nu sɑ̃ɑ ɑlikɑmɑ kɑ tɑm. Yen sɔ̃nɑ Yinni Gusunɔn sɔm kowo be bɑ sɑ̃ɑ yɑ̃ku kowobu bɑ sɑ̃ɑre bɑ gɔɔ sɔ̃.

¹⁰Gbeɑ kpuro yɑ kɑm kuɑ. Mɑ yen tem mu sɑɑrɑ. Alikɑmɑ sɑri, resɛm kɑ gum mɑɑ sɑri.

¹¹Gbee wukobu bɑ sɔ̃ biti sɔɔ. Be bɑ rɑ resɛm yewe, weeweenɑ bɑ mɔ̀. Domi dĩɑ bimi sɑri. Dĩɑnu kpuro nu kɑm kuɑ.

¹²Resɛm gbɑɑnu nu gberɑ. Figie yɑ dɛllɑ. Dɑ̃ɑ gbɑɑnu kpuro nu geɑ yinɑ. Yɑ derɑ tɔmbu bɑ ǹ mɑɑ nuku dobu mɔ.

¹³Bɛɛ Yinni Gusunɔn sɔm kowobu, yɑ̃ku kowobu, i sɑɑki sebuo i kɑ kpunɑ wɔ̃ku giriru nuku sɑnkirɑnun sɔ̃. Domi wee bɑ ku rɑ mɑɑ kɑ ɑlikɑmɑ kɑ tɑm kɛ̃nu nɛ Gusunɔ bɛsɛn Yinnin sɑ̃ɑ yerɔ.

¹⁴I tɔ̃ru gɑru wunɔ tè sɔɔ i ko i nɔɔ bɔke. I tɔmbu kpuro mɛnnɔ sere kɑ durɔ tɔkɔnɔ Gusunɔ bɛsɛn Yinnin sɑ̃ɑ yerɔ, kpɑ i nùn kɑnɑ.

¹⁵Yinni Gusunɔn tɔ̃ru tɑ turuku kuɑ. Tɔ̃ɔ te, tɑ sɑ̃ɑwɑ win tɔ̃ru. Te sɔɔrɑ wi, Dɑm kpurogii u koo kpuro kɑm koosiɑ. Annɑ ɑ tɔ̃ɔ kɔ̃suru wɑ te tɑ sisi mi.

¹⁶Wee sɑ mɛɛrɑ bɑ kɑ bɛsɛn dĩɑnu doonɔ. Mɑ nuku dobu kpɑ Gusunɔ bɛsɛn Yinnin sɑ̃ɑ yerɔ.

¹⁷Ye bɑ duurɑ, yɑ gberɑ tem kusɑnu sɔɔ. Dĩɑnu kpɑ birɑnu sɔɔ. Mɑ birɑ ni, nu wɔrukumɔ. Domi nu ǹ mɑɑ dĩɑnu mɔ.

¹⁸I swɑɑ dɑkio i nɔ nge mɛ yɛɛ yi wuri mɔ̀, mɑ yi bɔsu bɑɑmɑ. Domi yi ǹ yɑkɑsu wɑ kpɑrɑ yerɔ. Bɑɑ kɑ yɑ̃ɑnɔ nu nɔni sɔ̃ɔre.

¹⁹Yinni Gusunɔ, wunɑ nɑ nɔɔgiru suemɔ. Domi wee, yɑkɑsu kɑ dɑ̃ɑ dɔ̃ɔ mwɑɑrɑ gberɔ.

²⁰Mɑ yɛɛ yi nɔɔgiru sue yi nun kɑnɑmɔ. Domi dɑɑnu gberɑ, yɑkɑsu mɑɑ dɔ̃ɔ mwɑɑkirɑ gbɑburɔ.