Sowel 1

1

2

3

¹Iei alon ewe Samol mi Lapalap ngeni Sowel nöün Petuel we mwän:

²Oupwe rongorong, ämi ätemirit, oupwe aü selingemi, ämi meinisin mi nonom lon ei fanü Juta. Ifa usun, ei sokun mettoch a fen fis lon fansoun manauemi ika lon fansoun manauen semelapemi kewe?

³Oupwe asile ngeni nöümi usun, nge ir repwe asile ngeni nöür seni eu täppin aramas tori eu täppin.

⁴Mine ekewe muunen lifichimas ra likitala seni uän ämi ira, ekewe lifichimas mi äsfeil ra eni. Nge mine ekewe lifichimas mi äsfeil ra likitala, ekewe lifichimas mi mwetemwet ra eni. Nge mine ekewe lifichimas mi mwetemwet ra likitala, ekewe lifichimas mi atai meinisin ra eni.

⁵Oupwe nenela o kechü, ämi chon pulas, oupwe ngüngüres, ämi meinisin mi ünümi wain, pun esap chüen wor ünümemi wain mi arar.

⁶Iwe, epwi pwiin lifichimas a feito o ataela fanüach. Ra pöchökül o chocho pwe esap wor eman a tongeni aleaniir. Ngir ra ken usun chök ngin eman laion.

⁷Ra ataela ach tanipin wain, ra pwal enala ach irä fiik o atikala silir, pwe paler ra pwechepwech.

⁸Oupwe kechü usun eman föpwül mi kechüeiti kofotun mi mäla.

⁹Esap chüen fis asoren mongö me asoren ün lon ewe imwenfel. Iei mine ekewe souasor mi angang ngeni ewe Samol mi Lapalap ra letipeta.

¹⁰Iwe, ekewe tanipi ra tala, nge ewe pwül a masua. Ekewe irän wiich ra tala, ewe wain me ewe apüra seni föün olif ra morola.

¹¹Oupwe rükö, ämi chon tu pwül, oupwe pwal kechü, ämi chon tanipini irän wain. Oupwe kechüeiti ekewe irän wiich me parli, pun esap chüen wor resin fanüemi.

¹²Iwe, ewe irän wain a pwasala, ewe irä fiik a mäla. Ekewe irä palm, ekewe irä apel me ringo, pwal ekewe lusun irän lemäl meinisin ra pwasala. Iwe, esap chüen wor än aramas pwapwa.

¹³Oupwe üföüf üf seni tuk o kechü, ämi souasor mi angang ngeni ewe rongen asor. Oupwe feito o ngüngüres lon üfemi seni tuk lon unusen pwin, ämi nöün ai we Kot chon angang. Pun asoren mongö me asoren ün esap chüen fis lon imwenfelin ämi we Kot.

¹⁴Oupwe apini eu rän pwe oupwe echikefel lon, oupwe pwal körato aramas pwe epwe wor eu mwich mi pin. Oupwe achufengeni ekewe ätemirit me chon Juta meinisin, pwe repwe feito lon imwenfelin ewe Samol mi Lapalap ämi we Kot o siö ngeni.

¹⁵Eniwokusun lon ewe rän. Pun ränin ewe Samol mi Lapalap a arap. Ewe rän a war, eu ränin afeiengau me ren ewe Kot mi Unusen Manaman.

¹⁶Ifa usun, ousap küna pwe a rosola enemi mongö? Esap pwal chüen wor pwapwa me mweireir lon imwenfelin ach we Kot.

¹⁷Iwe, ekewe föün irä mi fot lon pwül ra pwasala. Esap wor föün wiich lon ekewe lenien iseis, iei mine ekewe imwen iseis föün wiich ra pöla o tala.

¹⁸Iwe, ekewe kow ra wörüwör ren ar echik, pun esap chüen wor ener fetil, ekewe pwiin sip ra pwal riaföü.

¹⁹Ai Samol mi Lapalap, üa siö ngonuk, pun ekewe lenien fetil me ekewe irän lemäl meinisin ra pwasala, ra usun chök nge ekkei a kenirela.

²⁰Pwal ekewe manmwacho ra siö ngonuk, pun esap chüen wor kolukun lon ekewe chanpupu.