1Mni fruhu kna vgaregeno ese knazupa ame nanterampi, Makdala kumateti Maria ene Mariake matimati havega kenaku e'na'e.
2Ame huno tusi'a imikrefa erine, na'ankure Ramofo ankeromo monafinti eramino matite runkani re'naza have eme revahe hugantu atreno ana agofetu manine.
3Ana ankeromofo masa'amo'a kopsinamoma hiaza nehiegeno, kukena'amo'a efeke hampomo'ma hiaza hu'ne.
4Matite kva hu'naza vahe'mo'za ana ne'ku tusi agoro hunente'za zmahiritege'za fri vahe kna hu'naze.
5Hianagi ankeromo'a ana a'trena zanismino korora osi'o, na'ankure nagra antahinue, Jisasima rugeka zafare ahe'zama hantinaza neku eme nehaka'e.
6Agra amafina omanine, na'ankure koma hu'nea kante oti'ne. Amare eta ante'nazafina eme ke'o.
7Ame' hutna amage nentaza disaipol nagara, Agra ko fripintira otine huta ome smasami'o, Galili vugotegahianki Agrira anantega ome kegahaze. Nagrama tanasamua nanekea antahi ankere'o.
8Higeke ana keria atreke kore nehune tusi musezampi zanagareke amage nentaza nagatega ananke zamasminaku vu'na'e.
9Antari ha'aza huno Jisasi'a tutagiha huznenteno, nanterane huznategeke, znagra Agrite eke agiare azeri hanavetineke mono huntena'e.
10Anante Jisasi zanasmino korora osio, vutna nafuheina Galili viho hutna ome zamismi'o. Anantega Nagrira nagegahaze.
11Ana a'trema nevake'za matitema kva hunaza sondia vahepinti, mago'amo'za rankuma agu'a ufre'za, fore'ma hu'nea zama'a maka ugagota prisi vahetaminte huama hu'naze.
12Hagi vugota prisi vahe'mo'za mono kva vahe enema atru hu'za kema retro hute'za, ana sondia vahe'mokizamia rama'a zago nezamiza,
13anage hu'za zmasmi'naze, amanahu ke tamagra hugahaze. Amage'ma nentaza disaipol nagamo'za ana nera kenage'afi tavu mase'nonke'za kerfa'a musufa emeriza fre'naze, hutma hiho.
14Ama kemo'ma rankuma kva (Gavana) ne'mofo agesare hanigeta, tagra kaziga avrenenteta, hazenkefima ufreku hanazana tmaza hugahune.
15Hige'za sondia vahe'moza ana zago eneri'za, zamisminaza kante kea Jiu vahepina huganti kma hazage'za ana kemo'a meninena meno ne-e.
16Ananteti 11ni'a Jisasi amage nentaza disaipol naga'moza Galili vu'za, Jisasi'ma zmasamino vihoma hu'nea agonare uhanati'naze.
17Agri'ma ome nege'za, mono hunte'naze. Hianagi mago'amo'za tare antahintahi hu'naze.
18Anante Jisasi zmagrite eno amanage hu'ne, maka monafine mopafinema kegvahu hihamu'a, Anumzamo'a ko Nagri namine.
19E'ina hunegu kokankoka vutma, namage ante disaipol naga zmazeri retro hunezmanteta, Nefa agifine, Mofavre'amofo agifine, Ruotge Avamumofo agifi mono tina frenezamanteta,
20Nagrama huramantoa kasege rempi huzaminke'za ana miko vahe'mo'za avaririho. Hagi kma antahiho, Hakare zupa tamagra ne manina nevanenkeno mafkaza vgaregahie.
