1Sar o Ježiš dikhľa ole nipen, geľa upre pro verchos. Bešľa peske a leskere učeňika avle paš leste.
2A chudľa len kavke te sikavel:
3“Bachtale hine o čore pro duchos, bo lengero hin o ňeboskero kraľišagos.
4Bachtale hine ola, save roven, bo o Del lenge dela pale o radišagos.
5Bachtale hine o ciche, bo lengeri ela e phuv.
6Bachtale hine ola, save hine bokhale the smedne pal o spravodľišagos, bo on ena čaľarde.
7Bachtale hine o lačhejileskere, bo o Del ela ke lende lačhejileskero.
8Bachtale hine o žužejileskere, bo on dikhena le Devles.
9Bachtale hine ola, save anen o smirom, bo on pes vičinena le Devleskere čhave.
10Bachtale hine ola, pre kaste džan vaš o spravodľišagos, bo lengero hin o ňeboskero kraľišagos.
11Bachtale avena, te vaš ma pre tumende namištes vakerena, džana pre tumende a phenena pre tumende savoro nalačhipen.
12Radisaľon a thoven baripen, bo baro hin tumaro počiňiben andro ňebos, bo avke džanas the pro proroka, save sas angle tumende.”
13“Tumen san o lon la phuvakero. Te o lon našavela peskero lonďipen, soha pes lonďarela? Pre ňisoste imar nane lačho, ča hoj pes te čhivel avri a o nipi pal oda te phiren.
14Tumen san o svetlos le svetoskero. O foros, so ačhel upre pro verchos, našťi te garuvel.
15Se e momeľi na labaren pre oda, hoj la te garuven tel e piri, ale thoven la pro momeľaris a labol savorenge andro kher.
16Avke mi labol tumaro svetlos anglo manuša, hoj te dikhen tumare lačhe skutki a te lašaren tumare Dades, savo hino andro ňebos.”
17“Ma gondoľinen tumenge, hoj avľom te prephagel o Zakonos abo le Proroken. Na avľom te prephagel, ale te pherďarel.
18Bo čačipen phenav tumenge, hoj medik na našľona e phuv the o ňebos, na našľola aňi jekh pismenkos aňi jekh čjarkica andral o Zakonos, medik pes savoro na ačhela.
19Oles, ko prephagľahas ča jekh le nekciknedere prikazaňjendar a sikaďahas avke le manušen, vičinena nekcikneder andro ňeboskero kraľišagos. Ale oles, ko len doľikerela a sikavela, vičinena baro andro ňeboskero kraľišagos.
20Bo phenav tumenge, te na ela tumaro spravodľišagos (spravodľišagos) feder sar oda le zakoňikengero the le Farizejengero, šoha (ňikda) na džana andro ňeboskero kraľišagos.”
21“Šunďan, hoj sas phendo le phurenge: ‘Na murdareha! Oda, ko murdarďahas, mušinel te džal anglo sudos.’
22Ale me tumenge phenav, hoj sako, ko rušel pre peskero phral, mušinel te džal anglo sudos. Sako, ko phenďahas peskere phraleske: ‘Tu demado!’ mušinel te džal angle Bari Rada. A sako, ko phenďahas: ‘Tu dilino!’ ela čhido andro jagalo peklos.
23Te anďalas tiro daros pro oltaris a ode tuke avľahas pre goďi, hoj tire phrales hin vareso pre tute,
24muk ode tiro daros anglo oltaris, dža a lačhuv tire phraleha. Paľis av a obetin tiro daros.
25Gondoľin mištes a dothov tut sigo oleha, ko džal pre tute, medik sal leha pro drom, hoj te na del tut andre le sudcaske a o sudcas tut diňahas le stražňikoske a paľis tut čhidehas andre bertena.
26Čačipen phenav tuke, hoj odarik na aveha avri, medik savoro na počineha.”
27“Šunďan, hoj sas phendo le phurenge: ‘Na kereha lubipen!’
28Ale me tumenge phenav, hoj oda, ko dikhela pre džuvľi a andre peskeri goďi la kamel, oda imar kerďa laha lubipen andre peskero jilo.
29Te tut cirdel pro binos tiri čači (pravo) jakh, džubin la avri a čhiv la tutar het! Bo feder tuke hin, hoj te merel jekh tiro kotor, sar te calo tiro ťelos uľahas čhido andro peklos.
30Te tut cirdel pro binos tiro čačo vast, odčhin les a čhiv tutar het! Bo feder tuke hin, hoj te merel jekh tiro kotor, sar te calo tiro ťelos uľahas čhido andro peklos.”
31“Sas avke phendo: ‘Oda, ko omukela peskera romňa, mi pisinel lake premuklo ľil.’
32Ale me tumenge phenav, hoj oda, ko omukela peskera romňa, te oj na kerďa lubipen, ľidžal la ko lubipen a sako, ko peske lela kajsa romňa, savi hiňi premukľi, kerel o lubipen.”
33“Šunďan mek, hoj sas phendo le phurenge: ‘Na leha klamišagoha e vera, ale doľikereha le Rajeske tiri vera!’
34Ale me tumenge phenav, hoj šoha te na len vera, aňi pro ňebos, bo oda hin o tronos le Devleskero,
35aňi pre phuv, bo oda hin o than, kaj ov thovel peskere pindre, aňi pro Jeruzalem, bo oda hin o foros ole bare Kraľiskero.
36Aňi pre tiro šero na leha vera, bo mek aňi jekh bal našťi keres parno abo kalo.
37Ale sar vakeren, ta vakeren avke, hoj tumaro ‘He’ mi el ‘He’ a tumaro ‘Na’ mi el ‘Na’. Savoro, so hin buter upral oda, hin le nalačhestar.”
38“Šunďan, hoj sas phendo: ‘E jakh vaš e jakh a o dand vaš o dand.’
39Ale me tumenge phenav: Ma de pale oleske, ko tuke kerel namištes. A oleske, ko tut demela pal e čači (pravo) čham, visar the aver čham.
40Te vareko pes tuha kamel te sudzinel, hoj tuke te lel o teluno gad, muk leske the o gerekos.
41A te vareko tut ispidela, hoj leha te džas jekh kilometros, dža leha duj.
42Oles, ko tutar mangel vareso, de. A olestar, ko kamel tutar kečeň, ma visar tut.”
43“Šunďan, hoj sas phendo le phurenge: ‘Kameha tire prijaťeľis a na kameha oles, savo pre tu džal.’
44Ale me tumenge phenav: Kamen peskere ňeprijaťeľen, žičinen o lačho olenge, save tumen prekošen, keren o lačhipen olenge, save tumen našťi avri ačhen a mangen pes ko Del vaš ola, ko tumen tele dikhen a džan pre tumende,
45hoj te aven o čhave peskere Dadeske, savo hino andro ňebos, bo kerel, hoj o kham te avel avri pro nalačhe the pro lačhe a del o brišind pro čačipnaskere the pro načačipnaskere.
46Bo te kamľanas ča olen, save tumen kamen, savo počiňiben tumen užarel? Či na keren oda the o napačabnaskere?
47A te pozdravinďanas ča tumare phralenge, soha uľanas aver? Či na keren oda the o manuša, save na prindžaren le Devles?
48Aven dokonale avke, sar tumaro Dad, savo hino andro ňebos.”
