San Mateo 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Na or bded sab, dzi nu rzu lagy mbecy, ornu bzaꞌ yu noming napor, orzeꞌ Li nu bruu Magadán, nu tuubaꞌ Li gua dem gal ruꞌ baa ni Jesuuz.

²Orzeꞌ de repent la briib tub duru ily. Orzeꞌ bruu tub anc ni Ñgyoozh gashtal gyibaa. Bet yu lo yu. Orzeꞌ ptuyub yu gyitaꞌ nu rsoow ruꞌ gyerbaa zeꞌ. Gazeꞌ nu gusub yu tooñ.

³Anc zeꞌ rabeey gal nu rabee gyi ni guzii. Zeꞌ shab yu, ndeꞌ tub negy cacy iily laa.

⁴Na ornu bzaac de soldad anc zeꞌ, orzeꞌ gush la bis dey nu tantaꞌ gudzib yu. Orzeꞌ bdzoꞌw la dey.

⁵Orzeꞌ anc zeꞌ nay rab yu de biñ mñaa zeꞌ: ―Cueꞌ dzib der. Ya̱ rad lagya̱ nu de ru ryub der Jesuuz, biñ nu gut lo cruuz.

⁶Sacaꞌm ii. Bi byabañ mi gal nu mniim nu gzac mi. Orzeꞌ da der da güiir lugaar zeꞌ nu bri dey mi.

⁷Orzeꞌ na gaꞌ anc zeꞌ: ―Dzach zi der yaa niir lo de yu nu rsyaꞌ lom. Niir nu Jesuuz bi byabañ mi. Orzeꞌ mi zeꞌ bi ya gam lo der par Galilea. Re zac der mi. Ni niir lo dey. Ndeꞌ coz nu ca lo cuen nu ne̱e̱ lo der ―na anc zeꞌ.

⁸Orzeꞌ dzach bruu dem ruꞌ baa zeꞌ yam carer. Gudzib dem tees niꞌ ziꞌl tonaꞌ la yet lagy dem. Orzeꞌ ya dem carer ya num raso̱o̱ lo de yu nu rsyaꞌ lo Jesuuz.

⁹Orzeꞌ sij la bruu zac Jesuuz lo dem. Orzeꞌ nam: ―Shnu ru ―nam rab mi biñ mñaa zeꞌ. Orzeꞌ de mi zeꞌ bechaꞌm lo Jesuuz. Orzeꞌ bduyaa dem yeñ gyiꞌm nunu pca dem mi.

¹⁰Orzeꞌ na Jesuuz rab mi de biñ mñaa zeꞌ: ―Cueꞌ dzib der. Yaa nii der lo de bicya̱ nu gya dey Galilea. Orzeꞌ zeꞌ zac dey ya̱ ―nam.

¹¹Na lat nu bi ya de biñ mñaa zeꞌ, orzeꞌ la be de soldad nu mña ruꞌ baa zeꞌ byay nu bya tooy riidz lo de uz zub lo dela de coz nu guc.

¹²Orzeꞌ de uz zub lo zeꞌ guay gua tooy rishlo de yu bel ni de mbecy Israeel par nu gyicy dey tub ziꞌl riidz. Orzeꞌ sheñ tiñ briic dey ni de soldad.

¹³Orzeꞌ na dey rab yu de soldad zeꞌ: ―Rlagy ñi nii der nu de yu nu rsyaꞌ lo Jesuuz, gua dey rel, orzeꞌ bloo dze dey cuerp ni Jesuuz lat nu nas der.

¹⁴Nunu benu gyeñ Pilato, yu nu riib ic, nu ni mod bzac der, orzeꞌ de̱ ya̱ cyaag de̱ ic yu, gun orzeꞌ de̱ ya̱ soow su̱ de ru loy ―na dey.

¹⁵Orzeꞌ de soldad zeꞌ gush dey de tiñ zeꞌ. Orzeꞌ bicy dey gal nu mnii de uz zub lo zeꞌ. Orzeꞌ riidz nu mnii de soldad zeꞌ, ndeꞌ riidz nu zaab lat de mbecy Israeel mas gashtal dzi na.

¹⁶Orzeꞌ de trotub yu nu rsyaꞌ lom gua dey Galilea gashtal logyiꞌ zeꞌ nu mnii Jesuuz nu cha dey.

¹⁷Orzeꞌ ornu bzaac dey mi, orzeꞌ pca dey mi. Nomaas yuꞌ la be mbecy lat dey nu wangad lagy dey ti laab mi.

¹⁸Orzeꞌ Jesuuz byagaab mi lo dey. Orzeꞌ nam rab mi dey: ―Ñgyoozh briic mi rishbeey ne̱ nu gyicya̱ dela coz gyibaa nu gyishlombecy ii.

¹⁹Gua der lo dela mbecy nu yuꞌ dutuub la gyishlombecy, nunu gyicy der nu gyac dey mbecy nu rsyaꞌ lo̱. Nunu briic der nu zu nis dey par nu gabe nu nac nu dey Ñgyoozh uz den, nunu par nu gabe nu nac nu dey ya̱ iꞌñ mi, nunu par nu gabe nu nac nu dey Espiriit Yon nim.

²⁰Nunu lyuu der ni dey nu gyicy paay nu dela coz nu mne̱e̱ lo der. Nunu cueꞌ nit lagy der nu ya̱ nac du̱ der dub laa tiem gashtal shuub la dzi ni gyishlombecy ii ―nam.