1Nayan, dowa mendad se aldaw te pegdateng te Pista te Pegpelowà. Yan se pegpengaen dan te pan kenà eglebag. Gayed mig-aneng-aneng se menge pengolo te simbahan aw menenoladà te punù aw eden se inangen dan amon dekepen dan si Jesus te wedad pa doma otaw metaga-taga amon imetayan dan.
2Minikagi dan, “Keilangan eked kidon pegdakep kandin dalem te pista, amon eked pegsamok se kedita te otaw.”
3Nayan, pegdoton i Jesus te lonsod te Bitanya, limaoy sikandin ki Simon, sìyan otaw pinegolian din te tompig. Dalem te pegpengaen dan, doen bayi nengibing te lana metinadeg insawol diyà te deitek botilya. Ontò iyan meelagà so ininang te ontò nardo. Penga niyan, linebak din se botilya aw intoyong din se lana diyà te olo i Jesus.
4Na, doen menge otaw kidoen mig-aneng-aneng, “Tay law. Pigbàtan din se lana sìyan.
5Simpana ibeligyà iyan, ginatos pa se kwarta dinaryo iteped peden diyà te menge otaw sagkep.” Sinila dan heman se bayi sìyan.
6Meneng minikagi si Jesus, “Pebeyai niyo sikandin. Ikà niyo egsila te bayi sìyan. Mèpiya se ininang din diyà kanak.
7Gayed doen otaw sagkep mebatog niyo tebangan pengkey kano doen ibeg niyo. Meneng eked a gayed peg-ogpà dini kenyo.
8Ininang te bayi sìyan se mebatog din inangen. Pineokit te pegtoyong din te lana sìyan diyà kanak, impetagad a din te peglebeng kanak.
9Eneng-enengi niyo se kagi ko seini. Eked palos sikandin kelibeli, so pengkey kenan toledai se Mèpiya Indan doton te kebelad te keneyonan, iindan heman se ininang te bayi sìyan.”
10Nayan, doen sebad tinoledaan i Jesus ngadan din si Judas Iscariote. Dimoton sikandin te menge pengolo te simbahan aw migpebelaw-belaway dan tepad te pegtolok din ki Jesus amon dekepen dan.
11Pegdineg dan te kagi din, neluba dan aw migpakang dan te doen kwarta ibegay dan diyà kandin. Penga niyan, migtagad si Judas te mèpiya aldaw amon itolok din si Jesus.
12Nayan, dimateng se tagnà aldaw te pista te pegpengaen te menge Judiyo te pan kenà eglebag. Yan heman se aldaw te pegpengiyaw dan te nati te karniro kànen dan te Pista te Pegpelowà. Dimoton se menge tinoledaan i Jesus kandin aw mig-insà dan, kagi dan, “Kenan kay lay peg-inang te kànen tadon te Pista te Pegpelowà?”
13Penga niyan, insogò din se didowa tinoledaan din, kagi din, “Doton kaw te Jerusalem. Aw domateng kaw doton, kitaen niyo se otaw neniang te sibolan nepenò te wayeg. Taking kaw kandin.
14Aw domateng sikandin doton te balay, ikagi kaw diyà te tig-apò, ‘Insogò kay te Pengolo amon meg-insà kay kamno aw kenan se kànan te kedita day te Pista te Pegpelowà.’
15Penga niyan, ipekità din diyà kenyo se dakel gibelayan kidoen diatas te balay tapay doen telepagan impetagad kenitadon. Peg-inang kaw te kànen tadon kidoen.”
16Penga niyan, nesayo se didowa tinoledaan din aw dimoton dan te Jerusalem. Kinità dan se kedita iling te tapay inikagi i Jesus diyà kandan. Penga niyan, mig-inang dan te kànen.
17Pegkedelem niyan, dimoton si Jesus aw kedita te sempolò teg dowa tinoledaan din.
18Dalem te kimaen dan, minikagi si Jesus, “Eneng-enengi niyo se kagi ko kenyo seini. Doen sebad kenyo megtolok kanak, aw kimaen sikandin doma ko.”
19Nepuluk se pedowan dan, aw migpetibos-tibosay dan mig-insà diyà kandin, kagi dan, “Kenà ko lay lebò?”
20Minikagi si Jesus, “Yan se sebad diyà te sempolò teg dowa kenyo. Timogen sikandin kanak.
21Metoman a imetayan, so yan se kagi te Timanem insolat gebii tepad kanak Timanem Migpekeotaw. Meneng mekelelayò se otaw megtolok kanak. Mèpiya peden aw wedà sikandin tebaw.”
22Nayan, dalem te pegpengaen dan, nengabat si Jesus te pan, aw migpesiontong sikandin diyà te Timanem. Penga niyan, binelà-belà din se pan, aw inteped din iyan diyà kandan, aw minikagi sikandin, “Kàni niyo se pan seini, so yan se lawa ko.”
