1À woilo deɠɛmu naa ma, nii Ɠɔoɠɔ GALAGI bosu: Wuzeɠe, è lukpɔ gizeiti kakala, gize goiti ti è-wooi mɛni!
2À woilo, wa ʋe, gizeiti, Ɠɔoɠɔ GALAGI ná-tukpɔɠaaleʋeai ma, wa ɓalaa zooi wu ɓɛdɛgiti ti la ɲiikpiga pɛ! Mazɔlɔɔ tukpɔi ɠa Ɠɔoɠɔ GALAGI ta ná-nuɓusɛiti zɔɠɔzu, kpɔɛi ɠa ti yɔɠɔzu ta Izelayɛle nuiti.
3Maliɠii ɠɛ ma: «Nà-nuɓusɛiti, leeni ɠa gè kɛai ga woye? Leeni ɠa gè wo ɓɔlɔni la? À gòoi ɠaaʋote dɛɛ!
4Tɔɔzei gè wo ɠulani Ezipete yooi ʋa, wo ʋa ʋɛ! Gè wo unmɔɔni, gè wo ɠula duɔlai zu! Gè Moize ta Aalɔn ta Miliyameni toni wo luɠɔ!
5Nà-nuɓusɛiti, à ɠizɛ su ga, Moaɓe masagi Ɓalake faa ɲɔi leveni wo laalɔɠɔma, wo ɠizɛ naa zu, nii Ɓeyɔɔl ná-doun zunui Ɓalaame gooɠaaʋoteni da. Gè yɛni wo ʋa, é zo Sitime é li Gilegale, wo kɛ̀ɛwotiiti kaani, niiti ti zɔlegai, nɛ̀i gè ga Ɠɔoɠɔ GALAGI.»
6Leeni ɠa nà li gè lo da, Ɠɔoɠɔ GALAGI ɠaazu, siɛgi zu gè liizu nɔkɔsu da tɔun bu, GALAGI é Anii-Pɛ-Unda? Gala zalaɠaiti ka nà li ga tiye pɔ ɓaa, ti ga kona gila nikɛ yiʋoiti?
7Ɠɔoɠɔ GALAGI ɠa yeezei nɛi, baala sinɛ ɓulugiti bu? Ɓaa gulɔi ma ɓoigi la eɠɛ ziɛ wolaiti? Ɓaa gè dòun mɔungi ve nà-tɔ koloɠologiti faa zu, nii a kɛ é nà-kotoiti suvaayɛ?
8Ee, ɗa ʋe nui, ti è ɠalagɛ ga tuʋa ʋele ʋagɔi, ta nii Ɠɔoɠɔ GALAGI wɔinni ga è kɛ, toɠa ga è ziɛ ga sɔledai, wooɠɛɠiladai nɛɛ è ʋɛ, è ɗa ziɛ la, è ziɛ ga pagɔ unmaayei zu, ga ɗa-ƓALAGI yiima ʋelei.
9Ɠɔoɠɔ GALAGI ɠa ɓɔɛzu taa wolai ʋɔ, ɠimalai ɠa ga nu unfe daaseigi ma: «À woilo zelii ma, é losu wo ma, wo maaɠolo vai zu, wo woilo naa wooi ma, zɔi é devei wosu!
10Nà zoo nɛi gè va bu ga faa ɲɔu ɠɛ nuiti ti ta-ʋɛlɛiti buulaave ga naavoloi sɔlɔɔgai yaavai zu? Ta zɛɛ ɠɔɠɔ bo ganiiti, ti la kula ɠɛɛni su, naati wɔin la mà?
11Gè la zeliloga naati ma ɓaa, zɔiti ti zɛɛ ɠɔɠɔ ganiiti seɠezu ta-ɓɔlɔi zu, ti ɗa nuiti yaava la?
12Taai tɛi su naavolo nuiti ta ga tooma nuiti, taaʋeai tɛiti ta ɗa zɛɛi wo, yaava nɛgi ɠa é ti-la.
13Naa ɠa é ba, nà wo zopele ɲɔuzu eyɛsu wo zeeɓɛ, gè wo ɠoloɠolo wa-ɠotoiti faa zu.
14Wa daami wo, wo la yiɠoa, pului la zeɠea wo ma. Zɔi wa makɛ, naa la makɛga. Zɔi wa ɓaa maazu, nà naa ɠoloɠolo ga kɔɔi.
15Wa faza, kɛlɛ wo la teʋea. Wa wolive wulɔi ɓɛtɛ, wo la wo-maavaa ɠɛa ga ta, wa dɔɔ ɓɔigi ɓɛtɛ, kɛlɛ wo la ma lɔɔi ta pa kpɔlea.
16Wa ziɛzu ga pele ɲɔi masagi Wɔmeli dɛɛni, ta Akaɓe ná-pɛlɛyeɠei ziɛ ʋelei ɠa wo ziɛzu la. Naa ɠa é ba, nà ʋaazu ga wa-laai ɠoloɠolo saɓui. Nà wo ɠɛ ga ɲɛɛɠulasu anii, nà-nuɓusɛiti ta-unfegi ma ɠasɔi ɠa la wo unma.»
