Joele 1

1

2

3

¹Dake Kamongona wai pii Petuwelena ikinyingi Joele lenge doko keta maiya.

²Selapa, nakama wambu andapae dupwa. Wambu peparae yuu Juta dokona karaminyi dupwa peparaeme selapapeko. Yulu dapale mende emba ando karene yuu gii dokopape panda embena rakane ando kareyamo yuu gii dokopape mende piyase?

³Dokona lao nakamana wane wanake dupwa lamaipwape. Dokopa nakamame nakamana wane wanake manjiraminyi dupwa lamairami dokopa dupwame rengya wai kiso nyeraminyi dupwa lamairami.

⁴Aimbu ambo dupwa epo ee jingi dupwana minyarambuyami. Ambo mendeme neyamo pyarepala peya doko ambo enakaya nao dee dokome neyamo pyarepala peyamo doko mendeme nao piyami.

⁵Doko girapo jingi waene enenge wasarami dupwa kokwa sipyamo dokona nakama ipwa biya nenge dupwa sipurao lenge rapala ee lao yamarangwalapape. Nakama ipwa waene nenge dupwa ee lalapapeko.

⁶Akali rara mendeme yanda pinya nyuo suku pingi dopale ingyuo aimbu epo malu palyapala namwana ee yuupi nao otami. Nakama ama malu porai wakasa yaka lao sukusa paa napengele. Nakamana nenge wanga dupwa mena laenena nenge dopale.

⁷Nakamame namwana isa girapo marange dupwa kokwa simi dee namwana piki isa dupwa nao rango pyanyi nembami. Dopa pyuo isa yanenge nao rekya lao nembaminyisa wangya dupwa kuli kewa lasi karaminyi.

⁸Dokona nakama wambu dupwa wanake akali nyelana pingi kumulyamopa ee lao kumanda petenge dopale ingyuo ee lalapape.

⁹Waene nengepe tembole anda dokona Anatu mairami mende see nalyamo. Dokona purisi dupwa Kamongo nenge jingi maingi dupwa ingi rando karaminyi.

¹⁰Nenge witi jingi dupwa kokwa soo nembo girapo dupwa yanda nao olipi dupwa kyapuo pipya. Dokona yuu mee muiyane sipyamo dokona yuu dokome wambu ingyuo ee lao yamarangyuo silyamo.

¹¹Witi jingipi bali jingipi dee ee nenge dupwa peparae kokwa siyamo dokona nakama ee rapu pingi dupwa mona rando ee lao karalapape.

¹²Girapo isape piki isape dupwa kumalana kuliya. Jingi lyuo nenge isa dupwa peparae kumapala yando nao karaminyi. Dopa pipala wambu dupwana rae maingi renge dupwa inyimungu rali pipya.

¹³Nakama purisi dupwa Kamongona kana pyare lasi dokona bange kiso maingi dupwa kumanda piso komau pingi dupwa pipala tembole anda dokona papala yuu gii ee lao piso yanganyi retalapape. Nakamana Anatunya anda dokona nenge waenepe mairami mende see nalyamo dokona dopa pyuo pisipwape.

¹⁴Wambu dupwa nenge wasaka pyuo malu palyuo petena lamaiyalapape. Akali mupwa dupwape mee Juta wambu dupwape peparae elyambu pipala nakamana Kamongo Anatu dokona tembole anda dokona kolando papala Anatu kando ee lao lalapape.

¹⁵Kamongona yuu gii doko repeta epelyamo. Eparamo dokopa Anatu Porai Wakasa dokome pyao kokwa sinya lao randa andake jera. Yuu gii dokona paka renge wakasa epara.

¹⁶Namwana lenge angi dokome wambo kandamwanopa nenge jingi dupwa kokwa sinyi nembapya. Dokopa namwana Anatunya tembole anda dokona rae maingi renge mendepe see nalyamo.

¹⁷Yuu yando dokona ee waingi dupwa kumulyamo. Dokona nenge jingi nyuo malu palyuo retarami ingya nalyamo. Dopa piramo dokome nenge jingi retenge anda dupwa mee kwua karo momo nao lalyara.

¹⁸Rambi mena nenge dupwa pali napyasa mena bulamakao dupwa lopapala kae lao karaminyi. Mena sipisipi kaparo karaminyi dupwa opetae lopalyaminyiko.

¹⁹Isareme rapala pinginyili pyuo rambipi isape yando nelyamo. Dopa pipyasa nambame Kamongo emba keta ee lao piso silyu.

²⁰Dopako pyuo ipwa guu lengepe rambi andenge pandape dupwa isareme renge dopale ingyuo kyapuo yando nelyamo dokona mena rae lenge dupwame kamameko emba kando ee letaminyi.