Marku 2

1

2

3

4

5

6

7

8

9

10

11

12

13

14

15

16

¹Anavinre mahuku vakani, ni Yesu naturuwile uKafarnaum wahorumanyaa wiira ri uwaani.

²Yahothukumana atthu enci, mpaka uphunyana wankhora, ni Yesu aheetthuciha moolumo.

³Vano yahomwiihera ntthu oowuntakyaa, akusiye na atthu acese.

⁴Ukhala wiira khayoorya unkusa mpaka waryawe, nlattu wo mphwinko, yahokhunula nivatho nipuro naryawe Yesu, ni ciicale, anahunle iparo, yahokurusela nrepa naryawe ntthu oowuntakyaa.

⁵Wowoona ukupali waya atthu ale, Yesu ahomwiirela ntthu oowuntakyaa: Mwanaka, itaampi caa ciholeveleliya.

⁶Wonwo mweeco, yahoonkoma mayowantikha vakani yaakakaka munrimani mwaya:

⁷Nlattuni, Ule uulumacaka co? Nakufuru. Noorya tipani ulevelela itaampi, hiri Nluku paahi?

⁸Yesu, nanso acuwelaka moopuwelo aya mpaka ahaakoha: Nlattuni muupuwelaka ciicale munrimani mwinyu?

⁹Itthu yootepa urika phivi, umwiirela oowuntakyaa, Itaampi caa ciholeveleliya, atthuna umwiirela, Wunwe, ukuse nrepa naa ni weette?

¹⁰Vano paahi; wiira ncuwele wiira Mwanawe Pinattamu haana ikuru vathiva yolevelela itaampi,

¹¹kinawuulamula amwaacaka ntthu oowuntakyaa ukuse nrepa naa ni urwee uwaanyaa.

¹²Ntthu ule ahoonwa, ahokusa nrepa nawe ni ahokhuma ooniyaka na atthu ale othene, mpaka othene wumiya mwaano, ni yaananttottopela Nluku yiiraka: Khaninoona itthu co nikhalakaru.

¹³Imaara ikina tho ahokhumela vate mphante wo ipharyaa; ni mphwinko wa atthu othene wahontthara, Ule eetthucihaka.

¹⁴Nanso aviraka uyo ahomoona Levi, mwanawe Alfeu nonkomile inupa yowaakheleliya nsoko, ni ahomwiirela: We, ukitthare Mi. Ni Levi ahonwa anttharaka Yesu.

¹⁵Nari wamoca, itthoko ya Levi, mayoliviha nsoko enci na atthu ookosakosa yahoonkomaca wameeca wamoca ni Yesu ni uwiitthuca awe, nlattu khayaamala urunwa atthu yaantthara.

¹⁶Mayowantikha yanrumelelihana ni mafarisi, amoonaka ulya na atthu ookosakosa ni mayoliviha nsoko, yaheerela uwiitthuca awe: Nlattuni, nalya na atthu ookosakosa?

¹⁷Yesu eewaka cothene ahaakhula: Kahiwena akumi phimmwavya tothoro, nanso, aretta. Mi akiwenle weehana atthu aattakattifu, nanso atthu ookosakosa.

¹⁸Owiitthuca a Yohani ni mafarisi yaantthuka, yahowa unkoha Yesu: Owiitthuca a Yohani ni mafarisi anatthuka ni uwiitthuca aa ahitthukaka isiyani?

¹⁹Yesu ahaakhula: Asimpwana awe mayothela anawoorya utthuka, mayothela nari na ale? Mahuku othene ankhalaya wamoca ni mayothela khanoorya utthuka.

²⁰Anaahala uphiya mahuku anhalaya waakhiya mayothela, vano phankelaya utthuka.

²¹Khaawo neesera icaapha yonaanano ikuwoni yookhalayi, nlattu icaapha yonaanano inatepereriha mphantte wookhalayi, ni nikhwata ninatepa wunnuwa.

²²Ni khaawo nohela ivinyu yonaanano mmapikani ookhalayi, ahelaka vale, ivinyu inaahala upwesa mapika ookhalayi, ni ivinyu inarihakyaa wamoca ni mapika. Nanso ivinyu yonaanano inheliya mmapikani oonaanano.

²³Nihuku nimoca no ntivela Yesu anavira mmamattani na owiitthuca awe. Yeettaka mphironi, owitthuca awe yahoonta ncasi.

²⁴Mafarisi yahontthara, yiiraka: Nkoona, nlattuni ale apankaka itthu yowatelihiya upanka nihuku no ntivela?

²⁵Ahaakhula: Khannasoma itthu yapankilyawe Taviti, wammoonlyawe itala, ule na atthu yarinawe?

²⁶Wakenlyawe inupa ya Nluku, ukati wa mayasataka muulupale Apiyatari, ni walilyawe mikatthe coottakattifihiya coolamuliya ulya mayasataka paahi, ni ahaavaha atthu yarinawe?

²⁷Ni ahopwahera: Ntivela nihopankeliya ntthu, ni kahiwena ntthu phipankeliye ntivela.

²⁸Mwanawe Pinattamu phi mwaneene ntivela.