Zacarías 1

1

2

3

4

5

6

7

8

9

10

11

12

13

14

¹Rey-Darío birgabogus negsemaidgine, nii-walabaabakgine, Bab-Jehová Iddo-wagwa-Berequías-e-machi-Zacaríasʼga weyob sunmaknonikid:

²“Ani Bab-Jehová be-dadgangi bela-bela urwemai gusad.

³Degisoggu, dulemarga be sogo, Bab-Jehová-Bela-Gangued-Nikad weyob sogye: ‘Be gannar an-amimala, geb, an gannar bemarba gudii saoed.’ ”

⁴Bab-Jehová-Bela-Gangued-Nikad weyob soged: “Mer be be-dadgan-gudigusmaladyob gumala. Be-dadgangala Bab-Dummad-gayaburba-barsogmalad, Bab-Dummad-Bela-Gangued-Nikad weyob sogye sogsamalanad: ‘Mer bar galagwensuli-gudii gumarye. Mer bar ibmar-isgana imakmarye.’ Degi-inigwele, gwen anba ibsassurmalad, gwen an-itossurmalad.”

⁵Bab-Jehová sogdebalid: “Emide, be-dadgan, ¿bia nadmala? ¿Ar an-gayaburba-barsogmalad amba dula-gudidimala?

⁶Ar an-maimar-an-gayaburba-barsogmaladga an-gayaburbamar, degi, an-igarmar-an-sogsagusadi, ¿be-dadgangi deyob gunonisursi? Deyob gunoniki.” A-ulale, be-dadgan gannar Bab-Jehová-aminonimalad, geb weyob sogsamalad: “Ar anmar-daedbali, degi, anmar-ibmar-imakedbali, na igi Bab-Dummad-Bela-Gangued-Nikad anmar-imakoye sogsa-gusa, deyobi anmar-imaksad.”

⁷Rey-Darío-birgabogus-negsemaidgi, nii-warambe-gakagwensakgi, nii-Sebatʼye-bilegedgi, a-iba-dulagwen-gakabakegi, Bab-Jehová, e-gayaburba-barsoged-Zacaríasʼga gabgine ibmar oyosad. Zacaríasʼde Iddo-wagwad, Berequías-e-machid.

⁸Ani Zacarías mutikidbali negburgan dakalid. Dule-gwensak moli-gisigwad-birgi-sii-daniki an dakalid. We-dule, neba-naidgi, sapimar-arrayánʼye-nugad-imbaba nagunonikid. We-dule-yarganbali dulemar-bukidar molimar-gisigwad-birgi-sii, molimar-goro-goro-dakleged-birgi-sii, degi, molimar-sipugwad-birgi-sii an daksad.

⁹Geb an dulese egichided: “Dummad, we-dulemar-moli-birgi-bukwamalad, ¿wede ibu obare?” Agine, baliwitur-anbo-sunmaknaid an-abin-imakded: “An bega sogoed, wede ibu obare.”

¹⁰Dule-sapimar-arrayánʼye-nugad-imbaba-gwichid anga sogded: “Bab-Jehová we-dulemar-moli-birgi-bukwamaladi, bela we-napneggi-bipirmakega barmialid.”

¹¹Geb dulemar-moli-birgi-bukwamaladi Bab-Jehová-e-baliwitur-sapi-arrayánʼmarye-nugad-abargi-gwichidga sogdemalad: “Anmar bela we-napneggi bipirmaksad. Anmar napneg bogidik-nai daksamalad, bonisuli an daksamarbalid.”

¹²Bab-Jehová-e-baliwitur weyob-itosgua, sogded: “Bab-Jehová-Bela-Gangued-Nikadye, birga-dulapaa-gakambegusa (70) be Jerusalén-dulemargi-urwedanikid, degi, be Judá-dulemargi-urwedanikid, ¿wede, we-neggweburmar be gannar wiledakega birgabigwa napi?”

¹³Bab-Jehová, baliwitur-anga-sunmaknaidga nuekwaa sunmaksad, mer bukib-binsaed-gayaburba ega sogsad.

¹⁴Geb baliwitur anga sogded: “Weyob be sogo: ‘Bab-Jehová-Bela-Gangued-Nikad weyob sogye: An bela-bela Sión-yar-sabedbali, an nue egi nobed. An bela-bela Jerusalén-neggwebur-sabedbali, an nue egi nobed.

¹⁵Ar dulemar-yar-baid-baidgi-bukwad-san-dummarba-imakdimaladgindi, an urwemaid. An bela-bela urwemaisulinad, ar emar bela-bela-an-ourwega an-imaksamalad.

¹⁶” ’Degisoggu, Bab-Jehová weyob soged: An gannar Jerusalén-neggwebur wiledaknonikoed. Agine, anse-goled-neg gannar soblenonikoed, an gannar neggwebur nue-ilemaknai imakoed.’ ” Bab-Jehová-Bela-Gangued-Nikadi weyob soged:

¹⁷“Aginbali, Bab-Jehová-Bela-Gangued-Nikad-e-nuggi be weyob sogbali: ‘Gannar an-neggweburmar ibmar-nuegan-nikuega an imakoed. Gannar Bab-Jehová Sión-yar-wiledaknonikoed. Gannar Jerusalén-neggwebur egadga imaknonikoed.’ ”

¹⁸An niba-atakdegua, an-asabin walabake moli-bebemar nodaniki an daksad.

¹⁹Geb an baliwitur-anbo-sunmaknaidsega egisded: “We-bebemarde, ¿ibu obare?” Baliwitur anga weyob sogded: “We-moli-bebemar reymar-gangued-nikamalad oyoged. We-reymar e-gangued-nikadbali Judá-dulemar, Israel-dulemar, degi, Jerusalén-dulemar-oaisakiega imaksamalad.”

²⁰Geb sorbali, Bab-Jehová anga walabake dule-esgorogi-arbamalad oyosad.

²¹Geb Bab-Jehováʼse an egisded: “Wemardi, ¿ibu imakega danimala?” Geb Bab-Jehová anga sogded: “We-moli-bebemar, reymar-gargangued-nikamalad oyoged. We-reymar Judá-dulemar-oaisakiega imaksamalad. Dule-wargwensaale e-abin gwisgussulid. We-dule-esgorogi-arbamaladi, we-bebemar-walabakegwad ogwayega nonimalad. Deginbali, dulemar-yar-baid-baidgi-bukwamalad-e-gangued-nikad-obelogega nonimarbalid. Ar we-bebemar Judá-dulemar-oaisakis gusmalad.”