Sɑkɑri 1

1

2

3

4

5

6

7

8

9

10

11

12

13

14

¹Dɑrusin bɑndun wɔ̃ɔ yirusen suru nɔɔbɑ itɑse sɔɔrɑ Yinni Gusunɔ u kɑ win sɔmɔ Sɑkɑri, Berekiɑn bii, Idon debubu gɑri kuɑ u nɛɛ,

²nɛ, Yinni Gusunɔ nɑ kɑ bɛɛn bɑɑbɑbɑ mɔru kuɑ too.

³Yen sɔ̃, nɑ bɛɛ sɔ̃ɔmɔ, i wurɑmɑ nɛn mi, kpɑ nɛ, Gusunɔ wɔllu kɑ tem Yinni n mɑɑ wurɑ bɛɛn mi. Nɛ, Yinni Gusunɔwɑ nɑ yeni geruɑ.

⁴I ku kɑ bɛɛn bɑɑbɑbɑ weenɑ be nɛn sɔmɔ gbiikobu bɑ nɛn gɑri sɔ̃ɔwɑ bɑ nɛɛ, bu ben dɑɑ kɔ̃sɑ derio. Adɑmɑ bɑ ǹ sɔmɔ be swɑɑ dɑki bu sere mɑn mɛm nɔɔwɑ.

⁵Mɑnɑ bɛɛn bɑɑbɑ be, bɑ wɑ̃ɑ tɛ̃. Sɔmɔ ben tii, bɑ wɑ̃ɑ sere kɑ tɛ̃?

⁶Aɑwo, bɑ gu. Kɑ mɛ, woodɑ kɑ gɑri yi nɑ nɛn sɔmɔ be wɛ̃, bɑ yi bɛɛn bɑɑbɑbɑ sɔ̃ɔwɑ, mɑ bɑ gɔ̃ru gɔsiɑ bɑ nɛɛ, nɛ Gusunɔ wɔllu kɑ tem Yinni nɑ bu kuɑ nge mɛ nɑ gɔ̃ru doke ben dɑɑ kɔ̃sɑn sɔ̃.

⁷Dɑrusin bɑndun wɔ̃ɔ yirusen suru wɔkurɑ tiɑse, wi bɑ mɔ̀ Sebɑti, win sɔ̃ɔ yɛndɑ nnɛse sɔɔrɑ Yinni Gusunɔ u kɑ win sɔmɔ Sɑkɑri, Berekiɑn bii, Idon debubu gɑri kuɑ kɑ̃siru sɔɔ.

⁸Wee ye u wɑ kɑ̃si te sɔɔ. Wɔ̃kuru, u durɔ goo wɑ u dum swɑ̃ɑ sɔni u kɑ yɔ̃ dɑ̃nu gɑnun suunuɔ, wɔwɑ gɑɑ sɔɔ. Mɑ dum swɛ̃ɛ kɑ dum bɛrɔ wurusu kɑ dum kɑɑbɑ yi wɑ̃ɑ win biruɔ.

⁹Mɑ u bikiɑ u nɛɛ, nɛn Yinni, mbɑ dumi yin tubusiɑnu. Mɑ Gusunɔn gɔrɑdo wi, u nùn sɔ̃ɔwɑ u nɛɛ, kon nun yi tubusiɑ.

¹⁰Yerɑ u nùn sɔ̃ɔwɑ u nɛɛ, dumi yi, yi sɑ̃ɑwɑ yi Gusunɔ u gɔrimɑ yi kɑ tem bukiɑnɑ.

¹¹Mɑ dumi yin tii yi gɔrɑdo wi sɔ̃ɔwɑ yi nɛɛ, sɑ tem bukiɑnɑ sɑ wɑ mɛ kpuro mu wɑ̃ɑ bɔri yɛndu sɔɔ.

¹²Mɑ gɔrɑdo wi, u nɛɛ, Gusunɔ wɔllu kɑ tem Yinni, sere sɑɑ yerɑ̀ kɑɑ Yerusɑlɛmu kɑ Yudɑbɑn wuu si su tien wɔnwɔndu wɑ, si ɑ kɑ mɔru sɑ̃ɑ sɑɑ wɔ̃ɔ wɑtɑ kɑ wɔkurun di.

¹³Mɑ Yinni Gusunɔ u gɔrɑdo wi wisɑ kɑ gɑri dori yi yi nùn gɔ̃ru yɛmiɑ.

¹⁴Gɔrɑdo wi, u mɑɑ nùn sɔ̃ɔwɑ u nɛɛ, ɑ geruo ɑ nɛɛ, ɑmɛniwɑ wi, Yinni Gusunɔ u geruɑ. U nɛɛ, u Yerusɑlɛmu kɑ Siɔnin kĩru mɔ tɑ kpɑ̃.

¹⁵Mɛyɑ u kɑ bwese ni nu tii sue mɔru mɔ̀. Yellu u rɑɑ kɑ nu mɔru kuɑ fiiko. Mɑ nu Yerusɑlɛmu kɔ̃sɑ kuɑ.

¹⁶Yen sɔ̃nɑ wi, Gusunɔ wɔllu kɑ tem Yinni u nɛɛ, u koo Yerusɑlɛmun wɔnwɔndu ko. Bɑ koo win sɑ̃ɑ yeru bɑni. Kpɑ bu Yerusɑlɛmun kpɛɛkpɛɛku yĩire.

¹⁷Win wusu su koo dukiɑ yibu. U koo mɑɑ Yerusɑlɛmu nukuru yɛmiɑsiɑ. Kpɑ u mɑɑ ye gɔsi win tiin sɔ̃. Wi, Gusunɔ, wɔllu kɑ tem Yinniwɑ u yeni geruɑ.