1Andre ola dživesa avľa o Jan Krsťiťeľ a kazinelas pre Judsko pušťa
2a phenelas: “Visaren tumen le binendar! Bo pašes hin le ňeboskero kraľišagos!”
3O Jan hin oda, pal savo imar anglal phenďa o prorokos Izaiaš: “Kada hin o hangos, so vičinel pre pušťa: ‘Pririchtinen o drom le Rajeske, rovňaren avri leske o chodňiki!’ ”
4Oda Jan sas urdo andro gada la ťavakera srsťatar, pašal o per les sas cipuno sirimos a chalas kobilki the maľakero medos.
5Akor avenas ke leste o manuša andral calo Jeruzalem, caľi Judsko the caľi phuv pašal o paňi Jordan
6a phenenas avri peskere bini a ov len bolelas andro paňi Jordan.
7A sar dikhľa but Farizejen the Saducejen, hoj aven pre leskero boľipen, phenďa lenge: “Fajta sapengeri, ko tumenge sikaďa, sar te denašel le Devleskera choľatar, so avela?
8Akor dživen avke, hoj o nipi te dikhen, hoj pes tumen visarďan tumare binendar!
9Ma gondoľinen tumenge, hoj phenena: ‘Se o Abraham hino amaro dad!’ Bo phenav tumenge, hoj o Del kale barendar šaj kerel čhaven le Abrahamoske!
10O tover imar hino prithodo paš o koreňis le stromengero a dojekh stromos, savo na anel lačho ovocje, pes čhinel avri a čhivel pre jag.
11Me tumen bolav le paňeha, hoj pes te sikavel, hoj tumen pes visarďan le binendar, ale oda, savo avel pal ma, hino zoraleder sar me. Na som hodno leske mek aňi o sandalki te ľidžal. Ov tumen bolela le Sentne Duchoha the la jagaha.
12Andre leskero vast hin o vejaris a ov prežužarela peskero humnos. O prežužardo ďiv (zrnos) sthovela andre peskeri šopa, ale o phus labarela andre jag, so šoha (ňikda) na murdaľola.”
13Akor avľa o Ježiš andral e Galileja paš o Jordan pal o Jan, hoj pes leske te del te bolel.
14No o Jan leske na kamľa te domukel a phenelas: “Mange kampel, hoj te avav boldo tutar a tu aves pal ma?”
15Ale o Ježiš leske odphenďa: “Akana muk avke! Bo kampel amenge te kerel savoro spravodľišagos, so o Del kamel.” A paľis leske domukľa.
16Sar sas o Ježiš boldo, takoj avľa avri andral o paňi. A phundriľa leske o ňebos a dikhľa, hoj o Duchos le Devleskero sar holubica avelas tele pre leste.
17A andral o ňebos šunďiľa o hangos: “Kada hin miro čhavo, saves kamav. Lestar man hin o radišagos!”
