Misee 6

1

2

3

4

5

6

7

¹Ḿpʋ́ɣʋ́ Misee tɔmɑ sɩ: Ɩ́ ke ŋkpɑŋŋ nɑ ɩ́ nɩɩ Tɑcɑɑ tɔm. Ɩ́ kʋlɩ nɑ ɩ́ wiinɑ pɔ́ɔ́ŋ nɑ pulɑsɩ nɑ sɩ́ nɩɩ mǝ nɔɣɔ.

²Pɔ́ɔ́ŋ, nɑ tɛtʋ kite nyɑ́ wei nn ciɣitiɣi tɔ. Ɩ́ nɩɩ sɩ Tɑcɑɑ kɑlǝɣǝnɑ ɩ yǝlɑɑ nɑ ɩ́ pɔɔsǝɣɩ-wɛɣɛ pɑ kʋlɑpʋtʋ sɩ:

³Mɑ yǝlɑɑ mɛ, ɩsɑɣɑtʋ ntiɣi mɑ lɑpɑ mɛ? Wenteɣe mɑ tʋ-mɛ nɑ tǝ́ tɛɛ-mɛ? Ɩ́ cɔ-m.

⁴Anɩ mɑ cɛpɑ-mɛɣɛ mǝ yomle tɑɑ kɛ́ Icipiti. Mɑ lǝsɑ-mɛ nɑ mɑ́ kpɑ Moisi nɑ Alɔŋ nɑ Mɑlǝyɑm, nɑ pɑ́ pɑɑsǝnɑ-mɛ.

⁵Ɩ́ tɔɔsɩ ɩsɑɣɑtʋ nti Mowɑpʋ wulɑʋ Pɑlɑkɩ cɑɑkɑɣɑ-mɛɣɛ lɑpʋ tɔ, nɑ nti Peyɔɔ pǝyɑlʋ Pɑlɑɑm cɔ-ɩ tɔ. Ɩ́ tɔɔsɩ ɩsǝnɑ mɑ tɛsǝnɑ-mɛɣɛ Yɑɑtɑnɩ pɔɣɔ tɔ. Sitim nɑ Kilikɑɑ pɑ hɛkʋ kɛ mɑ lɑpɑ-mɛɣɛ kʋpɑntʋ.

⁶Ɩ́ pɔɔsǝɣɩ mǝ tɩ sɩ ye ɩ́ kɔŋ Tɑcɑɑ Tomɑ tǝnɑ tʋ sɛɛʋ, pǝnɑɣɑ kʋlʋmɑɣɑ kʋlʋmɑɣɑ nɑɑŋ kɛ ɩ́ kɑ́ lɑpɩ-ɩ kɔtɑɣɑ ŋkɑ kɔkɔ nyɑɣɑ kɑ tǝnɑ tɔ,

⁷yɑɑ ɩwɑɑŋ tuutuumɑ, nɑ nim kɛ sɔsɔm, yɑɑ mǝ kɑncɑɑlɑɣɑ piyɑ kɛ mɑ tɑŋɑɑ sɩ ɩ́ lɑ-m kɔtɑɣɑ nɑ pǝ́cɔ́ mɑ́ tɑɣɑnɩ mǝ ɩsɑɣɑtʋ nɑ?

⁸Pɑ sɛɣɛsɑ-mɛɣɛ ɩsǝnɑ mɑ cɑɑkɩ sɩ ɩ́ tǝŋ tɑmpɑnɑ tɔ. Ɩlɛnɑ ɩ́ lɑkɩ tǝmɑɣɑ kʋpɑntʋ nɑ ɩ́ pɑsɑ mǝ tɩ nɑ mɑnɑ-mɛ tǝ́ tɔŋ.

⁹Yutɑ yǝlɑɑ mɛ mpɑ mǝ tǝnɑ ɩ́ kotɑ ɩcɑtɛ tɑɑ tɔ ɩ́ nɩɩ. Mɛɣɛ mɑ yɔɣɔtǝɣǝnɑ nɑ mɑ wɑɑsǝɣɩ mpɑ pɑ wɛnɑ mɑ sɔɣɔntʋ tɔ.

¹⁰Pǝ fɛɩ-m teu sɩ ɑsɑɣɑɑ ɩ́ kɑɑ pɑ tɛɛsɩ tɑɑ kɛ́ pɑ ŋmɩɩlǝm wɛnɑʋ, nɑ pɑ́ lɑkǝnɑ. Mɑɑ cɑɑkɩ mǝ mpusi mɑɣɑsǝlɑɣɑ kʋtʋsɑɣɑ.

¹¹Mɑ kɑɑ hʋlɩ suulu kɛ yǝlɑɑ mpɑ pɑ lɑkǝnɑ sɑnǝyɑnɑɑ mpɑ pɑ tɑ tǝŋ tɔ.

¹²Mʋsʋŋ ɑkpɑɑ kɛ ɩcɑtɛ tǝnɛ tǝ toŋtʋnɑɑ tǝŋǝɣɩ. Mǝ tǝnɑ ɩ́ kɛ́ tʋsʋlɑɑ.

¹³Tɔʋ, mɑ nɑɑlɑ-mɛɣɛ lɑpʋ ntɛ́ mpi pɩɩ wɑkǝlɩ-mɛ tɔɣɔ mǝ ɩsɑɣɑtʋ tɔɔ.

¹⁴Ɩ́ kɑ́ tɔɣɔ ɩ́ kɑɑ hɑɣɑ, pɑɑ wiliɣi nyɔɣɔsɩ kɛ mǝ tɛɣɛ tɑm. Pɑɑ mpiɣi ɩ́ kɑ́ ŋmɛsɩ ɩsɩɩ mɑ kɔnɑ yoou nɑ kʋ wɑkǝlɩ-wɩ.

¹⁵Ɩ́ kɑ́ tuu ɩ́ kɑɑ kʋ, Ɩ́ kɑ́ mʋlɩ nim, ɩ́ kɑɑ lɑnɑ-wɩ. Ɩ́ kɑ́ puu sʋlʋm ɩ́ kɑɑ nyɔɔ-wɩ.

¹⁶Wulɑʋ Omili nɑ ɩ pǝyɑlʋ Akɑpɩ, nɑ ɩ piitim pɑ ɩkpɑtɛ ɩsɑɣɑlɛ kɛ ɩ́ tɔkɑɑ tǝkem nɑ ɩ́ tǝŋǝɣɩ. Pǝ tɔɔ kɛ́ mɑɑ yele nɑ mǝ ɩcɑtɛ pǝsɩ ncɑɑlɛ nɑ pɑ́ woŋiɣi-mɛ. Ɩ́ kɑ́ tɔɣɔ mɑ yǝlɑɑ tǝnɑ fɛɛlɛ.