Annabi Yoweli 1

1

2

3

4

¹Masenyi nan yi ki Alatala naxan masen Petuweli xa di Yoweli bɛ:

²Forie, wo yi fe ramɛ, bɔxikae, wo wo tuli mati. Yi fe mɔɔli bara raba nu wo xa waxati, xa na mu wo benbae xa waxati?

³Wo yi ya maxaran wo xa die bɛ, wo xa die fan xa a ya maxaran e gbe die bɛ, e gbe die fan xa a ya maxaran e gbe die bɛ e fama naxee baride.

⁴Kulie naxan lu, katoe xunxurie bara na don. Katoe xunxurie naxan lu, katoe xungbee bara na don. Katoe xungbee naxan lu, katoe mɔɔli gbɛtɛe fan bara na don.

⁵Wo tan siisilae, wo xunu, wo xa wa. Beere minyie, wo xa wo xui ite, barima wo mu fama wɛni nɛɛnɛ sɔtɔde sɔnɔn.

⁶Ɲamanɛ sɛnbɛma nde naxan xa mixi kɔnti mu kolon, na bara din n ma bɔxi ra. A ɲinyie luxi nɛ alɔ yɛtɛ ɲinyi, a banganyie luxi nɛ alɔ yɛtɛ ginɛ banganyie.

⁷A bara n ma wɛni xɛe kana, a n ma xɔrɛ bilie ibolon. A bara e kobole ba han e salonyi bara fiixɛ fɔɛn.

⁸Wo xa wa alɔ sungbutunyi naxan xa xɛmɛ bara faxa.

⁹Alatala xa sɛrɛxɛdubɛe sunnunxi, barima hadiya donse mu na Alatala xa banxi kui sɔnɔn.

¹⁰Xɛe bara kana, bɔxi fan na sunnunyi kui, barima donse xun bara rakana, wɛni nun ture mu na.

¹¹Xɛ sae wama nɛ, wɛni sansi sie sunnunma nɛ, barima naxan birin bogixi xɛe ma, na birin bara kasara.

¹²Wɛni bilie bara xara, xɔrɛ bilie bara lɔxɔsin. Wɛni bilie, tugi bilie, mangoe bilie, nee birin bara xara. Mixie xa ɲɛlɛxinyi bara ɲɔn.

¹³Na kui a lanma wo tan sɛrɛxɛdubɛe, wo xa sunnunyi dugi ragoro wo ma. Wo tan naxee sɛrɛxɛ ganma sɛrɛxɛbade fari, wo xa wa. Wo xa kɔɛ radangi nimisɛ kui, wo tan naxee walima n Marigi Ala bɛ, barima hadiya donse bara ɲɔn Ala xa banxi kui.

¹⁴Wo xa sunyi suxu, wo xa sali raba. Wo xa forie nun ɲama malan wo Marigi Alatala xa banxi kui, wo fa a maxandi wo bɔɲɛ birin na.

¹⁵Alatala xa lɔxɔɛ xɔrɔxɔɛ bara makɔrɛ. A fama nɛ kanari belebele tide Ala Sɛnbɛma xili ra.

¹⁶Wo mu a toxi won ma donse bara ɲɔn, sɛɛwɛ nun ɲɛlɛxinyi mu na Ala xa banxi yire sɔnɔn?

¹⁷Sansi xɔrie bara xara bɛndɛ bun ma. Sansi xɔrie ragatadee bara bira, donse bara ɲɔn.

¹⁸Xurusee wama donse fe ra. Yɛxɛɛ tɔɔrɔma barima ɲooge mu na.

¹⁹Alatala, n i tan nan maxandima, barima tɛ bara fiilie nun burunyi gan.

²⁰Hali burunyi subee ya tixi i ra, barima xuree bara xɔri, tɛ bara fiilie gan.