Marcos 7

1

2

3

4

5

6

7

8

9

10

11

12

13

14

15

16

¹Nayan, doen menge Parisiyo aw menenoladà te punù ingkeliwat i Moises dimoton ki Jesus lekat te Jerusalem.

²Kinità dan te limàpang se menge tinoledaan i Jesus te ketanem te menge Parisiyo, so kimaen dan te wedà dan peg-onaw te belad dan.

³Doen ketanem te Parisiyo aw kedita te doma dan Judiyo te eked dan kaen singed aw onà dan onawan se belad dan iling te ketanem intoladà te kemonaan dan kandan.

⁴Aw molì dan lekat te pedyanan, linisan dan se lawa dan te eked dan pa kaen. Medita heman se doma ketanem egtekingan dan tepad te pegligaw te baso, aw keldiro, aw telepagan ininang te kinis, aw katri.

⁵Minikagi se menge Parisiyo aw menenoladà te punù ingkeliwat i Moises, “Kenà egtaking se menge tinoledaan no te ketanem te kemonaan tadon, so kimaen dan te wedà dan peg-onaw te belad dan.”

⁶Minikagi si Jesus, “Eden niyo aw egpenimanem kaw. Sikiyo se tinedoan te kagi te Timanem ingkeliwat i Isaias gebii, ‘Pengkey eg-ikagi se otaw sìyan te egtaking dan kanak, meneng wedà kelobos se pedowan dan kanak.

⁷Wedad ontong te pegsimba dan kanak, so se ketanem te otaw ipegtoladà dan, yan se ininang dan punù te Timanem.’

⁸Limengà kaw den te pegtolò niyo te punù te Timanem, aw gayed kaw egtaking te ketanem te otaw.”

⁹Minikagi heman si Jesus diyà kandan, “Ontò kaw biyasa egtinàyog te punù te Timanem amon gayed kaw tomaking te ketanem niyo.

¹⁰Migpunù si Moises, ‘Keilangan segmanen no se amay aw inay nikaw.’ Migpunù heman sikandin, ‘Keilangan imetayan se otaw megtindaet te amay aw inay din.’

¹¹Meneng egtoladà kaw te mepakay aw eked pegsagman se otaw te amay aw inay din aw olò mikagi diyà kandan, ‘Se itabang ko peden kenyo, yan se ininang ko corban, so imbegay ko den iyan diyà te Timanem.’

¹²Yan segdahen niyo se pegtabang din te amay aw inay din.

¹³Pineokit te pegtaking niyo te menge ketanem egkeliwaten niyo, timinàyog kaw te kagi te Timanem te keilangan segmanen niyo se amay aw inay niyo. Medaet heman se menge doma eg-inangen niyo.”

¹⁴Nayan, medita se otaw netipon kidoen, aw timawal si Jesus diyà kandan amon megpedapag dan diyà kandin. Minikagi sikandin, “Penenalan kaw kanak se kedita niyo amon mekelabet kaw kani.

¹⁵Kenà egpekesalà se otaw pineokit te iawop din diyà te bahà din. Meneng egpekesalà se otaw pineokit te lomowà lekat te bahà din.

¹⁶Keilangan menenalan se kedita niyo doen telinga.”

¹⁷Penga niyan, nesayo si Jesus lekat kidoen te otaw netipon, aw minawop diyà te balay. Timaking se menge tinoledaan din aw mig-insà dan kandin tepad te tegdeyanan sìyan.

¹⁸Minikagi si Jesus, “Nepela a so iling kaw heman te doma otaw wedà pekelabet. Pengkey eden se kànen iawop diyà te bahà te otaw, kenà egpekesalà se otaw pineokit kenyan.

¹⁹Eked deleg se kànen doton te pedowan din, meneng domeleg iyan doton te getek, aw penga niyan lomowà lekat te lawa.” Pineokit te sìyan kagi i Jesus, netegahan tadon den te mepakay aw komaen kidon te pengkey eden kemoloi te kànen.

²⁰Minikagi heman si Jesus, “Meneng se kagi lomowà lekat te bahà te otaw, yan se doun te egpekesalà se otaw.

²¹Didalem te pedowan se kelekatan te medaet ibeg te otaw eglayok te kenà kandan esawa, aw egpenakaw, aw egbonò, aw eglakad,

²²aw egkeibeg te kedònan te doma, aw eg-inang te medaet, aw eg-akal, aw wedad yàyà metibayi, aw eg-ingà, aw egbaet-baet, aw egpelangkaw-langkaw, aw wedad inenengen.

²³Lekat didalem te pedowan se kedita te medaet sìyan, aw egpekesalà se otaw eg-inang kenyan.”

²⁴Timindeg si Jesus aw nesayo lekat kidoen, aw dimoton te probinsya medapag te lonsod te Tiro aw Sidon. Pegdateng din doton, mig-ogpà sikandin diyà te balay kidoen. Pengkey ibeg din wedad metaga-taga aw kenan sikandin, meneng wedà sikandin pekeeles.

²⁵Doen batà bayi dinetengan te bosaw, aw dinineg te inay din te dimateng si Jesus. Yan dimoton se inay te batà sìyan aw limongken diyà kandin.

²⁶Kenà sikandin Judiyo, so eg-ikagi te Griego aw timebaw doton te Fenisya sakop te probinsya te Sirya. Nemoyò sikandin te ipelowà i Jesus se bosaw lekat te batà din.

²⁷Meneng mig-indan si Jesus te tegdeyanan amon metaga-taga se bayi te olò menge Judiyo se tebangan din, kagi din, “Keilangan onà ipekaen te otaw se menge batà din, so eked kepakay aw ebaten din se kànen te menge batà din amon ibegay din diyà te menge toyang.”

²⁸Minikagi se bayi, “Sir, benal iyan. Meneng mepakay aw komaen se toyang te momò medagdag lekat te kinaen te menge batà.”

²⁹Minikagi si Jesus, “Tandà te inikagi no sìyan, mepakay aw molì ka den, so limowà den se bosaw lekat te batà nikaw.”

³⁰Peg-olì te bayi sìyan, kinità din se batà din minibat, aw wedad den bosaw diyà kandin.

³¹Nayan, nesayo si Jesus lekat te lonsod te Tiro, aw minokit doton te lonsod te Sidon aw kedepagan te Dikapolis lamig dimateng doton te lanaw te Galiliya.

³²Pegdateng din doton, doen otaw inibing doton kandin bingelen aw kenà egkelitok se kagi din. Nemoyò se menge doma din te pemàdan i Jesus amon kegolian.

³³Penga niyan, inibing sikandin i Jesus doton te keligbinan, aw inloglog din se intetodò din diyà te telinga te otaw bingelen, aw inelem din se intetodò din te ngingi aw pinemàdan din se dilà te otaw sìyan.

³⁴Penga niyan, limengag sikandin doton te langit aw migpedo-pedo tandà te keido din, aw minikagi, “Efata.” (Se kelebadan niyan, “Keowang ka den.”)

³⁵Pegketà, nekedineg se otaw sìyan, aw migkèpiya se dilà din aw nelitok se kagi din.

³⁶Penga niyan, migpunù si Jesus te keilangan eked dan indani diyà te doma otaw tepad te kepelahan sìyan. Pengkey ontò sikandin migpunù, meneng labi dan pa mig-indan kenyan diyà te doma otaw.

³⁷Ontò dan nepela, aw minikagi dan, “Ontò mèpiya se kedita te ininang din, so pengkey bingelen impedineg din, aw omo impeikagi din.”