Ʒekaria 1

1

2

3

4

5

6

7

8

9

10

11

12

13

14

¹Dariusi e ŋicwofuŋ erâ juhame jara 1 â mosa 7 tarawec. Ehame mosa namba 8 ira Berekiare ŋokâ â Idore ŋosa, porofete Ʒekaria hâcne, erao Wofuŋte dâŋ kecʒiŋuc fuawec:

²“Wofuŋ e mamacfâc‐ŋeŋic jaŋere boc aarickewec.

³Irec ʒiŋuc muhuc jazawec: Anutu Tâpiri Ɋuŋɋasaŋ Wofuŋ eki kecʒiŋuc mukac: Ŋoŋe norao risiepie noni maic‐ŋopapemu. Anutu Tâpiri Ɋuŋɋasaŋ Wofuŋ nore dâŋ iŋuc.

⁴Ŋoŋe kâcɋenefâc‐ŋeŋic jaŋere sâc mi junʒepieŋ, mârâc jaha porofete jumbiŋ jaŋe dâŋ ʒiŋuc jaza jumbieŋ: ‘Ŋoŋe hata‐ŋeŋic hehesicne â eebapa‐ŋeŋic sâqocne i moc behenʒepieŋ.’ Jaŋe ine dâŋnane mana rereŋ mi embiŋ, Wofuŋ nore dâŋ iŋuc.

⁵Mamacfâc‐ŋeŋic jaŋe weni? Â porofete jaŋe juju sanaŋ moc jueŋgopieŋ me?

⁶Kiŋaŋ qaqafâc‐nane, porofete hâcne, uŋsawaŋ â dâŋsanaŋ‐nane jazapo i mamacfâc‐ŋeŋic jaŋerao fâri fideteŋnehec ewec. Eme jaŋe maŋjeŋic bârisierâ mumbiŋ, Anutu Tâpiri Ɋuŋɋasaŋ Wofuŋ e juju â eebapa‐nâŋecte sâcko wiac enâreocte muwec irec sâc enârewec hâcne.”

⁷Dariusizi ŋicwofuŋ juhame jara 2 tarazo eha mosa namba 11, ʒâŋene Sebata i maickewec. Eme mosa irec ʒoaŋ gie bapa 24 ira Idore ŋosa Berekiare ŋokâ, porofete Ʒekaria hâcne, erao Wofuŋte dâŋ fuawec. Fuacneme eki kecʒiŋuc muwec:

⁸“Manaŋgopieŋ, no ŋafeo maŋʒâŋe‐nane ŋerisieme ŋic moc becâsic bâbâroŋko ŋehame honepac. E wâneŋko jâc dutu jaŋere ŋondeŋko domahame râpefuŋ‐ticnao becâsic gâgâpâc â bâbâroŋ erâ qaŋqaŋ domahapie honec‐jopapac.

⁹Iŋuc honerâ ʒiŋuc wiopac: ‘O bomboŋ‐nane, jaŋere fuŋne weniŋuc?’ Iŋuc wiope aŋelo nohec dâŋejec eki ʒiŋuc nazajec: ‘No fuŋne‐jeŋic gaza gowatuc epemu.’

¹⁰Eme jâc dutu jaŋere ŋondeŋko domajec ŋic eki ʒiŋuc nazajec: ‘Wofuŋzi mâreŋ sâko mâreŋ irec fuŋne hone manac eniŋte sorec‐jopawec jaŋe hâcne.’

¹¹Eme jaŋe Wofuŋte aŋelo jâc dutu jaŋere ŋondeŋko domajec e ʒiŋuc âzâcnembieŋ: ‘Manakic, nâŋe mâreŋ sâko mâreŋ fotâcnehuc ʒiŋuc honembeŋ: Mâreŋ e qiriŋmâc fokac.’

¹²Iŋuc mupie Wofuŋte aŋelozi kecʒiŋuc mujec: ‘O Anutu Tâpiri Ɋuŋɋasaŋ Wofuŋ, go Jerusalem â Juda hae ŋerakac jaŋe aaric mana‐jarehuc juhaŋtec jara 70 tarawec, irec mo dameŋko busâqoc moc mana‐jarecmu?’

¹³Eme Wofuŋzi aŋelo nohec dâŋejec e aki wama â bâbâmiriŋ dâŋ âzâcnejec.

¹⁴Âzâcneme aŋelozi ʒiŋuc nazajec: ‘Go hahaŋne bahuc muc: Anutu Tâpiri Ɋuŋɋasaŋ Wofuŋ e kecʒiŋuc mukac: No Jerusalem â Zioŋ kikefuŋ ŋoŋere bunane boc bâruŋkekac.

¹⁵Ŋicne ŋicne manabâc tâmiric jueŋgopieŋ jaŋe ine kimbeŋ hâhâwicne qajarekopac; jaŋe hâcne kimbeŋ afecne qaŋarehape sisipiric hâhâwicne fai‐ŋeŋicko râepie fewec.

¹⁶Irec hâcne Wofuŋzi ʒiŋuc mukac: No busâqoc manahuc Jerusalem mocwâc maickepo, irec ufuŋ‐nane mocwâc heɋârerâ bapie fuazejec, erâ mucsâc i Jerusalem haeo fârenʒepieŋ, Anutu Tâpiri Ɋuŋɋasaŋ Wofuŋ ere dâŋ iŋuc.

¹⁷Erâ harierâ hahaŋne bahuc ʒiŋuc muzemec: Anutu Tâpiri Ɋuŋɋasaŋ Wofuŋ e kecʒiŋuc mukac: Hae‐nane ŋerakac ira mazuc mâriri mocwâc fuarâ fozejec, ehame no Zioŋ bâmiriŋkehuc Jerusalem hae mocwâc bâwosâepemu.’”

¹⁸Eme no ʒâŋe fipe feme mi ʒuŋe 4 honec‐jopazepac i!

¹⁹Ehuc aŋelo nohec dâŋewec e ʒiŋuc muhuc wiocnepo: “Wiac keci jaŋere fuŋne weniŋuc?” Mupe muwec: “Ʒuŋe keci jaŋe hâcne Juda â Israe erâ Jerusalem qâtâtiec‐jopambiŋ.”

²⁰Eme Wofuŋ e aeŋ bapa ŋic 4 nowatuwec.

²¹Eme mupo: “Jaŋe wemo gie baniŋte warembiŋ?” Mupe muwec: “Ʒuŋe 4 keci jaŋe Juda kikefuŋ bâtâtiec‐jopa‐jâmbâŋkepie mocwâc turerâ juniŋte eipiembiŋ. Aeŋ bapa ŋic 4 jaŋe ine Juda kikefuŋ qâturec‐jopaniŋte warembiŋ, ehuc ŋicne ŋicne jaŋe kikefuŋ bâtâtiec‐jopaniŋte ʒuŋe‐jeŋic bâfeŋnembiŋ i hâcne hezu henʒaŋ eniŋte warembiŋ.”