23Penga niyan, inabat din heman se tabò, aw migpesiontong sikandin diyà te Timanem, aw inteped din heman diyà kandan, aw mininem se kedita dan kenyan.
24Minikagi si Jesus, “Yan se dipanog ko, aw pineokit kani, doen den kaling peokit pesalo doton te Timanem. Pineokit te pegkematay ko, medita se otaw tebangan.
25Eneng-enengi niyo se kagi ko kenyo seini. Eked a todà inem te ininem tadon seini singed aw metoman kidon minem te kaling bino doton te peglowan te Timanem.”
26Penga niyan, migdelangan dan tepad te pegduyun dan te Timanem, aw nesayo dan lekat kidoen, aw dimoton dan te bontod te Olibo.
27Penga niyan, minikagi si Jesus diyà te menge tinoledaan din, “Tomanan se kedita niyo kanak, so doen kagi te Timanem insolat gebii, ‘Ipeimatay ko se otaw egtonggò te ayam-ayam karniro, aw mebilit se kedita te karniro tinonggoan din.’
28Meneng penga te pegkeantay ko lekat te nematay, mekeonà a diyà kenyo doton te Galiliya.”
29Minikagi si Pedro diyà ki Jesus, “Pengkey tomanan se kedita te doma kamno, meneng eked a palos tanan kamno.”
30Minikagi si Jesus, “Eneng-enengi se kagi ko kamno seini. Kwani te eked pegkolaak se manok te mekedowa te delem seini, ibolon a nikaw te meketelo.”
31Meneng ontò minikagi si Pedro, “Eked a palos pegbolon kamno, pengkey imetayan a sipat kamno.” Iling heman kenyan se inikagi te kedita te tinoledaan i Jesus.
32Nayan, dimoton dan te kekeyowan iningedanan Gitsimani. Pegdateng dan doton, minikagi si Jesus diyà te menge tinoledaan din, “Pegtagad kaw dini, so domoton a sida amon megtawal-tawal a.”
33Penga niyan, impetaking din si Pedro, aw si Santiago, aw si Juan. Ontò den nepuluk se pedowan din,
34aw minikagi sikandin, “Ontò den nepuluk se pedowan ko, iling te matay a. Peg-ogpà kaw den dini, aw ikà niyo egtedogi.”
35Penga niyan, dimeleg si Jesus te kenà mediyò, aw limemlem sikandin aw migtawal-tawal. Nemoyò sikandin diyà te Timanem aw mepakay diyà kandin, eked din peden sikandin peokiti diyà te kelimahan agpet domateng diyà kandin.
36Migtawal-tawal sikandin, kagi din, “Amà, wedad palos eked no kebatog. Yan eked a no peden peokiti diyà te kelimahan seini. Meneng ibeg ko, kamno ibeg se metoman, kenà kanak.”
37Peglikò din doton te tinoledaan din, timedogi den dan. Linoka din sikandan aw minikagi sikandin diyà ki Pedro, “Simon, nepela a den kenyo, so timedogi kaw. Wedà kaw kedì peketayod te sebad olò oras.
38Ikà niyo egtedogi, meneng pegtawal-tawal kaw amon eked kaw keboyo. Pengkey mèpiya se ibeg te pedowan niyo, meneng wedad kagsen te lawa niyo.”
39Todà migpekediyò-diyò si Jesus aw migtawal-tawal. Onawa heman se intawal-tawal din.
40Todà limikò si Jesus doton te menge tinoledaan din, aw kinità din dan timedogi, so ontò dan nepilot. Wedà dan ketegahi aw eden se itaba dan kandin.
41Peglikò i Jesus doton kandan te iketelo, minikagi sikandin, “Nepela a so gayed kaw timedogi. Na, botong den iyan, so dimateng den se oras te pegtolok kanak Timanem Migpekeotaw amon dekepen a te menge otaw nelegeb te salà.
42Enaw kaw den. Dimateng den se otaw megtolok kanak. Somongon kidon kandin.”
43Telobo pa minikagi si Jesus, pegketà dimateng si Judas, sìyan tinoledaan i Jesus. Medita se otaw timaking kandin, aw migkekamang dan te menge podok aw batota. Insogò dan te menge pengolo te simbahan aw menge menenoladà te punù ingkeliwat i Moises aw menge obanen te Judiyo.
44Tapay dan netegahan aw eden se inangen i Judas, so minikagi sikandin, “Se otaw edekan ko, yan se otaw inahà niyo. Dekepi niyo sikandin aw bentayi niyo sikandin te pegpengibing niyo kandin doton te otaw meg-osay kandin.”
45Nayan, pegdateng dan doton, wedà peg-alà-alà si Judas meneng dimoton ki Jesus, aw minikagi, “Sir.” Penga niyan, inedekan din si Jesus.
46Penga niyan, dinakep dan sikandin.
