1Nakhumile wonwo, ahokela nttetthe wo Yutteya ni ukhopela mooloko Yorttani, ni mphwinko unathukumanne tho nipuro naryawe, anaweetthuciha tho, toko calemalenlyawe.
2Yahomwattamerya mafarisi ni yahonkoha anttehaka: Iri yooreera nlopwana wamwalaana amwaarawe?
3Ahaakhula: Musa holamulenleni isiyani?
4Yahomwaakhula: Musa holevela waavaha iwarakha yoomwalaana, ni waahiya.
5Yesu ahaakhula tho: Nlattu woolipa winyu nrima phuvahilyaweni nlamulo nno.
6Nanso, wupattusoni wolapo, Nluku ahompanka nlopwana ni nthiyana.
7Phimaana, nlopwana naahala waahiya athumwane na anumwane ni nokookhala na amwaarawe.
8Ni ooyeli ankookhala irutthu imoca. Phimaana, khankhala tho eeli, nanso irutthu imoca.
9Vano, yooluttanihiya ni Nluku, khimwalaanihiya ni ntthu.
10Anaphile uwaani, owiitthuca awe yahonkoha tho itthu ile.
11Yesu ahaahimerya: Ntthu nohala wamwalaana amwaarawe ni waathela akina, neetta uluva ni nthiyana ule,
12ni nthiyana ammwalaanaka mannawe nuutheliya ni nkina, neetta uluva.
13Yahomwiihera asinamwane wiira aakwanye, nanso owiitthuca yahakuphula ale yawihile asaana.
14Yesu, oonaka itthu ile ahonyonyiya ni aheerela: Mwalevele, amirawo akiweele, ni nhoomole, nlattu omwene wa Nluku uri wa waya.
15Khweeli kinawuhimeryani, ntthu hinhala waakhela omwene wa Nluku toko mmirawo, khanhala ukela wonwo.
16Wahoolo ahaakusa vayawani phwathatelaka matata ni ahaareeriha.
17Wakhumilyawe eettaka ni iphiro, ahomwattamerya ntthu atthimakacaka, ni akhoromelaka ahonkoha: Mwalimu ooreera, kipankekeni wiira kiphwanye ukumi woohimala?
18Yesu ahonhimerya: Nnokihanelani ooreera? Khaawo ooreera hikhanle Nluku paahi.
19Unacuwela malamulo: Uhiive, uheette uluva, uhiinye, uhoothe, uhithepye, waalemelihe athumwanaa na anumwanaa.
20Ahomwaakhula: Mwalimu, cothene nnya kihosunka ikhumelo mmirawo.
21Yesu ammwehecesaka, ahomfenta, ni ahomwaakhula: Inawuhaleela itthu imoca paahi; Urwee, watumihe citthu cothene cirinaa, waavahe nsurukhu uyo atthu oothwenya, ni ommokhalana nhakhu wirimu; uwe ni ukitthare.
22Nanso, weewilyawe moolumo ale, ahothulana ni ahothama ni icuku, nlattu arina mihakhu cinci.
23Awehaka nceresere, Yesu aheerela owiitthuca awe: Urikarika venci, atthu oothaciri ukela wumweneni wa Nluku.
24Owiitthuca wahooma uwanoni, wowiiwa moolumo ala. Nanso Yesu ahopwahera: Asaana aka, cirikarikilyaya ukela wumweneni wa Nluku, ale ankhuluvela mihakhu.
25Khavarikile uvira nkamira mwiithe wo sinkano, uhohiyana ukela thaciri wumweneni wa Nluku.
26Ale yahotikhina wootepa nanlelo ni yanawiirelana ayayoru: Vano, tupani nohala woopwa!
27Awehecesaka, Yesu ahaakhula: Na atthu khinooryaniya, nanso ni Nluku citthu cothene cinawooryaniya.
28Peturu ahopacera unhimerya: Hi nihohiya cothene nihottharani.
