Joel 1

1

2

3

¹Imi Yawe ko den Pethuel ko kuriang Joel tuam se Joel balam.

²Den ewere ikialko! Nina kari supuling alo, se nina suen la ali sor imi te bagasan mu ikialko! Kiwem i bo iwita nenenga tom te agi ninga nenet nenengetak nunga tom te aratam e?

³Nina ninga kuriang alo nunga maonal, se nuna betela nunga kuriang alo nunga manarmon, se nuna betela nunga kuriang gue luan udagi mu iwita nunga manarmonko:

⁴Locust numi birira la bengeman tai sor taman, ale motam giram mu tam gawa gurek se sirsir mel nowa bitawakaso mu, aking motam kowom kaora mu aking no karogo nama bitawakaso mu, aking motam bo nukum kitira taira mu eng am menawu saparam.

⁵Barasalko! Nina yu naman ale nguala sipawasan mu se waen nana ko kari, ningimik ko niaralko! Mu awuk, waen iru nunga ko lage kuring aitak sisiram, se udagi waen bo iru me nalko.

⁶Wonong bo lilim ko kariimet iwita aninga sor imi ira baguman, nuna sokel ago, se nunga kaura ko me terong; nogore nuguring mu lion kore kuring wuli karogo wore iwita.

⁷Se aga tam waen maguwuman silataman, ale aga tam fig mu guang wasi ago namaman se luan kower sirarmam ale aniso.

⁸Ninimi karur tugumal ale imet kulak luan ilu beteman se ko kari kulak la kueso se niaso maso iwita, mal niaralko.

⁹Inang mu se yu waen karogo tai Yawe ko temple ningi munan tuiwara mu aitak me karogo tai tusan; se priest alo Yawe ko temple ningi ura towara mu nia mo se anisan.

¹⁰Ningam ko ali maga saparam, se ali marakam. Se inang muguri maga saparam, se tam waen karogo la maraka saparam, se olive oil iru nunga ko mu ikup biya.

¹¹Nina ningam betera ko kari alo, ninga ningam mel ko nengemang batagukko! Se nina waen aguwa ale bitua nunga ko kari alo, nina betela nengemang bataguk se mal niaralko, mu awuk, wheat se barley se na inang mel suen la maga saparam.

¹²Tam waen se tam fig maraka sapaman; se tam pomegranate, tam date se tam apple, se tam suen la inang ko nasan, mu am maraka sapaman. Se amilmil suen la kapa saparam.

¹³Priest alo, nina ningimik karur tugumal ale mal niaralko; nina noko altar ko ura betera ko kari, nengemang ninguru batagukko. Nina aninga Kaem ko ura kari, guang karur ago nagural ale tairal nebugura kulukal ale tirom kowarkalal wosenga se lagaralko, mu awuk, inang muguri se yu waen mel Yawe te munan tua ko mu mena tala.

¹⁴Kari supuling se kariimet suen la ali imi te bagasan mu nunga aural se Yawe nenenga Kaem ko temple laili ningi tai sapamon se kariimet lilim ago inang kaolal ale Yawe kote nia wosengalko.

¹⁵Yawe ko tom balam mu tai pingi aram! Sinar talko! Tom mu ikup ko tom, magara kuenera biya Sokel Garagar mu kuting te ariginakko.

¹⁶Na inang ko lage bataga saparam ewere me arigisan e? Amilmil yawara anananga Kaem ko temple ningi mu mena namaram mu me arigisan e?

¹⁷Inang muguri mu ali ningi maraka namaman; se inang awuk wore nunguning kaparuk se gi inang kawam tugunakko? Mena se, inang ko kawam mu nabiring tuman.

¹⁸Bulmakau sirsir ito namonko wore mena se, nia maguwu gilingisan ale nama bola tai pala masan, wore ikialko! Se sipsip agotala maga kuena gilingisan.

¹⁹O Yawe, ani aira nikate betesam, mu awuk, sirsir mel se tam mel suen la mu tama kani saparam.

²⁰Uwutatala, anapeya mel aolak ilu nama taiwasan, biya ta, gotek ta, mu nikate nia gilingisan, mu awuk, yu mel nuna nowara mu maraka sapaman.