1Nayan, dimoton si Jesus te simbahan te Judiyo. Doen otaw kidoen nekepis se belad din.
2Kidoen heman se menge otaw nengemahà te idimanda dan tepad ki Jesus, aw yan se doun te gayed dan migsimà kandin aw megpegolì sikandin te otaw doen mesakit te aldaw te peg-etod.
3Minikagi si Jesus diyà te otaw nekepis se belad, “Diyà ka kanak.”
4Penga niyan, minikagi si Jesus diyà te menge otaw timengteng kandin, “Tepad te punù ingkeliwat i Moises, eden lay se mepakay inangen tadon te aldaw te peg-etod? Meg-inang kidon lay te mèpiya, aw meg-inang kidon te medaet? Megtabang kidon lay te doma otaw, aw mengimatay kidon te doma?” Meneng wedad palos intaba dan.
5Timengteng si Jesus diyà te kedita dan, aw neopal sikandin so nelidò se pedowan din tandà te kagsen te olo dan. Penga niyan, minikagi sikandin diyà te otaw nekepis se belad, “Oladi se belad nikaw.” Peg-olad din te belad din, pegketà migkèpiya iyan.
6Penga niyan, nesayo se menge Parisiyo, aw migpebelaw-belaway dan sipat menge sakop i Herod tepad te inangen dan amon matay dan si Jesus.
7Nayan, nesayo si Jesus aw menge tinoledaan din lekat kidoen aw dimoton dan te kilid te lanaw. Medita se otaw timaking kandan lekat te probinsya te Galiliya. Doen heman menge otaw lekat te probinsya te Judiya,
8aw tege Jerusalem, aw lekat te probinsya te Idumya, aw lekat dipag te wayeg te Jordan, aw medita heman lekat te kedepagan te lonsod te Tiro aw Sidon. Pegdineg dan tepad te kedita te kepelahan ininang i Jesus, dimoton dan kandin.
9Sagwa ontò medita se otaw netipon, migpunù sikandin te menge tinoledaan din te megpetagad dan te belangay sekayan din amon eked sikandin sigpiti te menge otaw.
10Medita se otaw pinegolian din, aw yan medita se otaw doen mesakit migpeegaway se migpedapag diyà kandin amon memaed dan kandin aw kegolian dan.
11Dimoton heman kandin se menge otaw dinetengan te bosaw. Pegkità dan kandin, limongken dan diyà kandin aw timawal dan te dakel kagi, “Sikona se ontò Batà te Timanem.”
12Meneng ontò migpunù si Jesus te keilangan wedad doma otaw indanan dan tepad kandin.
13Nayan, timikedeg si Jesus te bontod, aw tinawal din se menge otaw pinemallì din, aw dimoton dan kandin.
14Penga niyan, doen sempolò teg dowa otaw pinemallì din aw iningedanan din dan menge apostol, amon gayed dan tomaking kandin, aw yan se insogò din megtoladà te Mèpiya Indan.
15Imbegay din diyà kandan se tolos amon megpelowà dan te bosaw lekat te otaw.
16Seini se menge ngadan te otaw pinemallì din, si Simon iningedanan i Jesus ki Pedro,
17aw didowa batà i Sebedeo si Santiago aw adi din si Juan. Yan se telekedowa iningedanan i Jesus ki Boanerges. (Se kelebadan niyan, “kenà telawun.”)
18Pinemallì din heman si Andres, si Felipe, si Bartolome, si Mateo, si Tomas, si Santiago batà i Alfeo, si Tadeo, si Simon meyseg,
19aw si Judas Iscariote, sìyan migtolok ki Jesus.
20Penga niyan, minolì si Jesus. Meneng wedà sikandin pekekaen aw menge tinoledaan din so medita se otaw todà netipon kidoen kandin.
21Pegdineg te menge kedomaan i Jesus te wedà sikandin pekekaen, dimoton dan kandin amon ibingen dan sikandin doton te balay, so doen menge otaw eg-ikagi te migkebook sikandin.
22Doen menge menenoladà te punù ingkeliwat i Moises tikedo te Jerusalem simila ki Jesus, kagi dan, “Dinetengan sikandin i Belsebul, se doma ngadan i Satanas. Pengolo te bosaw se nemegay kandin te tolos amon megpelowà sikandin te bosaw lekat te otaw.”
23Meneng tinawal dan i Jesus, aw minikagi sikandin diyà kandan pineokit te tegdeyanan, “Eked kepakay aw megpelowà si Satanas te menge bosaw sinekopan din.
24Simpana megbebolaw se sakop te sebad selotan, kebàtan se peglowan te selotan sìyan te eked kenamay.
25Simpana megbebolaw se otaw migsebad te balay, kebàtan se ogpeanan dan te eked kenamay.
26Simpana megbolaw si Satanas diyà te menge sakop din aw meinang dan poon din, kebàtan se peglowan din te eked kenamay.
27“Aw magsen se otaw, eked keagaw se awop te balay din singed aw domateng se otaw labi pa magsen diyà kandin. Yan se mekedaeg te tig-apò te balay aw meglegapos kandin, aw penga niyan mengabat sikandin te awop te balay.
28“Eneng-enengi niyo se kagi ko kenyo. Pengkey eden kemoloi te salà inangen te otaw, mepakay iyan pegwedaden te Timanem, pengkey megtompuyus dan kandin.
29Meneng aw megtompuyus se otaw te Espiritu Santo, eked palos pegwedadi se salà din sìyan. Meneng ipelumun sikandin te wedad temanan tandà te salà din sìyan.”
30Yan se inikagi din diyà kandan, so minikagi dan te dinetengan te bosaw si Jesus.
31Nayan, pegtoladà i Jesus, dimateng se inay din aw menge kedowa din. Migtagad dan doton te lowà te balay. Impetawal dan sikandin so ibeg dan megkità kandin.
32Medita se otaw nenenoo kidoen te dapag din, aw minikagi dan diyà kandin, “Doton te lowà se inay no aw menge kedowa nikaw. Meibeg dan ekon megkità kamno.”
33Meneng minikagi si Jesus diyà kandan, “Mikagi a den diyà kenyo aw sinu se inay ko aw menge kedowa ko.”
34Penga niyan, timengteng si Jesus diyà te menge otaw nenenoo kidoen, aw minikagi sikandin, “Seini se inay ko aw menge kedowa ko.
35Se menge otaw egtolò te ibeg te Timanem, yan se meinang inay ko aw menge kedowa ko meama aw bayi.”
