MIKA 6

1

2

3

4

5

6

7

¹Iehova ena hereva a kamonai: A tore isi, ororo vairadiai emui gini-kau gabuna ba herevalaia, ororo komutadia na gadomui bae kamonai.

²Ororo e, Iehova ena gwau-gwau herevadia a kamonai, tanobada badidia, o mia hanaihanaimu gabudia, danu a kamonai; badina be Iehova ese ena bese taudia e gwau henidiamu, ia ese Israel baine heai henia.

³Egu bese taumui e, ede vada na karamui toma? Ede vada na hahisihisimui toma? A haere henigu.

⁴Badina be Aigupto tanona amo na hakaumui lasi, iḡui rumana amo na hamaurimui; Mose bona Aaron bona Miriama na umui vairamui ai na siaidia guna.

⁵Egu bese taumui e, ba laloa, Balak, Moab pavapavana, ena lalo-hata be dahaka, bona Balaam Beoro ese ede e haere henia toma, bona Sitim ela bona Gilgal dahaka e vara; bena Iehova ena hahemauri karadia ba diba.

⁶Dahaka baina mailai Iehova vairanai, atai Diravana baina toma henia diho totona? Ḡole-oho boubou ḡaudia ia vairanai baina mailaidia a? Boromakau natudia, laḡani tamona ḡaudia, a?

⁷Iehova ese nani mamaruanedia daha daha baine moalelaidia a? Eiava dehoro sinavaidia gerebu gerebu a? Natugu roboana baina heni, egu kerere davana, a? tau-anigu amo e vara ḡauna baina heni, laumagu ena dika davana, a?

⁸Taunimanima e, ia ese vada e hamaoromu, kara namona be dahaka, Iehova ena ura oiemu ai be dahaka. Ina mo: ba hahemaoro ḡoevaḡoeva, hebogahisi ba ura henia, bona emu Dirava ida ba raka hebou mai manaumu ida, ani?

⁹Iehova gadona ese hanua e boi heniamu, (oi ladamu igarilaina na aonega namona), e tomu: Bese laumui boua hanua laumui e, a kamonai!

¹⁰Kara dika kohudia, kara dika taudia edia ruma ai, bona hahetoho koikoi karadia, e uduguiraidiamu gaudia, baina lalodia boio diba a?

¹¹Mai ena hahetoho ḡauna dikana bona ena hahetoho auridia koikoidia modana tauna na maorona baina gwauraia a?

¹²Emui taḡa taudia na daḡedaḡe ai e honumu; emui hanua taudia na e hereva koikoimu, maladia na mai koikoidia, ududia lalodiai.

¹³Taunabunai lau ese vada na rahumui mase matama; vada na habuamui, emui kara dika daidiai.

¹⁴Bavaniani, a bogamui basie kunu, tau-animui do bae hitolo; ḡau bavato tabe, to basio gogo, bona ba gogo ḡaudia na lau ese dare baina henia.

¹⁵Ba hadohado, to basio ḡeiḡei; olive huahuadia ba moimoilai, to kopimui na dehorodia basio dahulai; vine huahuadia ba moimoilai, to vine ranuna basio inua.

¹⁶Badina be Omri ena taravatu vada o badinadia, bona Ahaba iduhuna ena ḡaukara idoinai danu, bona edia hahealo ai vada o raka; una dainai baina habuamui tari, emui hanua taudia na bae si henidia, bona bese idau-idau ese bae ihi-ihiraimui.