Mak 2

1

2

3

4

5

6

7

8

9

10

11

12

13

14

15

16

¹A iso bung bat tari, ra o Iesu i wanpat melet tiro una tamon Kapernaum. A taro det longoro i lena i sa wanpat tiro urumu.

²A susut det wanpat, ra katu kolo sa urumu ma tiro upiso una matansako, ra i warawai torom det nama wasiso anun o God.

³Ra a wat na musano det los ara musano a pinino i mat. Det losi torom o Iesu.

⁴Ikut ka det pet lar pasi, uni a taro det bukus doko. Ra det wan tito usapat una lur na rumu, ma det papok saro pas a nubual taltalai nam o Iesu i tur iai, ra det unoro pirso a misait tomo nama lu ra i inep uni.

⁵O Iesu i tama anundet a nurnur, ra i inanos a musano a pinino i mat lena, “Nutunglik, di sa unus ru anum a kum sakino petutna.”

⁶A ramano kum tene ususer tagun a Warkurai kura det kis taru, det nuknuk doko lena,

⁷“Ilai sur a musano ri i wasiso lenra? I watung laulau o God uni i wasiso lar i o God. Osi i elar sur in unus ru a kum sakino petutna? O God sot kut.”

⁸Uniutra, tiro una nion o Iesu i tasman a nuknukin det. Ra i ting det lena, “Sur asau ra mot nuknuk lenra?

⁹Osi na wasiso ra ke ngangitin sur an watungi tan a musano ri? Pepetlai, an watungi lena, ‘Di sa unus ru anum a kum sakino petutna,’ o, an lena, ‘Un katutur, un los anum a lu ma un nan’?

¹⁰A wasiso ra an watungi, an watungi sur mot in tasmani lena, o God i pitar a warkurai torom a Nutun a Musano, sur in unus ru a kum sakino petutna nin upiso.” Ra i watungi torom a musano a pinino i mat lena,

¹¹“A inanos ui, un katutur, un los anum a lu, ra un nan sur anum a rumu.”

¹²I katutur, ma i los pas anun a lu, ra i wan pirso umatandet rop. A taro rop det kisin ra det rakon lekeleke pas o God lena, “Telek ri, met tama a ngas na utna lenri.”

¹³O Iesu i wan melet utiro una papor ina du tasi Galili. A labino kunur na taro det wanpat toromi, ra i ususer det.

¹⁴Ra i wan nanan, i tama pas o Liwai a nutun o Alpius, i kis una rumu na los takis. O Iesu i inanosi lena, “Un mur iau.” Ra o Liwai i katutur ma i muri.

¹⁵Numur o Iesu ma anun a kum nat na ususer, det wangon tiro una rumu anun o Liwai. A susut na tene los takis, ma a kum tene sakino kai det wangon tomo nam det, uni a susut na taro lenri det ser mur o Iesu.

¹⁶A kum tene ususer tagun a Warkurai ra det Parisi utkai, det tama o Iesu i wangon tomo nama kum tene sakino ma a kum tene los takis, ra det ting anun a kum nat na ususer lena, “Sur asau o Iesu i wangon tomo nama kum tene los takis ma a kum tene sakino?”

¹⁷O Iesu i longoro i, ra i watungi lena, “A dokta ke wanpat sur det ra det langolango. Awu! I wanpat sur det kut ra det misait. Ka wanpat sur an kabo pas a kum tene tokodos, awu. A wanpat sur an kabo pas a kum tene sakino.”

¹⁸A kum nat na ususer anun o Jon ma a kum Parisi det wewel. Ara taro det wanpat torom o Iesu ra det tingi lena, “Sur asau ra a kum nat na ususer anun o Jon ma a kum nat na ususer anun a kum Parisi det wewel, ikut anumi awu?”

¹⁹O Iesu i balu det lena, “A kum paspasan a musano ra i nolin matok, det in wewel pepetlai, ra kura utmakai i tomo nam det? Ke sot sur det in wewel, uni a musano ra kura utmakai i tomo nam det.

²⁰Ikut tu bung in nanpat, ra din ben ru i gusun det, ra det in wewel maragom.

²¹“Katutaio in mabon a du matok na malu tomo nama turaino ra i tararos. Ra in pami lenra, a du matok na malu in raros a turai na malu, ra in tararos bing.

²²Ma kataio in titior a matok na wain utiro unin turai na koto, ra di pami namin pino meme, sako a wain in busu ma in mubus ma in purus in nokoto na wain, ra a wain ma in nokoto der in laulau. Din titior a matok na wain ut utiro unin matok na koto na wain.”

²³Un ara Bung na Sabat, o Iesu i wan nanan epotor una kum kinobot na wit. Anun a kum nat na ususer det wan tomo nami, ra det turpas a kumut a ramano kum turunu wit.

²⁴A kum Parisi det ting o Iesu lena, “Tama i! Ilai sur anum a kum nat na ususer det pam a utna ri, ra ke tokodos elar nama warkurai tagun a Bung na Sabat?”

²⁵O Iesu i balu det lena, “Pepetlai, ka mot luki utmakai asau ra o Dewid i pami? Una kilalo ra o Abiata i mugumugu na tene etabor torom o God, o Dewid tomo nama kum paspasano det murak, ma kalako utna. O Dewid i ruk tiro una rumu anun o God, ra i wan a beret di sa pitar tari torom o God. Ma i tabori kai a kum paspasano nami. Ikut a beret ra, a warkurai taguni, i lenri, a kum tene etabor kut torom o God det in nangon taguni, ma a taro oros awu.”

²⁷Ra o Iesu i watungi tandet lena, “A Bung na Sabat di pami sur in warut a taro. Ka di pami sur a taro det in warut a Sabat.

²⁸Lenkutkai ra, a Nutun a Musano i a Labino utkai tagun a Bung na Sabat.”