Mataio 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Sabata hombaŋ tarame Sondao hae fufurecte Maria Madala haeonec â Maria âgone jahe ʒâŋeruŋ honenicte rapic.

²Rahapire homeŋ sâko ɋeŋfâfâc jaha bame Wofuŋte aŋelo moczi sambâŋkonec waharâ qânâ tuŋkeme rârieme fainao ŋewec.

³Hawari‐ticne bâbâric hawari â ŋaqi‐ticne qaŋqaŋ kisieckekicne.

⁴Eme soŋaŋ jaŋe honerâ maŋjeŋic bâzickeme hâhâmocne ejareme forambiŋ.

⁵Eme ŋokac rafisipire aŋelozi ʒiŋuc jasawec: “Ŋohe mi hâwic‐ŋofaoc, no manakopac, ŋohe Jesu maripoŋko qakicne e honenicte warekopirec.

⁶Erâ e ʒira aricne, e qanaŋ ŋazawec iŋuc erâ faharejec. Ŋohe ware fofotacne ʒi honenic.

⁷Erâ biac rarâ motecfâcne ʒiŋuc jazanic: ‘Jesu e hâmockonec faharejec, erâ Galilaia mâreŋko rahuc bânie‐ŋareocmu, ŋoŋe ira honeniŋmu.’ Dâŋ ine hâcne ŋasakopac.”

⁸Eme jahe biac jaha ʒâŋeruŋ râpeckerâ hâhâwic â ʒeri sâko mâmâc manahuc motecfâcne biŋedâŋ jazanicte gagasac jaha rapic.

⁹Rahapire mi Jesuzi bâfuac‐jofazejec i! Bâfuac‐jofarâ jasawec, “Ʒeri enic.” Iŋuc mume jahe maŋfuŋnao fodaperâ kikenao ropic.

¹⁰Eme Jesuzi ʒiŋuc jasawec: “Ŋohe mi hâwic‐ŋofaoc, ra qomâfâc‐nane jazapire Galilaia mâreŋko fârâ honecnuniŋmu.”

¹¹Ŋokac jahe rahapire ʒâŋeruŋ soŋaŋ jaŋeraonec gâcne biac haeo gasacke ferâ mi wiac fuawec irec binaŋ taha bapa micne jaza‐fârenʒepieŋ i!

¹²Eme jaŋe soŋaŋ hefârec‐joparâ jaŋehec dâŋ muc manac erâ momori moneŋ bocjaha jarembiŋ,

¹³ehuc ʒiŋuc jazambiŋ: “Ŋoŋe kecʒiŋuc munʒepieŋ, ‘Ŋafeo guŋ fohapene motecfâcne jaŋe fisirâ qâŋɋâŋ‐ticne fiuc rombieŋ.’

¹⁴Dâŋ i kiazi manarâ wiac moc eŋarezacte mi hâwic‐ŋopazejec, nâŋe sâcne mu bâmâteŋ ecnenaŋmu.”

¹⁵Iŋuc muhuc jazapie momori jaŋe moneŋ i rorâ dâŋ jazakicne i reŋkembiŋ. Eme irec burecdâŋ i Judaŋic jaŋerao haŋ barâ foweczi fokac jaha.

¹⁶Motec 11 jaŋe ine Galilaia mâreŋko tiki moc Jesuzi qanaŋ mutâcne‐jarewec ira fembiŋ.

¹⁷Ferâ e jahacne honerâ erao fodapembiŋ. Moc moczi ine maŋguru embiŋ.

¹⁸Eme Jesuzi maŋfuŋ‐jeŋicko rarâ kecʒiŋuc muhuc jazawec: “Tâpiri sasawa sambâŋte â mâreŋte no nare‐fârekicne.

¹⁹Irec ŋoŋe mâreŋne mâreŋne rahuc ŋic gurune gurune kikefuŋfâc‐nane bacjopanʒepieŋ, ehuc Mamac â Ŋokâ â Tiri Mâro ere ʒâŋeo ʒuhuc‐jopahuc Miti Opâ rua‐jarenʒepieŋ.

²⁰Â dâŋ ŋaza mutâc ehuc jupo i qazu‐jarepie reŋke‐fârenʒepieŋ. Erâ ŋazape mananiŋ, no ʒoaŋne ʒoaŋne ŋoŋehec juhape mâreŋte dameŋ tarazokac.”