Ʒekaria 4

1

2

3

4

5

6

7

8

9

10

11

12

13

14

¹Eme aŋelo nohec dâŋewec e harierâ fuahuc wiwicnuwec, i ŋic moc guŋkonec wiwickepene ɋâreekac irec sâc.

²Erâ ʒiŋuc nazawec: “Go wemo wiac honekomec?” Mume mupo: “No lambe dodoma moc golzi bakicne honekopac, ehuc fainao wokemaŋ ŋeŋe râqâc â lambe 7 erâ lambe qeŋqeŋ 7 jaha ŋerapie honec‐jopakopac wâc.

³Ehuc lambe dodoma maŋfuŋnao ŋifec â ŋifec oliwa jâc jajahec domahapire honec‐jofakopac.”

⁴Iŋuc murâ aŋelo nohec dâŋewec e ʒiŋuc muhuc wiocnepo: “Bomboŋ‐nane, wiac keci irec fuŋne weniŋuc?”

⁵Eme aŋelo nohec dâŋeweczi dâŋ ʒiŋuc bâtikie‐narewec: “Go wiac irec fuŋne mi manakomec me?” Mume mupo: “Bomboŋ‐nane, no mi manakopac.”

⁶Eme ʒiŋuc nazawec: “Serubaberao Wofuŋte dâŋ fuawec ʒine hâcne: Ŋic sasanaŋ me tâpirio mâcne, Mâro‐nanere tâpirio wiac ee bapane fokac, Anutu Tâpiri Ɋuŋɋasaŋ Wofuŋte dâŋ iŋuc.

⁷O tiki sâko, go wemo wiac fârine mo? Go Serubabere maio fâucke ʒaŋ erâ wâneŋ ezemec. Eki hâcne ŋic ŋokac jaŋe ʒeri faio ‘Ohec ohec’ mucnehapie fic bupune hebâzickeme taraocmu.”

⁸Eme Wofuŋte dâŋ i norao ʒuhuckerâ ʒiŋuc fuawec:

⁹“Serubabe e meticnezi fic kecʒirec hobeteŋne râewec, erâ e jahacne mezia fic kecʒi bâzickeocmu. Iŋuc fuame ŋoŋe porofete nore ʒiŋuc mananʒepieŋ: Anutu Tâpiri Ɋuŋɋasaŋ Wofuŋ eki nâŋerao soreme warewec.

¹⁰Moc e wiac afecne fuŋkerâ fuawec dameŋ irec mana sâqoreweczi Serubabere meo bupure wiac ŋemâcne foha honerâ bubiaŋ manaocmu. “Lambe 7 jaŋe Wofuŋte ʒâŋe hândâŋ ehuc mâreŋ sâko mâreŋ hone‐fâreeŋgopieŋ.”

¹¹Eme no aŋelo ʒiŋuc wiocnepo: “Oliwa jâc jajahec lambe dodomare maŋfuŋko ŋifec â ŋifec domakopirec jahere fuŋne weniŋuc?”

¹²Erâ harierâ wiocnepo: “Wokemaŋte qeŋqeŋ jajahec golzi bakicne jahere ŋifecnao oliwa jâc tieŋne jajahec fokopirec jahere fuŋne weniŋuc?”

¹³Eki ine ʒiŋuc nazawec: “Go irec fuŋne mi manakic me?” Eme mupo: “Bomboŋ‐nane, no mi manakopac.”

¹⁴Mupe muwec: “Jahe mâreŋ sâko mâreŋ irec Wofuŋ ere kiŋaŋ qaqa jajahec wokemaŋ rua‐jactekicne hâcne.”