Mateu 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Mame oserematoh tykohmãse. Mame nomĩko ẽmepyryae nohpo tõ toytose ekepyry zonẽtopõpyry enese. Maria Matarena imepỹ Maria maro toytose toto.

²Mame tuaro pyra toto ahtao nono kywyhkywyh tykase jamihme. Mame Ritonõpo nenyokyhpyry tyhtose kapu ae. Jezu ekepyry ẽtypyry apurutoh tysyryhmase ropa eya. Mame epona typorohse ynororo topu pona.

³Mokyro eneryhtao nenenehkane sã ezuru kynexine. Zupõ roropa karimutume potu kynexine.

⁴Mame soutatu tõ tõserehse itamurume. Tykytyky tykase toto. Mame aorihtyã sã toehse toto. Nono pona toepukase toto.

⁵Morarame ynara tykase Ritonõpo nenyokyhpyry nohpo tomo a, —Oserehpyra ehtoko. Jezu zupĩko hmatou wewe pokona exixihmahpyry? Zuaro ase.

⁶Arypyra reh taro nahse. Tõsemãse ropa mana tõmihpyryae ro. Enetoko ke se ao. Esahpyry rokẽ moro.

⁷Axĩ sã ke ytotoko. Ipoetory tõ zurutatoko ropa. “Tõsemãse ropa mana. Seromaroro Karirea pona ytõko mana osemazuhme. Moroto enẽko ropa matose,” kaxitatoko eya xine, enara rokene. Wenikehpyra ke ehtoko. Jomihpyry ke ekarotoko, tykase Ritonõpo nenyokyhpyry eya xine.

⁸Morara kary etaryke tyya xine axĩ toytose toto okepy esahpyry poe. Oserehnõko ro toh kynexine. Yrome tãkye kuhse toh kynexine. Tururume toytose toto Jezu poetory tõ zuruse.

⁹Morarame tõseporyse toto Jezu maro. —Torẽtyke pyra ehtoko, tykase Jezu eya xine. Mame eya toytose toto. Ipupuru tapoise toto a. —Kure mase Tamuxi. Ritonõpo nymenekahpyryme mase. Yna esẽme mase, tykase toto.

¹⁰—Oserehpyra ehtoko, tykase Jezu eya xine. —Ytotoko jakorõ tõ zurutatoko. Enyohtatoko Karirea pona toto ytotohme. Moroto oseporỹko ropa sytatose toto maro, tykase Jezu eya xine.

¹¹Morarame nohpo tõ toytose ahtao soutatu tõ roropa toytose okepy esahpyry poe pata pona ropa. Ritonõpo maro oturuketõ tuisary tõ zuruse toytose toto tynenehpyrykõ poko emero porehme.

¹²Mame Ritonõpo maro oturuketõ tuisary tõximõse toto juteu tõ tuisary tõ maro tõturutohkome tynyrirykõ poko. Morarame tineru tokarose eya xine soutatu tomo a, pitiko rokẽ pyra.

¹³Ynara tykase toto soutatu tomo a, —Ynara rokẽ kahtoko imehnomo a, “Ipoetohpyry tomo a ekepyry tomatonanohse tynyhse yna ahtao,” kaxitoko, tykase ynaroro soutatu tomo a.

¹⁴—Morarame moro poko kowenatu tutuarõtase tahtao imaro oturũko ynanase ozehno xine pyra aehtohme. Morara exiryke torẽtyke pyra ehtoko. Yna omipona rokẽ ehtoko, tykase toto.

¹⁵Naeroro soutatu tomo a tineru tapoise. Mokaro omihpyry omipona rokẽ toehse toto. Naeroro seroae ro morara ãko ro juteu tõ mana, “Jezu ekepyry tomatonanohse ipoetohpyry tomo a,” ãko ro toh mana.

¹⁶Morarame Jezu poetory tõ toytose Karirea pona, 11mãkomo. Mame ypy pona toeporehkase toto Jezu omipona.

¹⁷Morarame Jezu tonese moroto eya xine. Mokyro eneryke tyya xine, —Kure mase, Ritonõpo nymenekahpyryme mase, yna esẽme, tykase toto. Yrome toitoine onenetupuhpyra ro toh kynexine.

¹⁸Morarame typoetory tomo a Jezu toytose tahtao ynara tykase ynororo, —Emero esẽme toehse ase Ritonõpo poe. Kapuaõkõ esẽme ase, sero nonopõkõ esẽme roropa ase.

¹⁹Morara exiryke ytotoko emero pata tõ pona. Emero patapõkõ amorepatatoko jomipona toto ehtohme, ypoetoryme toto ehtohme. Mame ẽpurihkatoko toto Papa kapuaõ omi poe, Imũkuru omi poe, Zuzenu omi poe, enara.

²⁰Amorepatoko toto emero jomipona toto ehtohme, ãmorepatopõpyrykõ omipona toto ehtohme. Etatoko pahne, amaro xine ase jũme joepyry ropa ponãmero, tykase Jezu eya xine. Enara.