1Geezuɠeelai nii é ɠɛni ɓɔɛzu pɔ̀, naa ʋaani ʋolu, é màaloɠa, ʋelei nu a ɗa ɲiimɛni nui maaloɠa la.
2É ɠɛni mà: «Leeni ɠa è kaazu?» Gè gooɠaaʋoteni, gè ɠɛ ma: «Fitina zei anii ɠa gè kaazu é ga zanugi nɔ ɲɛgɛlɛin, fitina lɔfela ɠa é zeini ga. Gulɔ aniɲakai zeini ti maazuʋɛ, sɔɔʋɛ lɔfelaiti togai ba, gulɔi ziɛzu ti zu, é zeeli fitinaiti su.
3Wolive wulu felegɔ ɠa loni gulɔ aniɲakai ɠobaʋɛ, gilagi ɠa zeezazuʋɛ, zɔi ɠɛ ga kɔʋɛzu ʋelei.»
4Gè geezuɠeelai ɠaazaɠani ʋolu, nii é ɠɛni ɓɔɛzu pɔ̀, gè ɠɛ ma: «Màliɠii, nii ʋoluʋɛ ɠa ga leeni?»
5Geezuɠeelai é ɠɛni ɓɔɛzu pɔ̀, é gàazaɠani é ɠɛ mà: «È la naa ʋoluʋɛ ɠwɛɛ?» Gè ɠɛ ma: «Ungo Màliɠii, gè la poluɠwɛɛ.»
6É gòoɠaaʋoteni, é ɠɛ mà: «Ɠɔoɠɔ GALAGI wooi ɠa é bosu Zɔlɔɓaɓɛle ma: È la niima wotii ɠɛa ga zobogi ta gaaɓaai, kɛni nà-zɛnvui zɛbɛi zu. Ɠɔoɠɔ GALAGI Fai-Pɛ-Maliɠii ɠa é boga.
7Ɗa ga leeni kae, gize wolai? Ɗa valibosu è ɠɛ ga nɛmɛi Zɔlɔɓaɓɛle luɠɔ. Toɠa kɔtu ɓiingi ɠula è zu, maamusɛ wooi zaama, ti ɗa ɠɛ ma: ‹Tuya ɠɔtui! Tuya ɠɔtui!› »
8Ɠɔoɠɔ GALAGI ɓɔɛni pɔ̀ ʋolu, é ɠɛ mà:
9«Zɔlɔɓaɓɛle yeeiti ka ti niima wuulaagi laa, tiya ma nɔ ɠa ti pɛlɛi nii lo fai ɠaaɓelazu.» Naa ɠa ɠɛɛna wa kwɛɛ naazu ga Ɠɔoɠɔ GALAGI Fai-Pɛ-Maliɠii ɠa é tèʋega wo ma.
10«Ɓɛni ka mu ti botii lɔɔzeizuʋɛ goi ʋaaɠulaai? Ti maa ɠɛni nɛɛni ga ti ɠoozunɛ, siɛgi zu ti kɔtu zaɠa ɠɔlui ɠaani la zoni Zɔlɔɓaɓɛle ya. Kɔtu ɠaazu lɔfelaiti ta ga Ɠɔoɠɔ GALAGI ɠaazuɠɛzɛgiti, ti wɛlɛzu fai pɛ ma, ti ɠɛɛzu zooi ɠa.»
11Gè gaazaɠani ʋolu, gè ɠɛ ma: «Wolive wulu felegɔi nuuti poluʋɛ ɠa ga leeni, ti loni fitina zei anii yeezazuʋɛ ta kɔʋɛzuʋɛ?»
12Gè ɠɛ ma mɔnɔ: «Wolive wulu ɓeke felegɔi nuuti poluʋɛ ɠa ga lee, ti loni zanu sɔɔʋɛ felegɔiti koba, niiti gulɔ ɓɛlɛi ziɛzu ti zu?»
13É ɠɛni mà: «È la ti ʋoluɠwɛɛ?» Gè ɠɛ ma: «Ungo Màliɠii, gè la ti ʋoluɠwɛɛni.»
14É polulɛɛni ga ze, é ɠɛ mà: «Zunu felegɔiti kana niiti gulɔi ziaai ti ma, ti losu eteai pɛ Maliɠii ɠakala.»