29Yesu ahaakhula: Khweeli kinawuhimeryani wiira khaawo ntthu nohala uhiya inupa awe, asunnawe, asirokorawe, athumwane na anumwane, asaana atthuna imatta awe nlattu wo Miyano, ni nlattu wo Nhupi Wooreera,
30phihaakhela mpaka imaara iminya, nanano ukati ula urihula, inupa, asunnawe, asirokorawe, anumwane, asaana ni imatta, wamoca ni womolanihaciya, ni wahoolo ukumi woohimala.
31Enci oopacera ankokhala uwiheerya, ni uwiheerya ankokhala oopacera.
32Owiitthuca yaanaweetta ni iphiro, awelaka uYerusalemu, ni Yesu anaweetta uhoolo waya. Yanatikhina ni yaanantthara ni woova. Ahaakusa tho owiitthuca khumi na eeli, ahopacera wahimerya itthu yahala umwiiranela,
33eeraka: Mwiiwe, ninawela oYerusalemu, ni Mwanawe Pinattamu naahala urwehiya mmatatani moolupale a mayasataka ni mayowantikha, na ale anaahala ummaanela umwiiva nuunrweha waasenci.
34Anaahala untarawa, unsuwela wiitho, umwapsyulaca nuumwiiva, nanso nihuku noneeraru naahala wunwelela.
35Yakopu ni Yohani, asaana a Sepetteu, yahomwattamerya ni yahomwiirela: Mwalimu, nimphavela, unipankele yothene inhalehu wulepela.
36Yesu ahaakoha: Nnophavela kuupankeleni isiyani?
37Yahomwaakhula: Wumweneni waa, nunkome, mmoca mono nlopwana, ni nkina mono nthiyana.
38Yesu ahaakhula: Khannocuwela itthu inlepelenyu. Nnawoorya uwurya ikoopu inhalaka uwurya, ni waakhela upatiso unhalaka waakhela?
39Yahomwaakhula: Aye, ninawoorya. Yesu ahaahimerya: Nnowowurya ikoopu inhalaka uwurya, ni nnowopatisiya ni upatiso unhalaka upatiseriya,
40nanso, wunkoma mono nlopwana atthuna nthiyana kahi phi Mi kinvaha, anovahiya ale asunkeriye.
41Akina khumi, yiiwakaru itthu ile, yahonyonyiya ni Yakopu ni Yohani.
42Yesu aheehana ni aheerela: Nhocuwela cimpankaya alamuli onlaponi wiira acuwanehe iyulupale aya mmalokoni ni mahumu aya.
43Nanso ni nyuva khunhala ukhala commo. Ntthu nophavela ukhala muulupale mwa nyu eepanke nrumeyi,
44ni nophavela ukhala oopacera mwa nyu eepanke ipottha ya atthu othene,
45nlattu Mwanawe Pinattamu khaawile uvareliya nteko, nanso uvara nteko ni uvaha ukumi awe wiira oopole atthu enci.
46Yahophiya uYeriko. Wakhumaya uYeriko ni owiitthuca awe, ni mphwinko muulupale, Partimeu, mayoolepela oohoona, mwanawe Timeu, ahonkoma nceresere iphiro aphavelaka ulola.
47Weewilyawe wiira Yesu o Nasaree anavira, ahokhuwa: Yesu, Mwanawe Taviti, ukoonele ikiriri.
48Atthu enci yanankuphula wiira ammaalihe, nanso anapwaha ukhuwa khula imaara wootepa eeraka: Mwana a Taviti, ukoonele ikiriri.
49Yesu aheemela ni aheera: Mmwiihane. Yahomwiihana ntthu uhoona yiiraka: Ulipe nrima, wunwe, nawiihana.
50Ni ule, arulaka ikacako awe, ahotupha ni ahorwaa waYesu.
51Yesu ahonkoha: Untthuna kupankele isiyani? Oohoona ahaakhula: Mwalimu, koone.
52Yesu ahonhimerya: Urwee, ikupalelo aa ihowoopola. Ni nananoru ahoona ni ahontthara Yesu mphironi.
