1Akor vakerelas o Ježiš le nipenge the peskere učeňikenge:
2“O zakoňika the o Farizeja peske bešle pre le Mojžišoskero than a sikaven, so phenel o Zakonos.
3Vašoda savoro, so tumenge phenena, hoj te doľikeren, oda doľikeren the keren, ale pal lengere skutki ma keren. Bo on na keren oda, so vakeren.
4Sphanden bare pharipena, so našťi te zľidžal, a thoven len pro vali le manušenge, ale on korkore na kamen aňi jekhe angušteha lenge te pomožinel.
5Savoro, so on keren, keren ča vaš oda, hoj len o nipi te dikhen. Thoven o bare krabički le Devleskere laveha pre peskero čekat the pro vasta a bare špargici pro agor peskere gadenge.
6Kamen nekfeder thana pro hoscini the anglune thana andro sinagogi.
7Kamen, hoj lenge o nipi andro foros te pozdravinen a te vičinen len: ‘Rabbi.’
8Ale tumen peske ma domuken te phenel ‘Rabbi’, bo ča jekh hin tumaro Učiťeľis – o Kristus – a tumen savore san phrala.
9A ma phenen ňikaske pre phuv ‘Dado’, bo ča jekh hin tumaro Dad, oda, savo hino andro ňebos.
10Aňi peske ma domuken te phenel ‘Duchovne Vodci’, bo ča jekh hin tumaro vodcas, o Kristus.
11Oda, ko uľahas maškar tumende bareder, ela tumaro služobňikos.
12Sako, ko pes upre hazdela, ela tele dikhlo a oda, ko hin pokorno, ela upre hazdlo.
13Ale vigos tumenge, zakoňikale the Farizejale, tumen dujemujengere! Bo phanden andre le nipenge o ňeboskero kraľišagos – tumen korkore andre na džan a olenge, save kamlehas, na domuken.
14Vigos tumenge, zakoňikale the Farizejale, tumen dujemujengere! Bo thoven avri le vdovenca a len lengere khera a but tumen modľinen, hoj tumen te dičhol. Vašoda avena goreder sudzimen.
15Vigos tumenge, zakoňikale the Farizejale, tumen dujemujengere! Bo predžan o moros the e phuv, hoj te dochuden jekhe manušes prekal tumaro pačaben, a sar pes visarel, keren lestar čhas prekal o peklos duvar goreder, sar san tumen.”
16“Vigos tumenge, kore vodcale! Bo phenen: ‘Ko lela vera pro chramos, oda nane ňič, ale ko iľahas vera pre le chramoskero somnakaj, oda imar mušinel te doľikerel.’
17Tumen diline the kore! So hin bareder: O somnakaj, či o chramos, so sentňarel o somnakaj?
18Abo tumen phenen: ‘Te iľahas vareko vera pro oltaris, oda nane ňič, ale te iľahas vareko vera pre oda daros, so hin upre, oda imar mušinel te doľikerel.’
19Tumen diline the kore! So hin bareder, o daros, či o oltaris, so sentňarel o daros?
20Avke oda, ko lel vera pro oltaris, lel vera pro oltaris the pre savoreste, so upre hin.
21A oda, ko lel vera pro chramos, lel vera pro chramos the pre Oda, ko andre bešel.
22Oda, ko lel vera pro ňebos, lel vera pro tronos le Devleskero the pre Oda, ko upre bešel.
23Vigos tumenge, zakoňikale the Farizejale, tumen dujemujengere! Bo den o dešto kotor andral e meta, andral o kopros the andral e raška, ale omukľan oda, so buter kampel te doľikerel andro Zakonos: O spravodľišagos, o lačhejileskeriben the e vernosť. Kada kampľa te kerel a koda te na omukel.
24Tumen kore vodcale! La mucha precedzinen a la ťava preľiginen!”
25“Vigos tumenge, zakoňikale the Farizejale, tumen dujemujengere! Bo žužaren avral e kuči the o čaro, ale andral hin pherdo hamišagos the džungipen.
26Farizejina, tu koro manuš! Žužar ešeb (peršo) e kuči the o čaro andral, hoj te aven žuže the avral!
27Vigos tumenge, zakoňikale the Farizejale, tumen dujemujengere! Bo san ajse sar parne hrobi, so dičhon avral šukares, ale andral hine pherde le mulengere kokalenca the dojekhe džungipnaha.
28Avke the tumen avral dičhon le nipenge, hoj san čačipnaskere, ale andral san pherde le falšišagoha the le nalačhipnaha.”
29“Vigos tumenge, zakoňikale the Farizejale, tumen dujemujengere! Bo ačhaven o hrobi le prorokenge a šukaľaren o pomňiki le čačipnaskerengere.
30Phenen: ‘Te džiďiľamas andro dživesa amare dadengere, na murdarďamas lenca le proroken.’
31Avke korkore phenen avri pre peste, hoj san o čhave olengere, save murdarde le proroken.
32Ta aven a dokeren oda, so chudle te kerel tumare dada!
33Tumen sapale! Tumen čhave le sapengere! Sar šaj denašen olestar, hoj te aven odsudzimen andro peklos?
34Vašoda bičhavav ke tumende le proroken, le goďaveren the le manušen, save hine avrisikade andro Zakonos. Varesaven lendar ukrižinena the murdarena a varesaven lendar marena bičoha andre tumare sinagogi a džana pre lende foros forostar,
35hoj te aven potrestimen vaš oda, hoj murdarďan le čačipnaskeren a oleha čhorďan avri lengero rat pre phuv – le Abelostar dži ko Zachariaš, o čhavo le Barachiašiskero, saves murdarďan maškar o chramos the oltaris.
36Čačipen tumenge phenav, kada savoro avela pre kada pokoleňje!”
37“Ó, Jeruzalem, ó, Jeruzalem! Tu, so murdares le proroken a čhivkeres le barenca andre ola, save sas ke tu bičhade. Kecivar kamľom te skidel tire čhaven, avke sar e kachňi skidel peskere kachňoren tel peskere kridli, ale na kamenas!
38Dikh, tumaro kher ačhela omuklo, na ela ňič andre!
39Bo phenav tumenge, hoj akanastar man imar šoha (ňikda) na dikhena, medik na phenena: ‘Požehňimen oda, ko avel andro nav le Rajeskero!’”
