1Pal o Šabbat (sombat), sar avel avri o kham pro ešebno džives andro kurko, gele e Maria Magdalena the oki dujto Maria te dikhel o hrobos.
2A dikh, e phuv zorales razisaľiľa, bo o aňjelos le Rajeskero avľa tele andral o ňebos, odcirdľa o bar pašal o hrobos a bešľa peske upre.
3Ov dičholas avri sar bleskos a leskere gada sas parne sar jiv.
4O slugaďa pes lestar avke daranďile, hoj ačhile sar mule.
5Ale o aňjelos phenďa le džuvľenge: “Tumen ma daran! Bo džanav, hoj roden le Ježiš, savo sas ukrižimen.
6Nane ade, bo ušťiľa andral o meriben, avke sar phenďa. Aven, dikhen oda than, kaj pašľolas.
7Džan sigo te phenel leskere učeňikenge, hoj ušťiľa andral o meriben a džal anglal tumende andre Galileja. Ode les dikhena. Leperen tumenge oda, so phenďom!”
8Avle sigo avri andral o hrobos a daraha the bare radišagoha denašenas oda te phenel leskere učeňikenge.
9Androda jekhvareste pes lenca o Ježiš arakhľa a phenďa lenge: “Smirom tumenge!” On avle ke leste, banďonas anglal leste a chudenas pes leskere pindrendar.
10Akor lenge o Ježiš phenďa: “Ma daran tumen! Džan te phenel mire phralenge, hoj te džan andre Galileja. Ode man dikhena.”
11Sar o džuvľa džanas ko učeňika, varesave ole slugaďendar odgele andro foros a phende le nekbaredere rašajenge savoro, so pes ačhiľa.
12Sar pes zgele le phurederenca te dovakerel, dine le slugaďen but love
13a phende: “Phenen, hoj leskere učeňika avle rači a čorde les medik tumen sovenas.
14A te pes oda došunela o Pilat, amen les prevakeraha, hoj tumen te na el starišagos.”
15O slugaďa ile o love a kerde avke, sar lenge sas phendo. A kada vakeriben pes rozľigenďa maškar o Židi dži adadžives.
16O dešujekh (11) učeňika gele andre Galileja pre oda verchos, kaj lenge phenďa o Ježiš.
17Sar les dikhle, banďonas anglal leste, ale varesave pochibinenas.
18O Ježiš avľa ke lende a phenďa: “Hin mange diňi savori zor pro ňebos the pre phuv.
19Avke džan a keren mange učeňiken andral savore narodi. Bolen len andro nav le Dadeskero, le Čhaskero the le Sentne Duchoskero
20a sikaven len te doľikerel savoro, so tumenge prikazinďom. Dikhen, me som tumenca pal savore dživesa, medik na ela o koňec le svetoskero.”
