1Vičinďa peskere dešuduje učeňiken ke peste a diňa len autorita te traden avri le nalačhe duchen a te sasťaren dojekh dukh the nasvaľiben.
2O nava ole dešudujengere (12) sas kala: Ešebno o Šimon – saves vičinenas Peter – the leskero phral o Andrej, o Jakob le Zebedeoskero the leskero phral o Jan,
3o Filip, o Bartolomej, o Tomaš, o Matuš o colňikos, o Jakob le Alfeoskero, o Tadeus,
4o Šimon Kanaansko – saves vičinenas Zelota – the o Judaš Iškarijotsko, savo les diňa andre.
5Kale dešudujen bičhaďa o Ježiš a prikazinďa lenge: “Ma džan pro drom ko manuša, save nane Židi, a ma džan andre fori le Samaritanengere.
6Ale sigeder džan ko bakrore, save našľile andral o kher le Izraeloskero.
7Džan a kazinen, hoj hino pašes o ňeboskero kraľišagos.
8Le nasvalen sasťaren avri, le malomocnen žužaren, le mulen uštaven andral o meriben, le demonen traden avri. Hijaba chudľan, hijaba den.
9Ma len tumenca aňi somnakune aňi rupune aňi meďune love andro žebi.
10Ma len aňi gonoro pro drom aňi po duj gada aňi sandalki aňi paci; bo o manuš, savo kerel buči, peske zasogaľinel (zaslužinel) peskero chaben.
11Andre savo foros abo gavoro džana, dophučen tumen, ko tumen andre oda foros priiľahas. Ode ačhen dži akor, medik na džana het.
12Sar džana andro kher, pozdravinen.
13Te ela oda kher pačivalo, mi avel tumaro smirom pre leste – ale te na ela pačivalo, mi avel tumaro smirom pale ke tumende.
14Te tumen na prilena a na šunena tumare lava, džan het andral oda kher abo andral oda foros a keren tele o prachos pal tumare pindre.
15Čačipen phenav tumenge, hoj lokeder ela le manušenge andral e Sodoma the Gomora andro sudno džives sar ole foroske.”
16“Me tumen bičhavav sar le bakroren maškar o ruva (vlki). Aven pozorne sar o sapa the kovle sar o holubi.
17Merkinen tumenge pro manuša! Bo dena tumen andre pro sudi a marena tumen andro sinagogi le bičenca.
18The anglo foroskere vladara the anglo kraľa tumen ľidžana vaš ma, hoj lenge the le Nažidenge te aven švedki.
19Sar tumen dena andre, ma starinen tumen pal oda, so vakerena abo so phenena. Bo andre oda časos tumenge ela dino so te vakerel.
20Se na vakerena oda tumen, ale o Duchos tumare Dadeskero, savo vakerel prekal tumende.
21O phral le phrales dela pro meriben the o dad le čhas a o čhave džana pre daj the pro dad a murdarena len.
22Savoredžene tumen našťi avri ačhena vaš ma, ale oda, ko ľikerela avri dži o agor, ela spasimen.
23Te pre tumende džana andre jekh foros, denašen andre aver. Bo čačipen tumenge phenav, hoj na predžana o fori le Izraeloskere, medik na avela o Čhavo le Manušeskero.
24Oda, ko sikľol, nane bareder sar oda, savo les sikavel, aňi o sluhas sar leskero raj.
25Dos hin, te o učeňikos hino ajso sar leskero učiťeľis a o sluhas sar leskero raj. Te le rajes upral o kher vičinde Belzebul – demonos – ta mek buter le nipen andral o kher!”
26“Vašoda ma daran tumen lendar! Bo ňič nane avke garudo, so na ela jekhvar otkerdo a nane počoral ňič, so pes jekhvar na dodžanela.
27Oda, so tumenge vakerav počoral, phenen avri phundrades a oda, so šunen ča andro kan, vriskinen avri pal o padi!
28Ma daran tumen olendar, save murdaren o ťelos, ale našťi murdaren e duša. Ale sigeder daran Olestar, savo šaj zňičinel the e duša the o ťelos andro peklos.
29Či na bikenen duje cikne čiriklen vaš jekh minca? Ale aňi jekh lendar na merel bi oda, hoj lendar tumaro Dad na džanel.
30Ale tumenge hin zgende mek the savore bala pro šero.
31Avke ma daran tumen! Tumen mon buter sar but čirikle.
32Ko man pridžanela anglo manuša, ke oda man the me pridžanava anglo miro Dad, savo hino andro ňebos.
33Ale ko man zaprinela anglo manuša, oles the me zaprinava anglo miro Dad, savo hino andro ňebos.”
34“Ma gondoľinen tumenge, hoj avľom te del o smirom pre phuv; na avľom te del o smirom, ale e šabľa.
35Bo avľom, hoj te džal o čhavo pro dad, e čhaj pre daj a e bori pre sasuj
36a andre peskeri famelija ena le manušeske ňeprijaťeľa.
37Oda, ko dikhel radeder peskere dades vaj peskera da sar man, nane hodno, hoj te el miro učeňikos. A oda, ko dikhel radeder peskere čhas vaj peskera čha sar man, nane hodno, hoj te el miro učeňikos.
38Oda, ko na lel peskero kerestos a na avel pal ma, nane hodno, hoj te el miro učeňikos.
39Oda, ko arakhela peskero dživipen, našavela les, ale oda, ko vaš ma našavela peskero dživipen, les arakhela.”
40“Oda, ko tumen prilel, man prilel – a ko man prilel, prilel Oles, savo man bičhaďa.
41Oda, ko prilel le prorokos vaš oda, hoj hino prorokos, chudela o počiňiben (odmena) sar prorokos. A oda, ko prilel le čačipnaskeres vaš oda, hoj hino čačipnaskero, chudela o počiňiben sar čačipnaskero.
42Ko diňahas te pijel jekhes kale ciknorendar ča jekh poharis šilalo paňi ča vaš oda, hoj hino učeňikos, čačipen tumenge phenav, na našavela peskero počiňiben.”
