1Bab-Jehová Petuel-machi-Joelʼga gayaburba sognonikid. Joel, Israel-dulemarga weyob sogded:
2“Bemar, sapin-dummagan-gumalad, nue itomalo. Bela we-yargi-gudidimalad, nue itomalo. Ses-danagwen-gudimalad-ibmar-guchagusad-obesadi, sorba ses-dummagan-gudidimalad gunnonimalad. Geb ses-dummagan-gudidimalad-ibmar-guchagusad-obesadi, sorba ses-sapingana gunnonimarmogad. Geb ses-sapingana-ibmar-guchagusad-obesadi, sorba ses-burwigana gunnonimarmogad. Be-dadgan-ibagangi, ¿ar weyobi neg-gusa? Bemar-emi-dulagudimaladgi, ¿ar bemar weyob neg-dakdimala? Emi, be-mimmigangala, be we-ibmar sogmala, adi, be-mimmigan na e-mimmiganga sogmarmogaga, deginmoga, a-mimmigan na e-wagan-danimaloedga sogmarmogoed.
5”¡Mummugan, atakmala, be bomala! Bela-gadi-vino-gobmalad be nunmak itomala, ar ade, vino-binid bemar-annik sulesad.
6Ar dule-yar-baidgi-bukmalad-gandikmalad-bukidar, an-yargine ubononikid. E-nugarmar, achumigur-nugarmaryobi nikamalad. E-nugar-suigan, achumigur-e-ome-nugaryobi nikamalad.
7An-uva-dubmar-digar-naid obelosmalad. An-higuera-sapimar daas-daas-imaksad. Bela e-uka yaas-yaas-imaksamalad, e-anagan swanga imaksamalad. Bela omukusmalad.
8”An-dulemar, yagwa wile-itoged-mor-yoi na machered-abesiid-ei-burgwisadba-boedyobi, bomalad.
9Bab-Jehováʼse-goled-neggi ibmar-gwag-orosgi-dakleged-ukleged bar uklesulid, degi, vinoʼmar bar uklesurbalid. Dule-irwa-Bab-Dummadse-gormalad Bab-Jehováʼga-arbamaladi, bomarmogad.
10Nainumar bela swanga nanaid, e-napamar bela dinna naded. Bela ibmar-gwag-orosgi-dakleged bergusad, vinoʼmar bela dinguded, olivoʼmar bela berguded.
11”Bemar, sapurgi-arbamalad, bemar uva-dubgi-arbamalad, ibmar-gwag-trigoʼye-nugad-bela-dingusadba, ibmar-gwag-cebadaʼye-nugad-bela-dingusadba, be bomala. Ar bela ibmar-gwagmar-welesadi oitolesad.
12Uva-dubmar bela dinguded, sapi-higueraʼye-nugad, bela burgwided. Sapi-granadoʼye-nugad bela dingudmogad, ogobgi-dakleged, manzana-sapimar, dingudmalad. Bela sapimar-gwigwichid dingudmalad. Dulemar-e-yeer-itodiidse-bakale, e-ibe bergunonikid.”
13Dule-irwa-Bab-Dummadse-gormalad, be wile-itomar, wile-itoged-mor be yomar. Bab-Jehováʼga-ibmar-ukleged-ailagi-arbamalad, naibid-dummad be itomar. An-Bab-Dummadga-arbadimalad, be dagmala, wile-itoged-mor-yoi, be oibomar, ar ibmar-gwagmar, degi, vinoʼmar Bab-Dummadse-goled-neggi bar uklesulid.
14Bela dulemarse gormala, mer-bar-mas-gulleged-iba be nasikmalo. Be-Bab-Dummad-Jehováʼse-goled-neggi, girmar-dummagan be onmakmala, bela dulemar-we-yargi-gudidimalad be onmakmala, agi Bab-Jehováʼse ise-gollar imakmala.
15¡Iba-buledi danikid! ¡Bab-Jehová-e-iba bato warmakdanikid! Bab-Dummad-Bela-Gangued-Nika-Maid-e-iba, ibmar-bergued-iba guoed.
16Anmar-masgulleged, ¿anmar-wagab anmar-ibe sulenai gussursi? Anmar-Bab-Dummadse-goled-neggi anmar-wergued, anmar-yeer-itoged, ¿anmar-ibe osulolessursi?
17Ibmar-gwag diglesa-inigwele, degite, bela nungusad. Ibmar-saboleged-neg isgus-sii. Ibmar-gwag-saboleged-negmar bela bibichisad. Ar ibmar-gwagmar bela dingusmalad.
18Ibiyobi molimar masbina gornanai. Moli-bebe-nikamalad masgunned satedbali oes gaamakdidimalad. Sibad-wawaadmar deyobi gudidimarmogad.
19Bab-Jehováʼye, an bese ise-wilegar goled, ar ade, nainumargi gagan-nanaid soo ogumaksad, bela sapimar-gwigwichid ogumaksad.
20Bab-Jehová, amba ibmar-durganse-bakale, bela-bela be-amimalad, ar ade, bela diwarmar-mamaidi dingusad, nainumargi gagan-nanaid soo ogumaksad.