47Meneng doen sebad tinoledaan i Jesus nenagnos te podok din aw tinigbas din se sineligan te ontò pengolo te simbahan, aw nepalot se dibaloy telinga din.
48Penga niyan, minikagi si Jesus diyà kandan, “Kolang se pegkekamang niyo te podok aw batota amon megdakep kaw kanak, so kenà a megdedempasay.
49Gayed a migtoladà doton te dakel simbahan, meneng wedà a niyo dekepi doton. Meneng keilangan metoman se kagi te Timanem insolat tepad kanak.”
50Penga niyan, kimadas se kedita te tinoledaan i Jesus, aw tinenanan dan sikandin.
51Doen sebad telaki timelokon ki Jesus olò migdiping. Dinakep dan heman sikandin,
52meneng nekelowà, so tinenanan din se diping din aw kimadas migpetabeg-tabeg.
53Penga niyan, inibing dan si Jesus doton te ontò pengolo te simbahan. Tapay netipon kidoen se menge pengolo te simbahan, aw menge obanen te Judiyo, aw menge menenoladà te punù ingkeliwat i Moises.
54Timelokon heman si Pedro, meneng migpekediyò sikandin lamig dimateng doton te dowangen te balay te ontò pengolo te simbahan. Nenenoo sikandin doma te menge otaw migtonggò te dakel simbahan, aw mig-ingadang sikandin diyà te apoy dan.
55Nayan, ibeg te menge pengolo te simbahan aw menge doma dan obanen, doen inangan dan si Jesus te salà amon doen tindegan te pegpeimatay dan kandin. Meneng wedad palos salà din kinità dan.
56Pengkey medita se otaw migkebolalaw tepad kandin, meneng kenà onawa se in-indan dan.
57Doen menge otaw migkebolalaw tepad kandin, kagi dan,
58“Dinineg day se inikagi din te mekebatog sikandin megbaet te dakel simbahan sida ininang te otaw, aw ipetindeg din se kaling simbahan eked inangi te otaw dalem te telo se aldaw.”
59Pengkey yan se in-indan dan tepad kandin, meneng kenà onawa se in-indan dan.
60Penga niyan, timindeg se ontò pengolo te simbahan aw mig-insà diyà ki Jesus, “Eden lay se itaba no kenyan? Indani kay aw benal se inikagi dan.”
61Meneng wedà taba si Jesus. Minikagi heman se ontò pengolo te simbahan, “Sikona ekon se Misiyas, sìyan Batà te Timanem. Indani kay den aw benal iyan.”
62Minikagi si Jesus, “Benal iyan. Komità kaw kanak Timanem Migpekeotaw egpenenoo kidoen te tangkil te Amay ko metolos amon lomowan a doma din. Lomikò a heman dini lekat te langit tekingan te labon.”
63Penga niyan, miglisì se ontò pengolo te simbahan te saol din tandà te keopal din, aw minikagi sikandin, “Wedad den kekemowan te peg-indan te doma otaw diyà kenitadon tepad kandin,
64so dinineg tadon den se pegtompuyus din te Timanem pineokit te pegpelingo-lingo din Batà te Timanem. Na, eden lay se aneng-aneng niyo tepad kandin?” Penga niyan, minikagi se kedita dan te keilangan imetayan sikandin so doen salà din.
65Lekat niyan, tineptepan dan sikandin, aw doen nenampeng te mata din aw nenombag kandin, aw minikagi dan, “Na, etoki aw sinu se nenombag kamno.” Nenombag heman kandin se menge otaw migtonggò te dakel simbahan.
66Dalem niyan, mig-ogpà si Pedro kidoen te dowangen. Doen bayi egtelaban te ontò pengolo te simbahan minokit kidoen te dowangen.
67Pegkità din ki Pedro mig-ingadang kidoen te apoy, mininoet sikandin aw minikagi, “Sikona se egdoma ki Jesus tege Nasarit.”
68Meneng migbolon si Pedro, kagi din, “Wedà ko ketegahi aw eden se eg-ikegiyen nikaw.” Penga niyan, minalin si Pedro doton te dapag te dalan, aw migkolaak se manok.
69Wedà kenamay, todà kimità se bayi sìyan ki Pedro aw minikagi diyà te menge otaw kidoen, “Sebad heman sakop din se otaw seini.”
70Meneng todà migbolon si Pedro. Penga niyan, te wedà kenamay, doen menge doma otaw kidoen minikagi diyà ki Pedro, “Benal sikona se sebad egdoma te otaw sida dinakep, so tege probinsya ka te Galiliya.”
71Meneng ontò migsapà si Pedro aw minikagi, “Wedà a palos kilala te otaw eg-ikegiyen niyo sìyan.”
72Pegketà, migkolaak se manok te ikedowa. Yan neeneng-enengan i Pedro se tapay inikagi i Jesus te ibolon din sikandin te meketelo te eked pa pegkolaak se manok te mekedowa. Penga niyan, ontò sikandin migkelag.
