Marku 16

1

2

3

4

5

6

7

8

9

10

11

12

13

14

15

16

¹Uvira waya nihuku no ntivela, Mariya Mantalena, Mariya anumwane Yakopu ni Saloome yahothuma makhura oonukhela ni yahorwaa uttikitthela nrutthu wa Yesu.

²Wicisu ncuwa nikhumaka nihuku noopacera nosumana, yahorwaca umahiye.

³Yanawaakaaka yiiraka: Tipani nokela unipirikisela nluku nno wankhora wo mahiye?

⁴Nanso, awehaka, yahoona wiira nluku nopirikiseliya nceresere ni nari nluku nuulupale cinene.

⁵Ukela waya mmahiye yahomoona mmirawo nonkomile moono nlopwana, awanre ihancu yooteela, ni yahotuthuwa.

⁶Uyo nanso, ahaahimerya: Nhituthuwe. Nnomwavya Yesu o Nasaree akhomeliye wansalapani. Honwelela, khaawo va. Moone nipuro namweesilyaya.

⁷Vano, murwee, mwahimerye owiitthuca awe ni Peturu wiira Yesu naahala wuhoolelani uKalileya. Wonwo nnaahala umoona toko coohimenryaweni.

⁸Akhumaka umahiye yanatthawa ni uthukumela nlattu wo woova. Khayanhimenrye ntthu itthu ile nlattu wo woova.

⁹Nonwelenle, wicisu aya nihuku noopacera isumana, Yesu ahonkhumelela woopacera Mariya Mantalena, yola ankumihilyawe macini saapa.

¹⁰Uyo ahorwaa wacuweliha ale yakhanle ni Yesu, yeetta acukulaka ni yiikhupanyaka.

¹¹Ale nanso, wiiwa waya wiira Yesu ri nkumi, ni Mariya ahomoona, khayaakupanli.

¹²Wahoolo aheeconeha nnanna nkina wasilopwana eeli yeetta ni iphiro, arwaaka umawaani.

¹³Ayo yahoturuwa wiira yacuwelihe akhwaya, nanso na ayo khayaakupanli.

¹⁴Wahoolo waya, ahaakhumelela owiitthuca awe khumi na mmoca alyaka, ni ahaakuphula nlattu wohikupali ni uturumala waya nrima, kontha khayaakupanli ale yamoonne nonwelenle.

¹⁵Ni aheerela: Murwee ilapo yothene mwaalake atthu othene ni Nhupi Wooreera.

¹⁶Ntthu nohala ukupali ni upatisiya naahala woopwa, nanso ntthu hinhala ukupali, naahala uhukhumwiya.

¹⁷Ikanyero cinhala waatthara atthu ookupali phi nnya: Mwancina naka, ankowomola minepa coonanara, ankowuuluma moolumo oonaanano;

¹⁸ankovara inwaa, ni yawuryaka itthu yowiiva, khinhala wapanka itthu; ammowathatela matata aretta, na ale anaahala uvona.

¹⁹Vano, Apwiya Yesu anoolumanne owiitthuca awe yahakheleliya wirimu, ni ahonkoma moono nlopwana wa Nluku.

²⁰Vano arumeyi yahokhuma ni yahorwaa ulaka mapuro othene ni Apwiya yahaakavihera, yoneehaka nuulumo na Apwiya ni ikanyero cavelenle.