Mise 6

1

2

3

4

5

6

7

¹Dégluleen rekk li Aji Sax ji wax: Jógal layoo, tund yu mag yi seede, tund yu ndaw yi dégg la.

²Yeen tund yu mag yi, dégluleen layoob Aji Sax ji, ak yeen kenuy suuf yi sax dàkk. Aji Sax jee joteek ñoñam, mooy wàqanteek Israyil.

³Yeen sama ñoñ, ana lu ma leen def? Ana fu ma leen sonale? Waxleen ma!

⁴Yeen maa leen génnee réewum Misra, kërug njaam googa, maa leen fa jote, ba yebal fi seen kanam, Musaa ak Aaróonaak Maryaama.

⁵Yeen sama ñoñ, fàttlikuleen rekk la leen Balag buurub Mowab fexeeloon, ak la ko Balaam doomu Bewor tontu woon. Doxub diggante Sitim ba Gilgal it, baleen ci xel, ba ràññee njekku Aji Sax ji.

⁶Ana lu may dikkaale fi kanam Aji Sax ji, ba sujjóotal Yàlla jooja fa kaw. Tee ma koo dikke ay rendi-dóomal, ay wëlluy menn at?

⁷Mbaa dina ma nangul junniy kuuy, ak fukki junniy dexi diw? Am samab taaw laay joxe saraxu peyu bàkkaar, sama meññeefum biir di sama saraxu peyug tooñ ?

⁸Yaw nit ki, waxees na la li baax, ak li Aji Sax ji sàkku ci yaw, te loolu moyul di def yoon, sopp jëfi ngor te woyof nooy toppe sa Yàlla.

⁹Baatub Aji Sax ji mooy joor dëkk bi, te ndam mooy ñeel ñi wormaal sa tur. «Dégluleen seen yetu mbugal, ak ki ko yebal,

¹⁰ndax alalu njublaŋ a ngi ci biir këri njublaŋ yi ba tey, mook nattukaayi alkànde yu tuut ya ñuy jaaye?

¹¹Ana nu may ñàkka toppe màndaxekaayi njublaŋ, ak mbuusum doomi naxekaay yees cay natte?

¹²Boroom alal yi ci sa biir, aw ay lañu fees, waa dëkk bi di fen, te lu seen làmmiñ tudd ay nax la.

¹³Man it moo tax ma di la duma ba nga wopp, gental la ndax say bàkkaar.

¹⁴Yaw de dinga lekk, te doo suur, xanaa wéye biir bu wéet. Dinga fat loo dul mana denc fu wóor, te loo denc fu wóor it, ab saamar laa koy jox.

¹⁵Yaw de yaay ji te doo góob, nga nal doomi oliw te doo ca diwu, nal doomi reseñ te doo naan biiñ.

¹⁶Dogali Buur Omri daal lees di topp, ak mboolem jëfini waa kër Buur Axab. Seeni pexe ngeen topp, ba tax may def dëkk bi di lu daw yaram, waa dëkk bi di ñu nit ñiy muslu ci seenu demin, te gàcceg sama ñoñ, yeena koy gàlloo.»